Evesus 5 - ALA WENE HIVIS DIRUP WATUGWA

Ala aburi o awiya vaga dogop wene

¹ Naswei o. Hit Ala aburi henabwa ombasiga atma, At ogasiga hak, hit ogo ndatak ogarit lagu dogones.

² Ala ake warogo hali hungguselok, Ala en amben sek haliga hak, At Keretus nenabwa en, “Enake hambisogon o” imbita lagagirik, nenake hombagagi ako wane-wane, nabwa-habwa umbutu dugwit, at ambien at ambi sek okbagek ogagu dogones.

³ Hit Ala aburi ake denek-at hinigik, akwa ugun oginivit nagwis, wanggis wugwi, hogop adigat umbutwi, ogarit lagu hiniselok, it avakwa ninen, “Ala aburi-at ovara, weyak ogasagwi yi isenes,” yiluk, hinumbutu saoen, dibaluk ogagu dogones.

⁴ Akwa enavok adigat yagan nagwis, enendawi dek en wene ugun-ugun yagan nagwis, enendawi akwa vaga adigat wenggelek dugwit, enane agil-amok yagan nagwis, ogasagwi andi menda ovok erogo yubuk hegek yagan nelagwi atma, hit Ala aburi halok anderogo yup mondok moga. Ata, Ala, “Wa!” adigat yugugu dogones.

⁵ It akwa ugun oginivit lendagwi inim, wanggis welagwi inim, eke, hogop adigat ombasagwi inim, it ap ogasagwi andi ovok erogo Ala Keretus iperen enavema biselagwima nunggusogombuk, umbutu dogones. Hogop adigat ombasagwi ako andi, ap huvuwak inis adup ogasagwi ndatak-at.

⁶ It Ala wene sagabaluk, weyak andi menda ogarit lendagwi halok, Ala aninis enovaga bisaliga atma, it ugun inunggut agarwik akoen enane amburup werek agil-amok yagan wagu dugwit, henambukmu unggu saoen, dibagu dogwes.

⁷ It ap anderogo yagalagwi menda ako andi, hinim hunik okhedabuk.

⁸ Hit endak o hwiserekma welagagup ovara, yogak Henowa Inis Ombok en ovok awiya erogo bigigirikmu, Ala aburi awiya vaga dugwit, ogasagwi hak, hit anderogoat ogarit lagu dogones.

⁹ It o awiya vaga dugwit ogarit lendagwi enggen yugup ako andi, avakwa sek okbigik nagwis, weyak ogagetek Ala ombasiga ako wane-wane ogarit nagwis, enane avyarat halok adigat yagan nagwis, ogasagwi.

¹⁰ Anderogo ogasagwi atma, hiren, “An ogasiga yi, Ala endawi ombasiga wane-wane-at ogasiga a?” yiluk, yenaga wokhidugu dugwit, anderogoat ogarit nagu dogones.

^11-12 It ap o hwiserekma dugwit, sek ambi okhedaup dek hegek ogarit lendagwi ako, hinim dambulik dugwit ogarit labuk. Ata, it mbauk hwilagago ogasagwi ako enavok yup henanggadi hegek ovara, selekma-at enanggadi wakbugu dogones.

¹³ Hali abya yivituselok, yi menda ndi menda o hwiserekma agarik ako sigam helagwi hak, it ap mbauk hwilagoma weyak ogasagwi ako, selekma enanggadi wakbuguselok, “Ap yi enandogon anderogoat iniselagwi o,” yiluk, sigam helagwi.

¹⁴ Andi, nit yagalagwi menda ambi, yerogo yagalagwi: “Avyak wai. Hit nogo yilagwi ako hiniluk ares. Hiniluk akluk, it avakwa nggorak agarwik ako, enanggelekma en wulu wagu hiniselok, Keretus en awiya okhinivisogon o,” yiluk, anderogo yagalagwi.

¹⁵ Anderogo atma, hit ogarit lendagwi ako, mondok dibaluk ogarit lagu dogones. Hit henendawi dek ovagak ugun-ugun ogarit lagu dogobuk. Ata, henendawi mondok werek dugwit, ogarit lagu dogones.

¹⁶ O yogak yi vaga avakwa en weyak mondok iya erogo ogarit laguluk ombasagwi atma, “O yogak sek ogarup ambi yi, nanonggal agarikmu, ogarusogom o,” umbutu dugwit, ogarit lagu dogones.

¹⁷ Henendawi apik dugwit ugunat ogarit lagu dogobuk. Ata, Nenowa en ogarup ombasiga ako adigat dibaluk, ogarit lagu dogones.

¹⁸ Eke, anggur agas nunggu dogomundik, nenek yagan lasogom vaga weyak okhedaup atma, hekbaluk, Ala Averiniki adigat henendawima hobo-hobo erek dugwit ogagu dogones.

¹⁹ Eke, hikirat henendawi mondok adenggen vaga Nenasin inis adup ogagu dugwit, Daut ndawi bagagi ako inim, hiwene ndawi inim, Ala ogasiga ndawi inim, ovok erogo watu dogones.

²⁰ Watu dugwit, yi menda ndi menda ovok erogo okbininaliga ako vaga Nenowa Yesus Keretus inis vaga, “Nenasin Ala wa,” yiluk, hai watu dogones o.

Ap enogwai inim dugwit ogagu dogop wene

²¹ Nenowa Keretus agayuk wutu dugwit, henendawi seve yiluk navema-havema dogones.

²² Hit akwa yoma. Hit henaguni werek halok, Nenowa Yesus avema seve yiluk, agipik hak, henaguni enavema seve yiluk, dogones.

²³ At Keretus en nit Ala aburi yi awi ndi awi agurik ako, nenagap wendarogo At eyave vaga ambiat dogoguluk hunogo bininggigirikmu, ninunggul hak Keretus agarik ako ndatak, hit akwa hinunggul hak andi, henaguni aro.

²⁴ Eke, Ala aburi yi awi ndi awi agurik ako andi, Keretus avema dugwit, ane hulisagwi ako hak, hit akwa anderogoat henaguni enavema dugwit, it enane adigat hunggu dogones.

²⁵ Eke, hit ap yoma. Hit henogwai werek halok, Keretus en nit Ala aburi yi awi ndi awi agurik ako, nenabwa imbita dugwit, “Enake hambisogon o,” yiluk, nenake hombagagi ako hak, hit henogwai anderogoat enabwa inumbutu dugwit, enake ogagu dogones.

^26-27 Keretus en nit Ala aburi yi awi ndi awi agurik nenake hombagagi ako andi, nit Ala aburi ovok erogo neneyave vaga omap dek, nenagap iso yegetek, ata neneyave mondok sek dugwit, wene ambi nenovaga agetek, sek adik denek dogoguluk, neneyave ima wombabinunggusim, At ane ako vaga hurogo bininiluk At ake sek adik denek hedagiluk, At eyave-at hombagagi.

²⁸ Andi wane-wane hit ap heneyave henendawi hunik okhedelagwi ako hak, henogwai anderogoat henendawi hunik oginipu dogones. Ap ambi ogwa endawi hunik okhidigya halok andi, at eyave-at endawi hunik okhedaliga o.

^29-30 Eke, Keretus inggis-isok hak niratma, Keretus en At aburi yi awi ndi awi agurik ako, endawi hunik okninipu dugwit, des erogo vaknenombogo agarik hak, nit ap neneyave andi, nenanggon ombasagwidek. Ata, nenendawi-neneyave hunik okhidugu dugwit, sek erogo okhedelagwi ako hak, hit heneyave venak ako andi, henogwai atma, henendawi hunik oginipu dugwit, des erogoat vagenombogo dogones.

³¹ “Andi halok, ap en isa-asin hekbisiluk, ogwa iperen eneyave ambiat akluk, eneyave mberen ovara, ambiat arusogom o.”

³² Ala en wene yagagi ako andi, wene adem eve hwilago-at yagagi imbita dugwit, Keretus aburi yi awi ndi awi agurik ako ninim nggarogonggan ambiat hunik dogop wakhegek yukheraliga ovara, andi adigat yukheraligadek.

³³ Ata, hit ap heneyave henendawi hunik okhedelagwi hak, hit henadigetap henogwai henendawi hunik okhinupwis, eke, hit akwa ogo henaguni enagayuk wutwis, ogagu dogovovok yiluk, inimat yukheraliga o.