Iberani 10 - ALA WENE HIVIS DIRUP WATUGWA

Keretus nenake ndugwis ambiat hombagagi wene

¹ Wene Musa yugogogi ogarit lagu lagagwa ako vaga, eyave sek okbininaup ako ogagu lagagwabuk. Ata, eyave hivis sek okbininaup wene ao ari wagetek hegek, un agut wakhegek-at ogagu lagagwa. It anderogo ogagu dugwit, yi tahun ndi tahun sapi-kambin ako menda warogo Ala wogigik ogagu lagagwa ovara, andi vaga it wogori wagu lagagwa ako enendawi sek okbugu lagetek.

² It wogori wagu lagagwa ako vaga sek okbugu duklipmu en, “Nit weyak ogagyo,” yiluk, enendawi anggin dugwit, wenggelek agarwik ako, dek aklip atma, hivis ambi inim warogo wogori wagek ogagu duklipuk.

^3-4 Sapi-kambin amuya andi vaga it avakwa weyak ogasagwi menda ako degerogo baup meyan. Halok, yi tahun ndi tahun sapi-kambin wolok Ala wogori wagek adigat ogagu lagagwa andi vaga, avakwa weyak ogagu lagagwa menda andi, enape wenggenggu lagagwa.

⁵ Anderogo atma, Keretus wen vaga wambu warigiluk, At Asin Ala yugugu dugwit: “Hat hake warogo wokhisagwi inim, yi menda ndi menda Hat hake belagwi inim, Hat hanggon imbita dugwit, An neyave avakwa eneyave ovagak ogarogo baninggigin o.

⁶ Hake warogo hali hunisagwi inim, enomaduk dek arupwak yiluk, hake warogo wokhisagwi inim, Hat henendawi sek ombasigadek heyagya lagirik,

⁷ Anen, ‘Ai, Nasin Ala o. An ogarup nimbitigin mbuku virik-verek vaga dirup warek agarik ako, An neyave enat ogari wambigiluk, agirik o,’” yiluk, yugogogi.

⁸ Wene endak winimen ako Keretus en Ala yugugu dugwit, “Yi menda ndi menda Hat hake bagwi, hake warogo wokhugwis, sapi-kambin warogo hali hunggwis, avakwa enomaduk degerogo bisanogen yiluk, warogo wokhiri wagwi, ogasagwi andi menda ovok erogo andi, Hat Ala hendawi sek ombasigadek hanggon imbita heyagek ogasagwi o,” yiluk, yugogogi ako andi, it Ala ake belagwi ako wene Musa yugogogi ako ndatak-at ogasagwi ovara hegek, Keretus en wene anderogo Ala yugogogi.

⁹ Yugugu lagagirik, andien, “An ogarup nimbitigin ako, An neyave vaga-at ogarup, yiluk agirik o,” yiluk, yugogogi. Yugogogi andi vaga, it endak ogagu lagagwa ako, degerogo baluk, avoloma adik hivis ambi ogagu dogopwak yiluk, okbagagi helagwi.

¹⁰ Yesus Keretus akoen At Ala ogarup endawi imbitigi ako wane-wane-at ogagya dugwit, nenavoloma hambigiluk, At eyave ndugwis ambiat Ala wogogogi andi vaga, weyak ogasagwi mondok degerogo baluk, segerogo bininggu lagagirik, neneyave Ala ake enogo bininggigi.

¹¹ It ap imam-imam ako ovok erogo hutun-howam ndugurek-ndagarek avakwa enake ogagu dugwit, sapi-kambin ako menda adigat warogo Ala wogugu lagagwa ovara, enomaduk dek agetek itok-at welagagi.

¹² Anderogo ovara, At ap imam Keretus andi, nit ovok nenomaduk mondok degerogo bagiluk, “Enavoloma hambisogon o,” yiluk, At eyave ndugwis ambiat nggatuk erogo Ala wogugu lagagirik, Ala inggis amotkan hora yi inggya lagagirik, mondok-mondok agarik.

¹³ Andoma dugwit, Ala en At inim ndup ogorek menda avema sovabisapwak yiluk, abyam agarik.

¹⁴ Ala en aburi At ake enogo betaup imbitigi ako, it enomaduk eve degerogo baluk, mondok segerogo dogopwak yiluk, nenake hambigya dugwit, At eyave ndugwis ambiat nggatuk erogo Ala wogogogi.

¹⁵ At Ala Averiniki en, wene andi avok sigam vagalogo yuknirigya dugwit, yerogo yagagi:

¹⁶ “Andi hudi ovogat ari wagya halok, An Enasin Ala en wene swi menda nggatuk erogo yugeraup ako yi aro: ‘Anen ogagu dogop wene enendawima mabugu, it enape wenggelek dogopwak yiluk enendawima dirup ovagak warogo bagya, ogarisogon o,”

¹⁷ yiluk, iri lagagirik, andien, ambi iri dugwit: “It weyak ogarit nagwis, Ala wene sovalogo bagwi, ogasagwi ako, An nape wenggelek dogosogombuk, enomaduk ninggut erogo bisayogon o,” yiluk, yagagi ako dirup warek helagwi.

¹⁸ Anderogo atma, Ala wene sovalogo baluk, weyak ogagu lagagup ako, Ala en vage nenomaduk degerogo bagagirikmu, nit weyak ogasagwi menda ambi inim degerogo bininapwak yiluk, hivis wam warogo Ala wogirup degat helagwi.

Nit Ala adema horok-horok ari wagu dogop wene

¹⁹ Anderogo atma, naswei-narupwi. At Yesus amuya winggigi ako vaga, nit Moga Adigat Agarikmu andoma nenalon dek dugwit nunggup segat.

²⁰ Nit anderogo nunggup andi, o kamar ilim yum sivinik agarik ako, At eyave ovagak atma, nit avakwa niniluk okninipigirikmu nungguguluk, sup swi menda At Yesus eyave hombagagi andi vaga, sup yagago bininggigi.

²¹ Nit Ala aburi nenake ogagya dogopwak yiluk, ap imam ombok o Ala awi valekma mbogot vaga vagago agarik.

²² At eyave andoma agarik atma, “Nit weyak ogagyo,” yiluk, nenendawi anggin dugwit nenape wenggelisagwi menda degerogo hotbininggu, nit neneyave is eve mudi-mudis vaga nggomo watbininggu, ogagagi atma, nenendawi yunggup yegetek avyarat umbutu dugwit, nenendawi mondok enggen vaga At adema horok ari nunggusogom.

²³ Aren, “Anderogo bigigayogon o,” yiluk, avok yukneragagi ako, des erogo ogasiga atma, nit okbininaup wene nenape wenggelek agurik avakwa sigam erogo yugerelagwi ako, mondok nggitik-nggetok erogo vagago dogosogom.

²⁴ Eke, nendawi-hendawi hunik ogagwi, yonggat-yonggat ogagwi, ogagu dugwit, at ambi en at ambi amorerogo higilogo arilagek ogagu dogoguluk, dibagu dogosogom.

²⁵ It avakwa nin nit Ala wene yugusim ninim homasagwidek ako hak hit anderogo dogobuk. Ata, nenendawi aik war-wat yagalagwi andi, “Yesus warup vage horok ari wagya higi,” umbutu dugwit, nenendawi angge wurogo ambi inim ogagu dogosogom.

²⁶ Avyarat wene Ala avok wogogup ninilup dugwit ovara, hegek, weyak ogarup nenendawi wenggebaluk ogarit adigat lagu niniselok, nenomaduk degerogo bininapwak yiluk, nit nenangge ambi Ala wogirup mondok dek.

²⁷ Ata, “Ala en nenowak dilogo baluk, aninis nenovaga bininggu dugwit, hali abyama At inim ndup agarwik eneyave vup erogo bisaup ako, nit ninimat degerogo bininayogon higi,” yiluk, nenalon umbutu dogosogom.

²⁸ Ap ambi Musa wene ako anggon imbita dugwit sovalogo bagya halok, ap mberen a, henggam a, iren, “Avyarat anderogo ogaga,” yuguselok, hambupwak yiluk, abwa embetetek mondok warogo bagu lagagwa akora?

²⁹ Anderogo ogagu lagagwa hak, wene Ala en nenomaduk degerogo bininiluk, At ake enek dogoguluk, amuya vaga hotbininggigi wene nggatuk erogo yukneragagi ako, it avakwa en, “Wene andi eyave dek o,” yiluk, Ala Abut inisok handyan sopalogo bagwi, eke, At Averiniki endawi hunik en sek okbininaliga ako inim wiyiknom-weyaknom erogo bagwi, ogaguselok, At Ala en hekbisayogon ombasagwi? Mondok dek. At weyak onggo mondok iya erogo enovaga horakbisayogon.

³⁰ “Ap inunggumu wasagwi inim, weyak onggo okbiselagwi inim, Anenat okbugu dogosogon o,” yiluk, yagagi ako atma, eke, ambi, “An Enasin en naburi enowak dilogo weyak onggo enovaga bisayogon,” yiluk, yagagi ako ogo, saen yagagi? Ala enat yagagi ninilup aro.

³¹ At iluk agarik Ala akoen it weyak ogasagwi onggo enape wenggelekdekma enovaga horakbayogon ako andi, mondok alonedok erek enamup-enamup okbugu hasogom.

³² Hit endak Sek Wene swiat wugu lagagupmu, henendawima awiya okhinipigirikmu, anggin-mbanggin iya erogo henovaga bagusigik, wadokdek dugwit, wugu lagagup ako, henape wenggenggu dogones.

³³ Mondok eve iya erogo okbigigu dugwit, hit nin ombokma en hininis wiyiknom-weyaknom erogo weyak okbigigwis, eke, it nin inituselok, henalon embetetek inidi yugu lagagupmu, hinimat hinitwis, ogagu lagagwa ako.

³⁴ Henaswemuni it nin heda mago welagagwa ako, yagan watusigik, hinimat yagan watwis, eke, henangge-henangge amorero nunggugusigik, “Nangge eve mondok dogop menda adik hunogoma agarik atma, segat hedagao,” yiluk, henendawi sek umbutwi, ogagu lagagup.

³⁵ Anderogo atma, yogak hit henatusigik, wene avyarat umbutu dugwit wogogup ako, wadokdek dugwit vagago hiniselok, onggo ombok wokherayogon atma, hekbaup moga.

^36-38 Ala wene vaga dirup ambi yerogo warek agarik: “At warup ako andi, aburuk erogo dukluk warisogonbuk. At mbikirat warisogon atma, it An naburi enendawi eve sek adigat akoen enendawi novaga vanggabaluk avyarat numbutuselok andi, iniluk-at dogosogom o. Eke, it avyarat nombasagwi ako hekbanungguselok andi, An sek enombarisogonbuk,” yiluk, dirup warek agarik atma, Ala en hit ogagu dogop hinimbitigi ako, mondok ogagu hiniselok, wokheraup yagagi ako wokherapwak yiluk, weyak okhinipusigik ovara, henendawi wadokdek dugwit, wugu dogones.

³⁹ It ap wene avyarat umbutu lagagwarik wogogwa ako, hekbaguselok, Ala en eneyave degerogo bisayogon ako menda nit dek o. Ata, it avyarat umbutuselok, mondok-mondok iniluk dogop ako menda nit agurik.