Iberani 2 - ALA WENE HIVIS DIRUP WATUGWA

Nenagap wendarup wene andi mondok iya

¹ Anderogo atma, nit Ala wene nenaruk hobaluk wogogup ako, hekbaluk sup hunogoma nomaliluk lagu ninisaoen, ambi inim nggetok erogo vagago dogosogom.

² Ala en, “Yerogo ogarup, nderogo ogarup,” yagagi wene Musa yugogogi ako, it malaikat en nenombawi un enaruk adigat hunggik ogagu dogopwak yiluk, yugeregetek. Ata, mondok des erogo ogagu dogopwak yiluk, denggalogo yugurugusigik, sovalogo hekbaluk, weyak adigat ogagu lagagwama, Ala en onggo mondok ndatak okbogogi atma,

³ nit nenagap wendarup wene mondok eve iya imbitigi ako, ninunggut okbaluk agurik halok, nit hekbininayogon ombasagwi? Mondok dek. Wene andi, endak Nenowa Inis Ombok enat vagalogo yugirigya lagagimu, it hunggugwa akoen enendawi yunggur-wanot yegetek, enane mondok avyarat yukneragagwa.

⁴ Wene andi yuknirugusigik, “Wene yi avyarat o,” yiluk, waguluk Ala en enalon werek menda ogagya, nggarogo ogarubuk menda ogagya, avyarat yedok hapwak yiluk ogagya, ogarit lagya dugwit, nit nenadigetap ogagu dogoguluk, At Ala endawi imbitigi ako wane-wane Averiniki en nenandok okbininggigi.

Nenagap wendarogo wokniniviluk laup sup yagagi wene

⁵ “Hivis wen swi menda vaga dogosogom o,” yiluk, nit yagalagwi ako andi, At Ala en, “Malaikat vagago dogopwak,” imbita dugwit, yugeregetek.

⁶ Ata, ap ambi Ala wene endak dirup warek vaga iri dugwit: “Nit avakwa yi, saniva yiluk, hape wenggenggu, eke, ap enaburi nit yi, saniva yiluk, dombabinunggu, ogasiga?

⁷ Yogak un sidogat, it malaikat siyalek inigik, nit avakwa sovalek dogoguluk, okbininggu, nininis ombok eve siyalek nenagayuk werek dogoguluk, okbininggu, ogagya lagagindik,

⁸ yi menda ndi menda ovok erogo nit nenavema dogopwak yiluk bagagin,” yiluk, yagagi ako andi, yi menda ndi menda nit avakwa nenavema bagya dugwit, ambiat ogo nenavema dogop dek andi embetetek. Ata, ovok erogo nenavema dogopwak yiluk imbitigi ako, dirup warek agarik ovara, yogak yi vaga nenavema ao hegetek-at agurik.

⁹ At Yesus andi, winimen siyalek mondok agayuk werek agarik helagwi. At Ala nenabwa en okbininaliga atma, malaikat siyalek inigik, Abut en nenadigetap nenavoloma hambupwak yiluk, sidok ndugwis ambiat sovabagya lagagimu, wen vaga wambu wagya lagagirik, nenavoloma hambigya dugwit, idup-mbidup hegek wogogi andi vaga, Ala en At Abut anderogoat agayuk wurogo siyabagagirikmu agarik.

¹⁰ At yi menda ndi menda ovok erogo ogagya lagagirik, andok agarik Ala akoen, “Naburi wisane erogo ninim ndatak siyalek dogosogom o,” yiluk, imbitigi. Imbita lagagirik, nenagap wendarupwak yiluk, Nenowa en wokniniviluk laup ako, mondok ndagat arupwak yiluk, yagan warup Ala en imbitigi ako, segat imbitigi.

¹¹ At nenomaduk degerogo baluk Ala ake enogo bininaliga Yesus inim, At enogo bininaliga nit inim, Nenasin Ala ambi atma, Nenowa Yesus en, “Naori o,” yiluk, yukneraup andi anggadidek.

¹² At Asin Ala yugugu dugwit: “Hinis vagalogo naswei-narupwi agarwikmu yugeregek lagya, haburi wonggalek enanggelekma hinis siyabagagya, ogagya dogosogon o,” yiluk, Asin Ala yugisiga.

¹³ Eke, ambi iri dugwit: “An nendawi At vaga vanggabaluk agirik o,” yiluk, yugugu, eke, ambi iri dugwit: “Ala en naburi woknogogi ninim yoma-at agurik o,” yiluk, yugisiga.

¹⁴ Aren, “Avakwa andi An naburi,” yiluk yagagi andi, nit avakwa neneyave wen vaga hambisagwi menda wane-wane okhedagagi andien, At eyave hambigya dugwit, hambisagwi menda adem andok agarik Sile ako, At Yesus en anyedek erogo sovalogo baluk,

¹⁵ nit avakwa endaklakluk niniluk dugwit, hambisagwi nenalon en nininggis heda marek ovagak welagagup ako visilogo bininagiluk, nit avakwa hambisagwi menda wane-wane-at okhedagagi.

¹⁶ Anderogo ogagagi ako, it malaikat menda yonggar-inivigiluk ogagetek, ata, at Averakam ombawi wigalek menda yonggar-inivigiluk, ogagagi andi yedok.

¹⁷ Anderogo atma, nit avakwa weyak ogagu niniselok, Ala aninis nenombasiga ako, endawi sagain arupwak yiluk, ap imam inis ombok winimen dugwit, nenabwa en Ala ake des erogo ogagya dogopwak en, nit okninivisiga menda ako, ovok erogo At wane-wane okbaup agya lagagimu, endak At aori nit ndatak-at okhedagagi.

¹⁸ At Sile en At ako weyak ogarupwak yiluk, avut mbanggya hegek, yagan watigi atma, yogak nit nenendawi weyak ogarup nomalninivi wagya halok, At nenake ogagya dugwit, yonggat-ninivisiga.