Evesus 6 - ALA WENE HIVIS DIRUP WATUGWA

Enasini-inisai inim, enaburi-eneyagi inim, ogagu dogop wene

¹ Avivak-hwiyavivak yoma wai. Hit Ala aburi atma, hinisai-henasini enane yukhiruguselok, hobaluk ogagu dogop ako andi, Ala enat imbitigirikmu, des erogo ogagu dogones.

² Ala en wene, “Yerogo ogarup, nderogo ogarup,” wene ako iri dugwit, “Hivis sek okbisayogon,” yiluk, endak avok ambi inim yegetek. Ata, “Hinisa-henasin enagayuk wutu dugwit, enane des erogo hunggu dogones,” yiluk, yagagi andi endak adigat, wene avok inim yugirigya dugwit,

³ “Anderogo ogagu hiniselok, heneyave segat dugwit, henanggok akluk, hambugu dogogup o,” yiluk, wene avok anderogo yugeragagi.

⁴ Hit ap henaburi werek halok, enaninis arupwak yiluk, okbisabuk. Ata, Ala wene musek lagu dogopwak yiluk, mbilape vaga enaruk watwis, Ala wene yugurugwi, ogagu dugwit, sawe oginipu dogones.

Enayeloman onggo hunik menda enasini inim ogagu dogop wene

⁵ Hit avakwa enayeloman onggo hunik menda yi wai. Hiren, “Nasin yi, Keretus ovagak atma,” yiluk, henalon vaga enagayuk wutu dugwit, henendawi sek sagain vaga enane hobaluk, eneyavup ogagu dogones.

⁶ Ogarit lagu dugwit, enendawi sek henombarupwak yiluk, inil inigik adigat ogagu dogobuk. Ata, “An Keretus ayeloman atma, Ala endawi ombasiga akoat, ogarisogon o,” yiluk, henendawi sek sagain vaga okbigik nagu dogones.

^7-8 Avakwa enayeloman onggo hunik menda inim, avakwa un ugun agarwik menda inim, ovok erogo sek ogarit lagu niniselok, Nenasin en onggo wane-wane-at woknerayogon ninilup atma, “Yi avakwa eneyavup ogasigadek. Ata, Nenowa eyavup-at ogasiga o,” yiluk, henanggon embetetek henendawi adenggen vaga ogarit lagu dogones.

⁹ Eke, hit enasini yoma wai. Hit henayeloman onggo hunik menda ambi werek halok, “Nit Nenasin ambiat mbogot vaga agarik akoen nenayeloman menda inim, enasini nit ninim, nenelose dibininiluk woknerayogonbuk, ata ogasagwi onggo wane-wane woknerayogon,” hinilup atma, henane anye vaga yugerabuk. Ata, it henayeloman en enendawi sek sagain vaga okbigigu dogop yugirigi ako wane-wane, hit anderogoat henendawi sagain vaga henayelomani sek okbugu dogones.

Ala andup-ameda wambuk nggerabaluk dogop wene

¹⁰ Wene ovok erogo yukhirigi atma, hivis atok vaga ambi yi yukherayogon o. Henowa anye wisane ako vaga hinisok severek dugwit, henendawi wadokdek dogones.

¹¹ Sile en endawi wenggebaluk, henambukmu inggya haoen, haryogo wibagu dogovovok yiluk, Ala en At andup-ameda valogo wokheragagi ako, vagago dogones.

¹² Ndup ninim sumbutu dugwit, yidilhedelagwi ako andi, nit ap wen vaga menda ninim sumburisagwidek. Ata, it enagayuk werek o ilim yoma nagu dugwit, avakwa wen vaga yoma enendawi o hup ovagak agarwik ako, weyak ogarupwak yiluk, enendawi nomalinivisagwi menda inim, Sile aori yi madis ndi madis inim, ovok erogo ninim ndup sumbutu dugwit, yidilhedelagwi.

¹³ Anderogo atma, it weyak okhinivi waguselok, haryogo wibugu dugwit, henendawi wadokdek atok vaga henayegen mondok anye dogopwak yiluk, Ala andup-ameda wokneraliga ako vagago dogones.

¹⁴ Hinisok severek dugwit wadokdek dogoguluk, henombolanis nggetok erogo yikhedelagwi hak, avyarat wene Ala avok henendawima nggetok erogo hidugwi, henagap vaga sin yikhedelagwi hak, Ala andogon sek menda ako yikhidugwi,

¹⁵ sepatu abet menda yikhedelok lendagwi hak, Ala ninim dambubininaup Sek Wene ako vipuk okbaluk lagwi,

¹⁶ at weyak adigat ogasiga akoen andup-ameda hali abya ovagak yamburi wandiga ako, mbeyalogo lakbagu dogovovok yiluk, sin ininggimu vakhedogo agarwik hak, avyarat umbutu dugwit, henendawi Ala ovaga vanggabagwi,

¹⁷ hinunggulagasum modo menda danggulhedelagwi hak, henagap wendarup wene henape wenggelogo hidugwi, mbusinggarep vagago agarwik hak, Averiniki en Ala wene wokneragagi ako vakhidugwi, Ala andup-ameda wokneraliga ako menda vagago dogones.

¹⁸ Hit yi menda ndi menda ogagu dugwit, Ala en yonggat-hinavupwak yiluk, Averiniki en yukhirigya hegek, mbup yegetek Ala nggino yugugwis, samban ogagwi, ogagu dogones. Samban ogagu dugwit, henendawi alep mbabetaluk, hekbagatek ndugurek-ndagarek it Ala aburi ake denek ovok erogo enake samban ogagu dogones.

^19-20 Eke an ogo, Sek Wene mbauk hwilago welagagi ako, yugeregek nagu dogogiluk, Ala enat denogo mondok okbaninggigi hegek heda magogo mabanunggugwa yoma dugwit, nalon en nanedek mbuverek dogop andi dek. Ata, Sek Wene ako yugeragiluk, ogagya neyagek, Ala en, “Anderogo yugeran o,” yiluk, yuknugu halok, nalon embetetek nane seyorogo vagalogo yugirigya dogogiluk, it Ala aburi ovok erogo enake samban ogagu dugwit, an ogo nake samban ogagu dogones o.

Atok vaga hai wakbogogi wene

²¹ At nenaswe nenendawi hunik Nenowa Inis Ombok eyavup des erogo ogasiga Tikikus akoen, an neyave nggarogo dugwit, ogasiga wene ako, ovok erogo hinilup arovovok yiluk, yukhera wasogon.

²² Hinilup okbigigapwak yiluk, henadema lakba wasogon wagya dogomindik, nit ovok neneyave nggarogo agurik ako, mbilinogo yukhirigya, eke, henendawi aik wakbugugu, okbigigagiluk warisogon.

²³ Hit nenaswei Ala aburi ovok erogo henendawi sek ugun ambiat dambunggwis, nabwa-habwa umbutwi, avyarat umbutwi, ogagu dogovovok yiluk, Nenasin Ala Nenowa Inis Ombok Yesus Keretus iperenen okbugugu dogopwak o.

²⁴ Nenowa Inis Ombok Yesus Keretus hit henendawi hunik ogasagwi ako, dek agetek mondok hunik hiniselok, henabwa imbita dugwit, hinimat dogosogon o. An Paulus en wene andiat yukhirigi o. Naswei wa!