Iberani 12 - ALA WENE HIVIS DIRUP WATUGWA

Nenasin Ala en nenaruk warisiga wene

¹ It avakwa enendawi Ala ovaga vanggabaluk, avyarat umbutu dugwit ogagu lagagwa yigyo akoen, “Nit ogagu lagagup ako wane-wane ogagu sami a, dek a?” yiluk, eneyave apik homago walinek inil vurek agarwik ovagak atma, nit sup hupuk lagu dugwit, nenanyedek agya haoen, yi menda ndi menda nenovaga durik agarik ako inim, weyak ogarup nenendawi hunik umbutu dugwit yidilogo bininaliga ako inim, ovok erogo nggolalogo mbobagu dogosogom. Mbobaluk, “Hupuk andi hudi mendek yilales,” yiluk, yukneragagi ako, nenendawi mondok wadokdek dugwit, hupuk mendek yilagu dogosogom.

² Eke, endak nit avyarat umbutu dugwit Ala wene waguluk nenendawi vipuk erogo bininggu, eke, avyarat umbutu niniselok, nenendawi mondok hoda erogo bininggu, ogasiga andi, Yesus atma, At adigat ninil vurek dugwit amusek nagu dogosogom. Avakwa enanggadi erogo yo winik vaga inirisagwi ako, At Yesus en, “An anderogo nanggadi erogo narup nanggon,” imbitigibuk. Ata, “Hivis nadenggen ombok hayogon atma, yogak un sidok anderogo okbanup sek aro,” yiluk, endawi wadokdek dugwit, yo winik vaga hambigya lagagirik, iluk akluk, Ala wene yugeraligama akoma Ala inggis amotkan hora yi inggya lagagirik, agarik.

³ It ap weyak ogasagwi menda akoen Yesus mondok enanggon umbutu dugwit, weyak okbagusigik, At endawi wadokdek dugwit, wigya lagagi atma, hit sakdida okhinipu dugwit, henanggon okhinipu haoen, At ogagagi hak ogagu dogovovok yiluk, dibagu dogones.

⁴ Hit andi, weyak ogarup okhinipu hegek, henanggon en ndup henanye erogo ogagu dugwit, hit henamuya ao winggitek-at agipik.

^5-6 Enasini en enaburi mbilape vaga enendawi aik wakbiselagwi andi hak, hit Ala aburi menda, Aren henendawi aik wakbigigas wene andi hinunggut akluk agipik? Wene andi, Aren iri dugwit: “Naburi wai. Henasin Ala en it ap At endawi hunik ako enendawi werek arupwak yiluk, okbugu, eke, ‘Yi An naburi aro,’ yiluk, yugeraliga ako adik ogaguselok, mbilinipu, ogasiga atma, henendawi werek arupwak yiluk, okbugu halok, ‘Okbininaliga yi, iya dek o,’ yiluk, meyan umbutwi, eke, henaruk watya halok, henendawi weyak agya, ogarubuk o,” yiluk, yagagi ako dirup warek agarik.

⁷ Avyak enendawi werek arupwak yiluk, enasini en enaruk watitek ambi agarukbuk. Ovok erogo enaburi enaruk wasagwi atma, Ala en henendawi werek okhinivigiluk, ogagya halok, “An At abut avyarat agirik halok, nabwa en okbaniliga higi o,” yiluk, henendawi horaik dugwit, wugu dogones.

⁸ Nit Ala aburi halok ovok erogo nenendawi werek arupwak yiluk, nenaruk wasiga atma, hit ambi henaruk watitek halok andi, “Nit At aburi dek ugun enabut endago-at agurik,” ombarop.

⁹ Eke ambi, nit nenasini endakninipugwa akoen nenendawi werek arupwak yiluk, nenaruk watuselok, enane des erogo hobaluk, ogasagwi hak, nit niniluk dogoguluk At nenendawi adigat andok agarik Nenasin Ala ane yukneraliga ako, des erogo hobaluk wane-wane ogarup dek ombasagwi? Dek o. At ane hobaluk ogarusogom.

¹⁰ It nenasini endakninipugwa akoen, “Sek ogagu dogopwak yiluk okbisaup yiat helagwi,” yiluk, enendawi wenggebaluk, sidok nenaruk wasagwi ovara, Nenasin Ala andi, At weyak ogasigadek mondok sek adik enek agarik hak, nit ninim anderogoat sek adik enek dogoguluk, dibaluk, nenendawi werek arupwak yiluk, mbilninivisiga.

¹¹ Nit nenendawi werek arupwak yiluk mbilninivisiga ako andi, okninipu hegek, sek okninivisigadek nenendawi ut yunggup iri helagwi ovara, “Yi segat okninivisiga o,” yiluk, dibaluk, wugu niniselok andi, yo enggen eve sek yilin landiga hak, nit ogo sek ogarit laup mamulhedelagwi vaga hivis nenendawi ugun seyalek adenggenat dogosogom.

Dibaluk ogagu dogop wene

¹² Anderogo atma, henowak dede yugu dugwit, hininggis-hinisok anyedek okhinivisiga ako henanye okhidugu dogomundik,

¹³ hinisok venak vikit endenek ako, venak inim weyak okhinipu haoen, sek arupwak yiluk sup amorerogo yago vaga lagu dogones.

¹⁴ Weyak nenendawima werek hegek, Nenasin Inis Ombok ninil haup mondok meyan atma, yi ap ndi ap ovok erogo hinim ugun dambulik dugwit, weyak ogagetek Ala ake enek sek adigat dogovovok yiluk, henanye erogo okhidugu dogones.

¹⁵ Ala endawi hunik en sek okbininaliga ako hekbagu hinisaoen, dibagu dogones. Ap ambi henanggelekma wene eda menda henendawima mabisilin lagya halok, hit avakwa wisane At ane hobaluk, weyak ogarup umbutu hinisaoen, dibagu dogones.

¹⁶ Hit ambi akwa ugun-ugun oginivit nagu hinisaoen, dibagu dogones. Eke, ap Esau akoen Ala ane sovalogo baluk, weyak ogagagi hak hit anderogo ogarit nagu hinisaoen, dibagu dogones. At Esau en at aswe yugugu dugwit, “Manggum endago an atma, mavorangge an hedaup ako asugen, hat hedanok yiluk, onggo erom isago andi wokniru,” yugugu lagagimu, wogogogi ako ndugwis ambiat ninggigi.

¹⁷ Ninggya lagagirik, andien hivis, endawima asam higya dugwit, “Nasin amunggat woknirup nanggon yigi ako, woknirupwak ai,” yiluk, yup yagya dugwit, hivis ambi hedagiluk, wal okhagagi ovara, “Waup nanggon,” imbitigirikmu, asin en Esau hekbagagi-at helagwi.

¹⁸ Endak it avakwa Iserali menda eve ndom Sinai adema ari wagagwa andi hak, hit ndom andi menda adema ari wagetek. It ndom Sinai adema ari wagu lagagwama, hali abya wuluk-herek iris, o hup hwidamup iris, o havut endengga ombok ogagya,

^19-20 ane ombok ogasiga trompet ako ane wulup iris, ogagya hegek, Ala ane ombok vaga yugirigya dugwit, “Wam a, avakwa a, ndom yi vagari waguselok, mondok helep vaga ndapwalogo warup,” yiluk, yugirigya lagagimu, it enaruk hunggugwa ako enalon en, “Wene ambi inim yuknerabuk!” yiluk, enane ngges erogo yugogogwa.

²¹ Eke mondok enalon werek menda Ala ogagagi ako, Musa higya lagagirik, “An ogo nalon en nowak dede okneraliga,” yiluk, yagagi.

²² Hit yogak ndom Sion At iluk agarik Ala ako awi kota Yerusalem mbogot vaga akoma wagagup wane-wane-at agipik. It yi malaikat ndi malaikat nininggis dinggilup meyan mondok wisane erogo wonggalek dugwit, enadenggen vaga ogasagwi inim,

²³ it Ala aburi manggum menda ininis mbogot vaga dirup warek eneyave wonggalek inim, nit avakwa ovok nenawene amburup mbabaluk nenowak dilisiga Ala ako inim, it avakwa enendawi eve sek adigat dugwit, hombagagwa mondok sek erogo bogogi enanggela inim,

²⁴ eke, Ala ninim dambubininaupwak yiluk, wene adik swi menda nggatuk erogo yukneragagi nenake ogasiga Yesus ako inim, ovok erogo andoma-at wonggalek agarwik atma, enadema wagagup ovagak agipik. Hit Havel amuya wombagagirikmu ambi okbininaup meyan akoma wagagupuk. Ata, Yesus amuya wulu wagagirikmu sek okbininaliga adoma-at wagagup atma,

²⁵ Aren ane yukheraliga ako hekbabuk. Des erogo vagago dogones. At wen vaga en dugwit Ala ogarup imbitigi ako avakwa yugirigya lagagimu, “Nenanggon o,” yiluk, mbobagu lagagwama, Ala en hekbigitek anggin enovaga bogogi atma, yogak At mbogot vaga agarik akoen wene yukneraliga ako mbobagu niniselok, nit hekbininayogon ombasagwi? Dek o. Anggin eve iya erogo nenovaga bininayogon.

²⁶ Andi hudi At yugirigya dugwit, o wen yi ako, yukul-wadok ogagagi ovara, yogak halok andi, hivis ambi ogarup iri dugwit, “An ndugwis ambi vaga wen yi adigat yukul-wadok ogarisogonbuk. Ata, mbogot inim anderogoat ogagya neyasogom o,” yiluk, yukneragagi.

²⁷ “Ndugwis ambi vaga ogarup o,” yiluk, wene yukneragagi ako andi, yi menda ndi menda wadokdek agarik halok, mondok wadokdek dogopwak yiluk, hekbagya dugwit, yi menda ndi menda bagagi ovok erogo andi ndugwis ambi vaga yukul-wadok iri halok mbobagiluk, yagagi helagwi.

^28-29 Anderogo atma, Ala avema bisaligama nit nenandok dogop imbitigi ako andi, yukul-wadok yagaligadekma, “Ala wa,” yiluk, hai watu dogosogom. Nenasin Ala andi, hali abya en yi menda ndi menda ovok vup erogo nenggek landiga hak atma, nenalon en agayuk wutu dugwit, At endawi sek ombasiga ako adigat ogarit lagu dogosogom o.