Evesus 4 - ALA WENE HIVIS DIRUP WATUGWA

Ala aburi neneyave ambiat hubininggigi wene

¹ Andi halok, naswei o. An Nenowa ane wolok yugeregek naliga vaga heda maknitugwa akoen, wene yi hit ogagu dogovovok yiluk, henaruk wasiga. Ala en hit ogagu dogop heneyanggup yukheragagi ako, ndatak-at ogagu dogones.

² Ogarit lagu dugwit, henendawi seve yiluk sagain vaga okbugwis, henovavut luvugerek dugwit nabwa-habwa vaga nengge-hengge ogagwi, ogagu dogones.

³ Averiniki en henendawi ambiat dambulogo bogogogi ako hinim ogot hidugu hinisaoen, dibaluk dugwit, okhidugu dogones.

⁴ Henape wenggelek agipik ambiat hedavovok yiluk, heneyanggup yukheragagi ako wane-wane, hit heneyave ogo ambiat. Eke Ala Averiniki eyave ogo ambiat wogogup.

⁵ Nit Nenowa Inis Ombok ako eyave ambiat. Nenendawi avyarat ombasagwi wene ogo ambiat. Eke, ima wombabininelagwi ako ogo ambiat.

⁶ Nit avakwa ovok Nenasin andi, At Ala ambiat agarik. At adigat eve iya Inis Ombok winimen hegek, yi menda ndi menda ovok erogo At avema agarwik. Nit ovok erogo en yi menda ndi menda ogasagwi andi, eve Arenat abi amorerogo okbininggu hegek ogasagwi. Eke nit ovok erogo nenendawima agarik. Eke nit ovok erogo ninim agurik.

⁷ Anderogo ovara, At Keretus en nit At eyavup ogagu dogoguluk, Aren, “At andi menda ogagya dogopwak,” imbitigi ako, endawi hunik en nenadigetap andok okbininggigi.

⁸ Andi, Ala wene dirup warek vaga ambi iri dugwit: “At winimen o eloma erogo inggya dugwit, it avakwa heda mago agarwik ako, wisane erogo wogonombolok inggya lagagirik, At angge onggodek unat wogeragagi o,” yiluk, yagagi ako wane-wane, nenadigetap andok okbininggigi.

⁹ Eke, “At inggigi,” yagagi ako andi, nggarogo yiluk yagagi embetep? Dek o. At wen elola wambigya lagagirik, daga wagagi ako halok, yagagi akora?

¹⁰ Eke, At wambigya lagagirik, daga wagagi ako andi, yi awi ndi awi ovok erogo At eyave mondok anye werek dogopwak yiluk, At eyave mbogot winimen erogo inggigi.

¹¹ At nenadigetap andok okbininggigi ako, it nin lakbigik menda dogopwak yiluk andok okbugu, nin andi navi Ala ane yugurugu dogopwak yiluk andok okbugu, nin andi Sek Wene yi awi ndi awi hunogoma yugeregek nagu dogopwak yiluk andok okbugu, nin andi o ambekma Ala aburi des erogo vagenombogo dugwit, Ala wene yugurugu dogopwak yiluk andok okbugu, ogagagi.

¹² Andi ogagagi ako, nit Ala eyavup des erogo ogarit lagu dugwit, nit neneyave vaga Keretus eyave mondok wigalarupwak yiluk, nit Ala aburi ovok erogo mondok dikduk okbininggigi.

¹³ Andi okbininggigi ako, nit ovok erogo Ala Abut ovavut ako ninilup agu dogomundik, avyarat ombasagwi vaga nenendawi ambiat akluk, Keretus endawi mondok hoda sek adigat agarik ako hak, nit anderogoat nenendawi hoda okbininggu dogopwak yiluk, andok okbininggigi.

¹⁴ Anderogo atma, naswei. Is navunak-kavunak ogagya dugwit, ilumukmut angge legogo ilikbagya, o havut en wolok lagek-wagek iris, ogasiga hak, avyak-mariduk andi, anderogoat agarwik atma, hit ogo anderogo dugwit, it avakwa huluk wene yagalagwi menda akoen avakwa enambukmu dagaluguluk, enendawi wenggebaluk, enane amburup agil-amok vaga nomalenavuguluk yagalagwi andi menda hit ugun henaruk hulup moga. Ata, Keretus endawi mondok modo agarik hak, nit anderogoat nenendawi modo okbininggu halok, nit avyak mariduk agarwik andi wane-wane dogosogombuk.

¹⁵ Eke, nit avakwa nenendawi hunik en avyarat wene Ala avok ako adigat yugurugu dugwit, ninunggul hak Keretus endawi mondok eve hoda agarik ako hak, nit anderogoat nenendawi hoda okbininapwak yiluk, ogarit lagu dogosogom.

¹⁶ Nininggis-ninisok bagagi ovok erogo ogarup ake denek adik-adik agarik ovara, neneyave ambiat nenomanggen vaga yidilek dugwit, ogarit lagu niniselok, neneyave mondok segat agurik. Ako hak, nit Ala aburi ninunggul hak Keretus ninim anderogoat hunik atma, nabwa-habwa ogagu dugwit, nenadigetap ogarup andok okbininggigi ako ndatak ogarit lagu niniselok, Keretus eyave mondok sek adigat dugwit, nit neneyave vaga wigalarit lagya dogosogon.

Nenandogon swi menda ogagu dogop wene

¹⁷ Anderogo atma, naswei o. “It avakwa Ala inunggut menda en un enam warogo enendawi wenggebaluk, ogarit lendagwi hak, hit anderogo ogarubuk,” yiluk, Nenowa en yuknugu halok, an henaruk warisiga.

¹⁸ It enendawi anye dugwit, “Ala wene waup nenanggon o,” yiluk, yagalagwi vaga it enendawi o hwiserek ovagak dugwit, Ala inim ogorek agarwik atma, Ala en iniluk okbisaup wene ako, it mondok ininggurat agarwik.

¹⁹ It enalon embetetek avakwa oginivup adigat enape wenggelek dugwit, “Ugun-ugun ogarusogom o,” umbutu lagarwik, enendawi ninggya halok adenggen vaga ogarit lendagwi ovara,

²⁰ nit wene Keretus avok yukhirugu dugwit, andi menda ogagu dogop inim yukheregetek.

²¹ At ogagya lagagi ako yukhirugu ninigik, avyarat wene Yesus avok ako wane-wane yukhirugu lagagup ako, hit des erogo hunggu dugwit,

²² “Nenendawi ninggya halok musek lagu lagagup ako andi, weyak okbininaup hegek musek lagu lagagup higyo,” yiluk, henaruk hunggugup atma, henovavut endak menda ako, nggolalogo hekbaluk,

²³ henendawi inim, henape wenggelisagwi inim, swi okbigigapwak yiluk, Ala ane adigat musek lagu dogones.

²⁴ Ala weyak ogasigadek andogon eve mondok sek adigat agarik ako wane-wane, hit ogo ndatak henandogon mondok swi menda ogarogo bigigapwak yiluk, yukheraliga o.

²⁵ Anderogo atma naswei. Keretus ninim hunik inggis-isok hak niratma, hikirat huluk molalogo yagalagwi ako hekbaluk, hit ovok erogo wene avyarat halok adigat yugu dogones.

²⁶ Henaninis en weyak ogarup andi moga o. Eke, henaninis okhinipu hegek mo il huruk yi laup andi ogo moga.

²⁷ Sile en, “Nanonggal aga o,” yiluk, henendawi weyak okhinivi wagya haoen, weyak madugat henendawima hwilakbaluk dogobuk.

²⁸ Hit henonggop welagwi ako, ambi inim henonggop wugu dogobuk. Ata, hininggis vaga adigat okbetaluk nunggwi, it avakwa enangge-enangge dek iniselok yonggar-inipwis, ogagu dogovovok yiluk, yavup ambi ogarup-at vakbaluk, hininggis anye vaga okhedegek lagu dogones.

²⁹ Wene weyak menda henelagapma en wibaup andi moga. Ata, it hulisagwi akoen ogo, “Nenabwa en yuknirugu sugup o,” yupwak yiluk, anggin ambi enovaga agya halok, enendawi modo okbisaup wene adigat yugu dogones.

³⁰ Wam evenggom yedok hapwak yiluk aruk mbalogo belagwi hak, Ala en At aburi woginivi wagya dugwit, nit ninimat wokninivi warisogon ninilup dogoguluk, Averiniki wokneragagi. Anderogo atma, Ala Averiniki ako, endawi weyak ogarogo baup mondok moga.

³¹ Henaswei enendawi weyak okbugwis, naburuk-haburuk yugwi, naninis-haninis yugwi, wene watwis, wiyiknom-weyaknom erogo bugwis, weyak okbisaup henape wenggelisagwi ako menda ovok erogo hekbagu dogones.

³² Hekbaluk, hinim nabwa-habwa ogagu dugwit, henendawi sagain vaga at ambien at ambi sek okbagek ogagu dogones. Keretus ogagagi ako vaga Ala en hit henomaduk degerogo bagagi ako wane-wane, hikirat weyak okhedelagwi ako, hinunggut erogo hekbagu dogones.