Evesus 3 - ALA WENE HIVIS DIRUP WATUGWA

It weram Yakuri dek menda enagap wendarup agose mbauk hwilago welagagi wene

¹ Anderogo atma, an Paulus en, hit avakwa weram Yakuri dek menda Keretus Yesus wene yukhirigya lagagis ako vaga, heda magago mabiselagwima mabanunggugwarikmu yoma agirik.

² At Ala en endawi hunik oknitya dugwit, hit sek okbigigapwak yiluk, andok okbaninggigi ako andi, hit henaruk ovok hunggip ombasiga.

³ Wene agose mbauk hwilago welagagi menda an sigamat yuknogogi ako dirup horok dulat winimen watis andi,

⁴ hit bikhugu dogomundik, an Keretus agose wene nggarogonggan dibagagis ako hinilup arusogom.

⁵ Wene andi, it avakwa enendak endaklarit wulu wagu lagagwa ako, vagalogo yugeregetek-at welagagi ovara, yogak andi, Ala en At Averiniki lakba wagagi ako vaga en it ap Ala ake denek lakbigik ako menda inim, it avakwa Ala en yugirigya hegek yagalagwi navi-navi denek menda inim, ovok inilup okbogogi.

⁶ Ala agose mbauk hwilago welagagi ako andi yi: Sek Wene welagwi vaga it avakwa weram Yakuri dek menda inim, avakwa Iserali menda inim, Ala aburi ambiatma, Ala en sek okbininaup hologo bagagi ako wane-wane-at hedelagwi. Neneyave ambiat nin higirek hirat agipik. Eke, Ala en Keretus Yesus ogarisogon vaga nit okbininaup wene avok yukneragagi ako, hit ogo, wane-wane-at welagwi. Agose wene mbauk hwilago welagagi akoat yogak yiat sigam aga o.

⁷ At Ala anye mondok iya erogo okbaninggya dugwit, At ayeloman akluk Sek Wene Keretus avok ako yugirigya dogogiluk, endawi hunik en andok okbaninggigi.

⁸ It Ala aburi adik denek ako ovok erogo ininis werek inigik, an ninis dek sovalek-at neyagek ovara, Keretus elola en hegek-hegek okbinilin wulu wandiga wene ako, hit ap weram Yakuri dek menda yukheragiluk, endawi hunik en andok okbaninggigi.

⁹ Eke, At yi menda ndi menda bagagi Ala akoen, agose wene o muk erogo mbauk hwilakbaluk welagagi ako, nggarogonggan okbininaup hologo bagagi ako yi avakwa ndi avakwa ovok inilup okbugu dogogiluk, andok okbaninggigi.

¹⁰ Eke, agose wene hwilakbaluk welagagi ako andi, nit Ala aburi yi awi ndi awi homasagwi akoen, wene andi wokbaluk ogarit lendagwi vaga, it mbogot vaga agarwik malaikat inim, it enagayuk werek o ilim yenam agarwik menda inim, it ovok en, “Ala endawi mondok werek dugwit, yi wene ndi wene hologo yukneraliga akoat higyo,” yiluk, yogak inilup arupwak yiluk, hwilakbaluk welagagi.

¹¹ At Ala en ogagagi ako andi, Nenowa Inis Ombok Keretus Yesus en ogarupwak yiluk, o endak erogo hologo bagagi itok welagagi ako wane-wane-at ogagagi.

¹² Nit nenendawi Keretus ovaga vanggabaluk, avyarat umbutu lagagumu, At ninim hubininggigirikmu, nenalon dek nenendawi seyo dugwit, Ala adema horok-horok nunggugu dogop sek aro.

¹³ Anderogo atma naswei o. An Sek Wene Keretus avok yukhirigya lagagis ako vaga anggin-mbanggin novaga benanggarwikmu agirik yi vaga henalon en henendawi yunggur-wanot yegek ogarubuk. Anggin-mbanggin okbanilagwi yi ako andi, hit ambi okbigigapwak yiluk, okbanilagwi atma sek aro.

Paulus en it enake samban ogagagi wene

¹⁴ Anderogo atma, an Nasin Ala avema seve yiluk samban ogasiga.

¹⁵ It mbogot vaga menda inim, nit wen vaga menda inim, nininis unggul adik-adik ovok erogo Nenasin Ala en werek okbininggigi atma,

¹⁶ an samban ogagya dugwit, “Hat mondok winimen siyalek dugwit, Hat helola en hegek-hegek haburi okbisaliga ako wane-wane, Hat Haveriniki en okbugu hegek hanye vaga enendawi wadokdek modo okbugu dogwen o,” yiluk, henake samban ogasiga.

¹⁷ Hit avyarat ombasagwi atma, Keretus henendawima mondok awi valheda nunggu warupwak yiluk, henake samban ogasiga. Eke, yo omanggen wen mudis sek vaga yagoma wadokdek agarik hak, hit anderogoat henendawi wadokdek dugwit, avakwa hinim henendawi hunik okbugu dogovovok yiluk, henake samban ogasiga.

^18-19 O obak agarik inim, o adup agarik inim, o ilim aguruk erogo agarik inim, andi meset ogasagwi ovara, Keretus nenabwa ombasiga adem ako andi, wisane atma, meset ogarup meyanat agarik. Ovara, hegek, it Ala aburi ake denek hinim ovok erogo At nenabwa ombasiga ako ambukum dibagu hinigik, Ala ovavut agarik anderogo hit ndatak okbigigapwak yiluk, henake Ala yugisiga.

²⁰ Nit okbininapwak yiluk nggino yugisagwi ako adigat okbininaligadek, ata At anye okbininggu dugwit, nenendawi embetetek menda inim wisane erogo okbininaliga Ala ako,

²¹ nit At aburi yi awi ndi awi homasagwi ako ovok erogo, At Keretus Yesus ninim hunik dugwit, yogak inim, hivis inim, At mondok-mondok inis adup ogagu dogosogom o. Amin!