Iberani 13 - ALA WENE HIVIS DIRUP WATUGWA

Ala endawi sek hinisapwak yiluk, ogagu dogop wene

¹ Hit Ala aburi agipik atma, nabwa-habwa ogasagwi ako, ambi inim ombok erogo ogagu dogones.

² It avakwa en malaikat menda hegek, “Yi avakwa aro,” yiluk, inunggut dugwit enake enagania isagu lagagwa atma, it avakwa huru bikhinisa waguselok, hai warogo henendawi sagain vaga woginipu dogones.

³ It avakwa lembaga heda mago agarwik ako, “An ninim lembaga heda mago ovagak agurik higi,” yiluk, yonggar-inipu dogones. Eke, avakwa en yo vaga inituselok, idup helagwi ako, “An ogo, anderogoat naklipmu en, idup hela atma,” enendawi aik wakbugu dogones.

⁴ Avakwa wanggis welagwi menda inim, avakwa ugun-ugun oginivit nelagwi menda inim, Ala en enowak dilogo weyak onggo enovaga bisayogon atma, it avakwa enagun enogwa hondalek agarwik ako, mondok eve iya-at umbutu dogones. Eke, iperen nogo yup andi ogo, eve sek atma, nogo yilagwima weyak agya haoen, des erogo malogo dogopwak.

⁵ At Ala en iri dugwit: “An hekbigigu, ugun wilirogo bigigu, ogarisogonbuk o,” yiluk, yagagi atma, yoparip adigat hogop-hogop embetek nelagwi vaga yoparip andi, ayeloman agu hinisaoen, dibagu dogones. Henangge nano menda ambi agarik halok, “Yi ovogat werek,” yiluk, henendawi seyalek dugwit, adenggen vaga nagu dogones.

⁶ Ala en, “An hekbanisogonbuk o,” yiluk, yagagi wene ako vaga nenendawi vanggabaluk, “Nenasin en yonggat-neyaliga atma, avakwa en an okbanilagwi ako, nalon hayogonbuk,” yiluk, yugu dogop andi segat.

⁷ It henasini o endak Ala wene yukhirugu lagagwa ako, henape wenggenggu dugwit, it avyarat umbutu dugwit sek ogarit lagu dugwit, hambit nagu lagagwa ako, dibaluk, hit anderogo wane-wane avyarat umbutu dugwit ogarit nagu dogones.

⁸ At Yesus Keretus andi, o endak inim, yogak inim, hivis inim, adik ambi asigadek mondok itok-at agarik.

⁹ Yi wene ndi wene adik yagan wendagwi ako hobaluk, henendawi nomalogo wokhiniviluk wunggu hinisaoen, dibagu dogones. It ninen, “Yi menda ndi menda nelagwi vaga sek okhedaup,” yiluk, wene yagalagwi ako ogasagwi vaga enendawi modo okhedegetek un enam warogo ogarit lendagwi atma, hiren umbutu dugwit, “Wene andi vaga nenendawi modo okninivisigadek. Ata, Ala endawi hunik en okbininggya hegek nenendawi modo arup andi, sek aro,” yiluk, umbutu dogones.

¹⁰ It ap imam-imam Ala awiravo valekma ogasagwi akoen, nit Ala ake warogo wogerelagwima ndomba nenake warek yi, it naup mondok dek.

¹¹ At ap imam inis ombok akoen avakwa enomaduk dek arupwak yiluk, sapi-ndomba Ala ake wakbaluk, amuya wolok Moga Adigat Agarikmu banunggwigya hegek, sapi-ndomba eyave leget weram hali hunisagwi.

¹² Ako wane-wane, Yesus ogo, At amuya vaga nit avakwa nenomaduk degerogo baluk, Ala ake enogo bininagiluk yagan warogo o kota werama-at hombagagi.

¹³ Anderogo atma, At o kota werama nenake hambigiluk lagya hegek wiyiknom-weyaknom erogo bagu lagagwa ako hak, nit ogo anderogo wane-wane wiyiknom-weyaknom erogo bininggusigik, At adema o kota werama-at wulusogom.

¹⁴ Nit nenamwa o kota mondok-mondok dogop ako wen vaga yoma agarikbuk. Ata, nenamwa o kota adik hunogoma laguluk, un sidok abyam agurik.

¹⁵ Anderogo atma, At Yesus ninim hunik dugwit, “Nenasin Ala o,” yiluk, Ala ake warogo wogisagwi hak, ndugurek-ndagarek nenabis vaga Ala inis adigat adup ogagu dugwit, inis siyabagek ogagu dogosogom.

¹⁶ Eke, anderogo ogagu dugwit Ala ake warogo wogisagwi hak, At ake avakwa sek okbugwis, yonggar-inipwis, ogagu niniselok, Ala endawi sek nenombasiga atma, hinunggut erogo babuk. Ata, okbisilin nagu dogones.

¹⁷ It henasini ako, hivis Ala en yugirigya dugwit, “Avakwa enendawi nggarogo malenombogo welagep,” yiluk, yugerayogon atma, it inilup dugwit, henendawi des erogo malhenombogo agarwik atma, enavema dugwit, enane yukherelagwi ako, des erogo hunggu dogones. It enane hunggitek hiniselok, it enendawi anggin dugwit, un enam warogo malhenombogo dogosogom atma, enendawi adenggen vaga malhenombogo dogopwak yiluk, enane des erogo hunggu dugwit, sek okbugu dogones.

¹⁸ Nenake samban adigat ogagu dogones. Nit sek adigat ogarit nagu dogop hogop ombasagwi atma, yi ogagek ndi ogagek ogagu dugwit, weyak ogarup ambi nenendawima wenggelagetek halok, “Segat ogarit nelagwi higyo,” yiluk, ombasagwi.

¹⁹ Nenake samban ogagu dugwit, adem ombok ambi, Ala en an yiluguluk henadema lakbani warupwak yiluk, nake samban ogagu dogovovok yiluk, yukheraliga o, naswei.

Enake samban ogagagi wene

²⁰ Nit nenendawi ugun seyalek adenggen dogoguluk okbininaliga adem Ala akoen, wene nggatuk erogo yukneragagi ako, “Mondok-mondok ogarisogon o,” yiluk, avyarat umbutu dogoguluk, ndomba mondok des erogo woknenombolok naliga Nenowa Inis Ombok Yesus ako, nenake amuya wulu wagya lagagimu, hambuluk lendagwima en iluk erogo mondok okbagagi.

²¹ Anderogo atma, At Ala ogarup ombasiga ako, hit mondok wane-wane ogagu dogovovok yiluk, yi menda ndi menda eyave menda halok adigat des erogo okbigigu, eke, Yesus Keretus ogagagi vaga nit nenovavut amot arup endawi sek ombasiga ako okninipu, ogagya dogosogon atma, At inis mondok-mondok siyabagu dogosogom o. Amin!

Atok vaga yugeragagi wene

²² Naswei o. Hit ogagu dogop an wene maduk dirup warogo wokheraliga yi, henendawi sagain vaga wugu dogovovok yiluk, yukheraliga o.

²³ Nenaswe Timotius heda mago welagagi ako, vage visilogo bagagwa hinilup arovovok yiluk, yukheraliga. At yiluguluk an nadema wagya halok, niperen henadema warusogom.

²⁴ It malhenombogo agarwik inim, it avyarat ombasagwi Ala aburi inim, ovok erogo, “Aren, ‘Wa! yukheraliga,’ yagas,” yiluk, yugeranes. Eke, it ap o Italia menda ninim agurik ako ovok erogo heyaga wakhinivisagwi.

²⁵ Ala endawi hunik en okbininggu dugwit, hinimat dogosogon. An ovogat yukheraliga o. Wa!