Iberani 11 - ALA WENE HIVIS DIRUP WATUGWA

It avakwa endak Ala ovaga vanggabaluk, avyarat umbutu dugwit, ogagu lagagwa wene

¹ Nit nenendawi Ala ovaga vanggabaluk, avyarat ombasagwi eyave ako, yi: Yi menda ndi menda nit nenape wenggelek agurik ako, “Avyarat hedasogom,” umbutwi, eke, ninil hegetek ovara, “Avyarat agarik,” umbutwi, ogasagwi andiat.

² It nenombawi endak welagagwa ako andi, Ala ovaga vanggabaluk avyarat umbutu lagagwa vaga, Ala en, “At yi, sek aro,” yiluk, inimbita lagagi.

³ Wen-mbogot ako ninil hugu dugwit, nenendawi Ala ovaga vanggabaluk, avyarat ombasagwi vaga, “Yi Ala ane vaga-at werek ogagagi o,” yiluk, dibelagwi. Anderogo atma, yi menda ndi menda ninil helagwi yi, ninil helagwidek menda ako vaga werek ogagagi ombasagwi.

⁴ At Kain akoen angge weyak menda Ala ake bawagagi ovara, Havel andi, endawi Ala ovaga vanggabaluk, avyarat imbita dugwit, angge sek menda warogo Ala ake bawagya lagagimu, ake bawagagi ako Ala il higya lagagirik, “Ap yi, endawi eve segat agarik higi,” yiluk, yagagi. Eke, at Havel ako andi, ovok hombagagi ovara, at endawi Ala ovaga vanggabaluk avyarat imbita dugwit ogagagi wene ako nit ao yagalagwi atma, at ninim nenane yagalagwi ovagak agurik.

⁵ Ap Henok ogo, endawi Ala ovaga vanggabaluk, avyarat imbita lagagi vaga eyave hambegetek, Ala en iluk wolok inggigi hegek, aswemuni en havitugwa ovara degat hagagwa. Wolok enggetek hegek, “Aren Ala endawi sek ogagya lagagi,” yiluk, Ala wene dirup warek vaga ninil helagwi.

⁶ Avakwa en Ala ovaga vanggabaluk, avyarat embetetek halok, Ala endawi mondok sek enombasigadek. Andi halok, saen Ala adema laup umbutuselok andi, “Ala avyarat agarik,” yiluk umbutwi, eke, “Nenendawi enggen vaga At ninilup aruguluk ogarusogom halok, At onggo woknerayogon,” yiluk, umbutwi, ogaguselok, At endawi sek enombasiga.

⁷ Ap Nuh ogo, hivis ogarup ao sigam agetek hegek, At Ala en hurimbis yugugu lagagimu, “Yi avyarat ogarup yuknugu higi,” yiluk, agayuk wutu dugwit, abur-ogwa inim enagap wendarupwak yiluk, o mburis vanggigi. At Ala en at yugogogi ako avyarat imbita dugwit, mburis vanggigi andi vaga, “Hit avakwa weyak ogasagwi onggo is vaga hinirisogon o,” yiluk, it inilup okbogogirikmu, at Nuh endawi Ala ovaga vanggabaluk, avyarat imbitigi vaga, Ala en “Ap yi, endawi eve segat agarik o,” yiluk, wogogi.

⁸ Eke, at Averakam ogo, Ala en, “Mavorangge hak wen ambi hat handok arinok yiluk, wokhirisogon atma, elak o,” yugugu lagagimu, o andi, inggut ovara, hegek, Ala ovaga vanggabaluk, “Avyarat woknisogon,” imbita dugwit, lagagi.

^9-10 “Wen ambi wokhisogon o,” avok yugogogirikmu, akoma-at lagya lagagirik dugwit ovara, “O yi andi dek. Ala en o kota adik ambi mondok dogop menda valup ape wenggebaluk, valisogon akoma dogogup,” yiluk, avyarat imbita lagagirik, abyam welagagi. Abyam dugwit, Isak Yakup iperen inim mavorangge hak hedapwak yiluk, Ala en avok yugeragagi atma, it inim ap huru ovagak eravo vabaluk, ya nogoyik nda nogoyik yagan nagu lagagwa.

¹¹ At hwa Sara ogo, ovok anggok eyak endakhedaup meyan hegek ovara, at Averakam en, endawi Ala ovaga vanggabaluk, “Ala yagaliga ndatak ogasiga atma, yuknigas ako avyarat okbanisogon higi,” imbitigi vaga Ala en ogwa ako agap swi okbagya lagagimu, Averakam abut endagagi.

¹² Eke, ap Averakam ako abut endagetekma, anggok hambup-at welagagi ovara, at eyave ambiat en ombawi dadiwap mbogot vaga agarwik hak, is yinggi agarik hak, ap wisane ininggis dinggilup meyan akoat ombawi endaklagagwa.

¹³ It ap andi ovok erogo, “Wokherayogon o,” avok yugeragagi wene ako, agur-agut ovagak o adumu andoma en wagya inil hugu lagagwarik, “Ako yiat okbinina wagya helagwi o,” yiluk, enendawi sek umbutu dugwit, “Nit ap o wen vaga yoma nenawerek agurikbuk. Ap huru ovagak agurik o,” yiluk, wene yugeragagi ako eyave des erogo wegetek ovara, “Avyarat woknerayogon o,” yiluk, enendawi avyarat umbutugwa andi vaga, eyave wogogwa ovagak dugwit, hambugu lagagwa.

¹⁴ It avakwa anderogo yagalagwi vaga enawen adik swi menda it dogopim havethidugu dugwit, yugu selagwi.

¹⁵ It ap andi, enawi adem vaga hekbagagwa ako, enape wenggelek duklipmu en, eneyami vaga yungguliluk enawi adem vaga akoma waklip segat ovara, anderogo embetetek.

¹⁶ Ata, it enendawi en, “Nit nenawi eyave mbogot vaga hedelaup ai,” yiluk, agangga hunbaluk, hambit lagu lagagwa atma, At Ala en it enendawi umbutugwa ako wane-wane enawi eve kota ovagak nduk erogo bogogi ako agarik atma, “‘Nenasin Ala o,’ yiluk, yuknugu dogop segat,” ombasiga.

^17-19 Ala en Averakam avut mbaligiluk yugugu dugwit, “Habut warogo An nake hali bain,” yugugu lagagimu, Averakam en, “‘Habut Isak vaga hombawi wisane wigalarisogon o,’ yiluk, yuknugu lagama, avyarat ombasiga ovara, ‘Waru,’ yuknisiga andi, nggarogo adik warik?” anderogo imbitigibuk. Ata, “Ala en hambuguselok iniluk erogo mondok okbisaup ndak atma, anderogoat iluk erogo mondok okbayogon higi,” yiluk, avyarat imbita dugwit, “Nabut ambiat endago yiat warisogon,” imbitigi. Eke, Ala en hambuguselok iniluk erogo mondok okbisaliga avyarat imbitigi ako wane-wane, Averakam endawi en mondok warisogon imbitigi andi vaga Ala en avyarat watas imbita dugwit, iluk erogo mondok okbagagi ovagak ombasagwi.

²⁰ Eke, at Isak ako, endawi Ala ovaga vanggabaluk, avyarat imbita dugwit, aburi Yakup inim, Esau inim, amunggat enovaga bugu dugwit, “O hivis anderogo okbigigu hagup o,” yiluk, yugeragagi.

²¹ Eke, Yakup ogo, hambigiluk ogagya dugwit, endawi Ala ovaga vanggabaluk, avyarat imbita dugwit, Yusup aburi enadigetap amunggat enovaga bugu lagagirik, owanggun atok vaga vanggatlakluk, Ala inis siyabagagi.

²² Eke, at Yusup ogo, vage hambup agya lagagimu, endawi Ala ovaga vanggabaluk, avyarat imbita dugwit avakwa Iserali menda yugirigya dugwit, “Hit Iserali menda o Mesir yoma dogogupuk. Wulugup atma, wunggu dugwit, an nowak inim wolok wulugup o,” yiluk, wenelilu enovaga bogogi.

²³ Musa isa-asin ogo, enendawi Ala ovaga vanggabaluk, avyarat umbutu dugwit, avyak Musa endaklagagi ako mondok widao ap ilwerek arup yedok hugu lagagwarik, ap inis ombok wene yugirigya lagagi ako enalon embetetek dugwit, hwilakbaluk inigik, saut henggam ogagagwa.

²⁴ Andien, hivis Musa ako sawe agya lagagirik, Ala ovaga vanggabaluk, avyarat imbita dugwit, “Ap inis ombok Viraon abut hwavyak akoen, eyak yuknirup andi nanggon,” imbita dugwit,

^25-26 “Hivis Ala en onggo woknirisogon o,” yiluk, ape wenggelek dugwit, “O Mesir yoma yi menda ndi menda eve sek adigat agarik yi, iya dekma. Ata, Keretus en hivis okbininaup abyam agurik andi, horogat nenombarisagwi ovara, hivis okbininaup ambi agarik atma, iya o,” yiluk, imbitigi. Imbita lagagirik, avakwa weyak ogarit nagu dugwit, un sidogat enendawi adenggen ombasagwi ako menda hekbaluk, Ala aburi anggin-mbanggin enovaga biselagwi ako, “An ninimat okbininapwak o,” yiluk, imbita lagagirik, Iserali enadoma lagagi.

²⁷ At Musa ako endawi Ala ovaga vanggabaluk, avyarat imbita dugwit, “Ap inis ombok Viraon ako aninis en natya halok andi, narupwak o,” yiluk, o Mesir hekbaluk, alon dek winggigi. Ninil hegetek menda ako, at il haliga ovagak ogagagi atma, endawi mondok wadokdek dugwit, winggigi.

²⁸ At malaikat avakwa inirisiga menda akoen, it avakwa o Mesir menda enaburi manggum endago ako enarit lagya dugwit, Iserali menda inim initu haoen, at Musa en Ala ovaga vanggabaluk, avyarat imbita dugwit, isogo Vasika isagu dugwit, sup mbanggut vaga amuya eralogo balin lagagi.

²⁹ It avakwa Iserali menda enendawi Ala ovaga vanggabaluk, avyarat umbutu dugwit, wen wedalek vaga lendagwi hak, it Is Laut Merah yanggadek ako mbalogo wagu lagagwama, it Mesir menda ogo anderogoat enamusek is mbaluguluk, nunggugu lagagwama, sopalipigi.

³⁰ It avakwa Iserali menda anderogoat enendawi Ala ovaga vanggabaluk, avyarat umbutu dugwit, o Yeriko avilis-ambot walinggusigik, nogo 6 yikbaluk, hari 7 vaga helep leget wogo ako masok-danggok erogo ndan yagagi.

³¹ Hwa yanenggek Rahap ogo, endawi Ala ovaga vanggabaluk, avyarat imbita dugwit, it ap o bikhaguluk wagagwa ako, at endawi sek vaga woginipu lagagirik hwilak bogogi atma, hivis it ap Ala wene sovalogo bagagwa ako initu dugwit, at hwa ako adigat hekbagagwa.

³² Eke, ambi ngga inim yukheraik. Dek o. It ap Nggideon ogo, Mbarak ogo, Simison ogo, Yeveta ogo, Daut ogo, Samuel ogo, it navi-navi Ala en yugirigya hegek yugurugu lagagwa menda ogo, it ovok erogo anderogo adigat enendawi Ala ovaga vanggabaluk, avyarat umbutu dugwit, eve iya erogo ogagu lagagwa ako mbilinogo yukheraup segat ovara, mo il dek asiga atma hekbaliga.

³³ It ap andi, enendawi Ala ovaga vanggabaluk avyarat umbutugwa vaga, it ap ininis ombok enavema biselagwima sovalogo bugwis, sek ogarit lagu dugwit, atma nggedok ogagu dogopwak yiluk, hologo bugwis, Ala en avok yugeragagi ako wane-wane-at wugwi, avakwa inirisagwi menda yangge do singga ako enelagap heda marogo bugwis,

³⁴ hali abya alonedok erek wisane ovara, nagalwogo bagwi, mbusiregowa vaga enarupwak yiluk ogagagwa ovara, wikbetaluk hoda wunggwis, it enanyedek ovara, enanye agwi, eke ndup sumbutu dugwit enanye akluk, ap ininis unggul adik menda enaori enayegen werek ako enamusek-enamusek erogo hairogo wibugwis, ogarit nagu lagagwa.

³⁵ It akwa nin enowa-enasin hambuguselok iniluk erogo wogorugwi, eke it nin andi, “Hivis mondok sek erogo niniluk okbininapwak yiluk, ninidi erogo hekbininabuk. Mondok neneres,” yuguselok, idup-mbidup erogo enatuselok hambugwi,

³⁶ it nin wiyiknom-weyaknom erogo bisiluk yawi initwis, mbusi heda vaga ininggis-inisok marogo mabiselagwima lembaga mabugwis,

³⁷ it nin helep vaga ndapwalogo initwis, it nin eneyave nggege vaga agako mbalogo bugwis, it nin segowa vaga initwis, nin enasum mondok dek halok, ndomba-kambin agamut bonggalogo enasum yikhidugwi, it nin enangge-enangge degen ugun nagwis, it ninen anggin enovaga bugu dugwit, anggin-mbanggin erogo bugwis, ogagu lagagwa.

³⁸ It avakwa ako mondok sek atma, o weyak wen vaga yoma nagu dogop dek hegek ovara, o harumu avakwa dekma inim, ndom vaga inim, sak yagan nagu dugwit, wimu inim, nggilin elola inim, ugun nogo yilin nagu lagagwa.

^39-40 It avakwa andi ovok erogo enendawi Ala ovaga vanggabaluk, avyarat umbutu dugwit, ogarit nagu lagagwa vaga Ala en, “Ap yi segat,” inimbita lagagi ovara, At Ala en nit ao ninigik it enendak sek okbisaup embetetek. Ata, ndatak sek okbininaup segat imbitigi atma, wene avok yugirigya lagagi ako, okbigitek hegek, hambugu lagagwa.