Evesus 2 - ALA WENE HIVIS DIRUP WATUGWA

Keretus en niniluk okbininggigi wene

¹ Hit endak Ala wene sovabaluk, yi weyak ndi weyak ogagu lagagup ako vaga, henendawi nggorak ovagak welagagup.

² O andi vaga, hit ap wen vaga menda enendawi ninggya halok ugun musek lendagwi ako hak ogarit nagu lagagup. Anderogo ogagu dugwit, it yi madis ndi madis mbogot avema o ilim yenam agarwik enasin inis ombok ako avakwa Ala wene weyak erogo baguselok enendawima mabisilin landiga menda akoen, yukhirigya halok, henaruk hobaluk ogarit lagu lagagup.

³ Endak nit ovok erogo enanggelekma dugwit it weyak ogasagwi ako wane-wane ogagu lagagup. Nit nenendawi endak menda en yuknirigya hegek nenendawi ninggya halok musek lagwi, weyak ogarup okninipu halok ogarit lagwi, weyak ogarup adigat nenape wenggelit nagwis, ogagu lagagup. Ogagu lagagup vaga, it nin Ala wene sovalogo baluk, weyak adigat ogagu lagagwa vaga Ala aninis enovaga bugu hegek welagagwa ako wane-wane, nit ogo Ala aninis mondok nenovaga bininaup-at welagagup.

⁴ Anderogo welagagup ovara, hivis At nenabwa eve ombok erogo imbita dugwit, mondok aigwak aberen endawi hunik okbininggigi.

⁵ Anderogo atma, nit ovok erogo yi weyak ndi weyak ogarit nagu lagagup vaga nggorak ovagak ninigik, Ala nenabwa imbita lagagirik, Keretus iluk erogo mondok okbagya dugwit, nit ogo ninimat niniluk erogo mondok okbininggigi. Ala nenabwa en endawi hunik okbininggigi andi vaga nenagap wendakninipigi.

⁶ Eke, At Keretus Yesus ninim hunik agurik halok, Ala en At ninim niniluk erogo bininggu lagagirik, Keretus mondok winimen siyalek mbogot vaga agarik ako ninim ndatak dogoguluk, siyabininggigi.

⁷ Anderogo okbininggigi ako andi, o hivis ari warisogon ako vaga avakwa en, “Ala ovavut mondok sek en endawi hunik ombok erogo okbininaliga o,” yiluk, yedok hugu dogopwak yiluk, nenagap wendatigi. Eke endawi hunik okbininggigi eyave andi, Keretus Yesus enat nenagap wendatigi.

⁸ Hit avyarat umbutu dugwit, henendawi At ovaga vanggabagu hiniselok, henabwa en endawi hunik okhinipu dugwit, henagap wendatigi o. Hit ambi okhedagagup vaga okbigigitek. Ata, Ala en onggodek unat okbogogogi.

⁹ Hiren, ambi okhedelagwi vaga wogobatugu hinisaoen, Aren adigat onggodek unat okbogogogi.

¹⁰ At Ala enat sek ogarogo bininggigirikmu, nit At menda-at agurik. Nit ao endaklagatek ninigik sek ogarit lagu dogop Ala en o muk erogo imbitigi ako, Keretus Yesus ninim hunik dugwit ogarit lagu dogoguluk, ogarogo bininggigi.

Keretus ninim hunik atma neneyave ambiat agurik

¹¹ Anderogo atma, naswei o. Hit weram Yakuri dek menda endaklagagup ako, o endak nggarogo welagagup ako, henape wenggenggu dogones. It ap Yakuri enagamut mbalek menda en, hit hiniselok, “Henagamut mbalekdek menda o,” yiluk, yukhirugu lagagwa ovara, it enagamut mbalek ako andi, un avakwa ininggi-vaga mbalisagwi.

¹² O andi hudi, it avakwa Iserali menda enadigat Ala aburi adik denek inigik, hit Yakuri dek menda Keretus hinim ogorek dugwit, un avakwa huru ovagak welagagup. Wene At aburi iniselok, nggatuk erogo yugeragagi ako, hit hedaup meyanat welagagup. Hit o wema yoma Ala hinunggut dugwit, “Anderogo okbininayogon ai,” yiluk, henape wenggelekdek welagagup.

¹³ Hit o adumu-at welagagup ovara, Keretus amuya vaga Ala hinim dambulogo bigiga wagagirikmu, yogak Keretus Yesus hinim hunigat agipik o.

¹⁴ Nit ap Yakuri menda inim, hit weram Yakuri dek menda inim, At Keretus eyave vaga nenendawi dambulogo neneyave ambiat erogo bininggu dugwit, ndup leget wogo hak ninim ogorek-at welagagup ako, masok-danggok erogo hekbagagi.

¹⁵ Eke, nit ap nininis unggul mberen welagagup ako, At eyave vaga At aburi nininis unggul ambiat akluk, ninim nenendawi dambulik dogoguluk, Ala en, “Yerogo ogarup, nderogo ogarup,” yiluk, wene Musa yugogogi ako vaga ninim ogorek welagagup ako ogo, degerogo bagagi.

¹⁶ Anderogo ogagya lagagirik, Keretus yo winik vaga hombagagi andi vaga ninim ogorek welagagup ako, degerogo baluk, neneyave ambiat ogarogo bininggu lagagirik, Ala ninim dambulik dogoguluk, At avema binina wagagi.

¹⁷ Hit o endak Yakuri dek menda Ala hinim adumu welagagup inim, nit Yakuri menda ninim horok welagagup ako inim, “Lwa erogo bigigaup ovok werek atma, dambules o,” yiluk, Sek Wene yuknera wagagi.

¹⁸ Eke, yogak Keretus ogagagi andi vaga, nit Yakuri menda inim, hit weram Yakuri dek menda inim, Ala Averiniki ambiat ako vaga en nit horok-horok wokniniviluk Nenasin Ala adoma laup mondok sek.

¹⁹ Andi halok naswei o. Yogak hit ap huru adik hunogo menda agipikbuk. Hit ninim wane-wane Ala aburi nininis unggul ambi atma, mbogot vaga nenawerek-at agurik.

²⁰ O valuguluk, o owak modo menda endak ngguvulisagwi hak andi, Keretus Yesus eyave-at. Eke, o eyave valit unggu dugwit, helep owak wenamen belagwi hak andi, it lakbigik menda inim, it ap Ala ane yugirigya hegek yugurugu lagagwa menda navi-navi ako irat. Eke o winimen eyave valek hak andi, nit avyarat ombasagwi Ala aburi nit neneyave-at agurik.

²¹ Ala en awi mondok denek sek adigat valhedagiluk, nit neneyave adik-adik ako, wogogo Nenowa Keretus Yesus eyave ambiat ako vaga hondabaluk, ovaga dukduk valit unggu dugwit,

²² hit ogo, Ala awi ovagak Averiniki hinim dogovovok yiluk, hit heneyave ako wogogo Keretus ovaga hop okbaluk At awi ovagak valhedaliga o.