Iberani 1 - ALA WENE HIVIS DIRUP WATUGWA

¹ O muk erogo Ala imbita lagagi wene ako nenombawi inilup arupwak yiluk, Ala en yugirigya hegek yugerelagwi menda it navi-navi ako, at ambi yugigik, ambi yugigik, wisane erogo yugirigya hegek, iren nenombawi yugurugu lagagwa.

² Ovara, o yogak atok vaga yi andi, nenanggelekma dugwit, Asin Ala ane yuknirigya dogopwak yiluk, Abut adigat lakba wagagi. “Nabut adigat yi menda ndi menda andok dogopwak o,” yiluk, mondok okbagya lagagirik, Asin en, “Yerogo ogarup, nderogo ogarup,” yugugu hegek, Abut akoen wen-mbogot yi menda ndi menda ovok erogo ogagagi.

³ Asin mondok winimen siyalek eyave abinak amumulip wisane ako hak, Abut wane-wane-at agarik. Abut ako andi, Asin ovavut wane-wane-at agarik. Yi menda ndi menda ogagagi ako ovok erogo, At ane anye vaga vagago agarik. Nit weyak ogagu lagagup ako menda horogo dek okbagya lagagirik, At winimen mbogot vaga mondok siyalek agarik ako, inggis amotkan hora yi inggya lagagirik, agarik.

Malaikat sovalek inigik Abut siyalek agarik wene

⁴ Anderogo atma, At Ala en, “Nabut o,” inis yugugu lagagi ako andi, malaikat ambi yugeregetekma, it malaikat menda sovalek ovagak inigik, At Abut mondok winimen siyalek aro.

⁵ Andi, At Ala en malaikat menda ambi yugugu dugwit: “Hat An Nabut, eke yogak An Hat Hasin agi o,” yiluk, anderogo yugigitek. Eke, ambi iri dugwit: “An andi, At Asin agya, eke, At andi, An Nabut agya, ogarusogom o,” yiluk, andi ogo malaikat ambi mondok yugigitek.

⁶ Ata, Ala en At Abut adik ambingga ako, o wen vaga yoma wombaba warigiluk, ogagya dugwit, “Hit An nayonggo nelagwi menda malaikat ovok erogo At adigat inis adup ogagu dogones o,” yiluk yugeragagi.

⁷ Eke, andien, it malaikat ogasagwi ako enavok mbilinggu dugwit: “It An nayonggo nelagwi menda malaikat ako, o havut ovagak ogarogo bugu, eke, it An nayeloman menda akoma, hali abya ovagak ogarogo bugu, ogasiga o,” yiluk, mbilinggigi ovara,

⁸ At Ala en At Abut ogagya dogop awene ambi iri dugwit: “Ai, Ala wa. Hat hane yugeraligama andi, mondok-mondok itok-at dogosogon o. It havema agarwik ako enawene amburup mbalogo mondok sek adigat yugirigya dogosogon o.

⁹ It sek ogaguselok andi, hendawi hunik oginipu, eke, weyak ogaguselok andi, hanggon adigat inimbita, ogasiga menda atma, At Ala andi, Hat Hasin Ala atma, endawi adenggen himbita dugwit, amburup hovaga ndilogo bagagagi vaga haswei wenamen sovalek inigik, enandugunmu winimen siyabagagagi o,” yiluk, yugogogi.

¹⁰ Yugugu lagagirik, wene adik ambi iri dugwit: “Hat Hinis Ombok atma, o muk endak erogo wen yi adem horakbagya, Hat hinggis vaga mbogot ogarogo bagya, ogagagin o.

¹¹ Mbogot inim, wen inim ovok erogo ogagagin andi, yum hivitlandiga hak hivis dek arisogon ovara, Hat andi, hitok mondok-at dogosogon o.

¹² Yum bayu hivitlagya halok, dinggi-vanggis erogo beyak helok, avoloma adik swi hunogo yikhedelagwi hak, wen-mbogot yi, anderogoat ogarisogon ovara, Hat andi, adik hunogo asigadek, hitok agindik, endak welagagin hudien, dek agetek mondok hitok-at agindik o,” yiluk, Abut yugogogi.

¹³ Eke, “It hinim ndup ogorek menda ako, sovalogo havema bigitek neyagek, An ninggis amotkan hora yima,” yiluk, yugogogi ako andi, it malaikat en ogarupwak yiluk yugeregetek. Ata, Abut en ogarupwak yiluk, yugogogi.

¹⁴ Eke, it malaikat andi nggarogo ogasagwi menda ombasagwi? Dek o. It ako avakwa enanggela ninil iniselagudek ako ovagak dugwit, Ala eyavup ogasagwi atma, Ala en avakwa enagap wendaginivup yiluk, enogo bogogi ako, yonggar-inivupwak yiluk, yonggo lakbisa wandiga menda it aro.