Evesus 1 - ALA WENE HIVIS DIRUP WATUGWA

¹ An Paulus, Ala imbitigi vaga Keretus Yesus en ayonggo lakbigik menda okbaninggigi akoen, hit Ala aburi At ake denek Keretus Yesus hinim hunik dugwit, Sek Wene des erogo musek lendagwi menda o Evesus agipik ako, wene ambi yukherayogon o.

² Nenasin Ala Nenowa Inis Ombok Yesus Keretus iperen henabwa en okbugugwis, hit henendawi ugun seyalek adenggen dogovovok yiluk, okhinipwis, ogagu dogopwak o.

Keretus ninim hunik atma, sek okbininaliga wene

³ Nenowa Inis Ombok Yesus Keretus Asin Ala ako, inis mondok adup ogagu dogosogom o. Nit Keretus ninim hunik agurik atma, At Ala en mbogot vaga menda okbininaup ombasiga ako menda ovok erogo okbininggigirikmu agurik.

⁴ At Ala en, “Hivis Keretus en okbisayogon vaga An naburi wene ambi mondok enovaga yidilagetek nivaga mondok sek adik denek dogopwak o,” yiluk, o wen yi, ao dek hegek mikninipigi.

⁵ Nit ao endaklagatek ninigik, At Ala endawi hunik en At Yesus Keretus ogarisogon ako vaga, nit At adik aburi dogoguluk wokninivup endawi imbitigi ako wane-wane, okbininggigi.

⁶ At Ala nenabwa imbita dugwit, At Abut endawi hunik wokneragagi ako vaga, onggodek mondok iya erogo okbininaliga atma, nit At inis adup ogagu dogosogom o.

^7-8 At Ala nenabwa imbita dugwit, At endawi werek atma, mondok dibininggu lagagirik, eyave wisane hegek-hegek okbinilin wulu wandiga ako wane-wane, At Abut amuya vaga nenonggo mbabaluk, heda visilogo bininggu lagagirik, nenomaduk mondok degerogo bininggigi.

⁹ “Keretus en anderogo okbisapwak o,” yiluk, endawi imbita lagagirik, hologo bagagi agose mbauk hwilago welagagi akoat vogalogo yukneragagi.

¹⁰ At Ala en, “An ogarup imbitigis ako, andi vaga atma des yisogon o,” yiluk, imbitigi ako andi, mbogot vaga menda inim, wen vaga menda inim, yi menda ndi menda ovok erogo Keretus avema bugu dogomindik, At eyave mondok winimen siyalek dogop imbitigi ako, andi aro.

¹¹ At ogarup ombasiga ndatak-at ogasiga akoen, “An naburi anderogo sek okbisayogon o,” yiluk, o muk erogo nit ao endaklagatek ninigik, hologo bagagi ako wane-wane, Keretus ogagagi vaga nit At aburi mondok denogo bininggigirikmu agurik.

¹² Andi okbininaup hologo bagagi ako andi, niren, “Keretus anderogo okbininayogon o,” yiluk, endak avyarat umbutu dugwit, nenendawi At ovaga vanggabagagup ako, nit Ala inis ombok arupwak yiluk, mikninipigirikmu, At inis adup ogagu dogosogom.

¹³ Eve Sek Wene henagap wendarup wene ako, henaruk hunggu lagagupik, avyarat umbutu dugwit, henendawi Keretus ovaga vanggabagagup ako vaga, hit At aburi denek yedok erogo dogovovok yiluk, Ala Averiniki wokneraup avok yagagi ako, hit ogo wokheragagi.

¹⁴ Averiniki wokneragagi ako andi, nit At aburi nenonggo ovok bago atma, yi menda ndi menda hivis woknerayogon avok yagagi ako, avyarat woknerayogon nenape wenggelek dogoguluk, hwa onggo endak idi erogo belagwi hak, endak Averiniki nenendawima yidilogo bininggigi. Anderogo bininggigirikmu, At mondok siyalek agarik atma, At inis adup ogagu dogosogom o.

Paulus en enake samban ogagya lagagi wene

¹⁵ Anderogo atma, hiren Nenowa Inis Ombok Yesus avyarat umbutu dugwit, henendawi At ovaga vanggabagwi, eke, At Ala aburi ake denek ovok erogo hinim henendawi hunik oginipwis, ogarit lendagwi ako, an naruk hunggu lagirik henake samban ogasiga.

¹⁶ Samban ogagya dugwit, hit vaga an mbup yegetek Ala mondok, “Wa,” yugisiga.

¹⁷ At Nenowa Inis Ombok Yesus Keretus Asin Ala mondok winimen siyalek agarik akoen, hit henendawi werek okbugugu, Ala ogasiga ako yedok havovok yiluk, hinilup okbugugu, ogasiga Averiniki ako, ambi inim wokherapwak yiluk, henake samban ogasiga.

¹⁸ Anderogo samban ogagya dugwit, At Ala en henendawi awiya okbugu hegek, hit hedalavovok yiluk henayonggo bogogogi henape wenggelek agipik ako hinilup agwi, nit At aburi ake denek halok mavorangge mondok iya erogo woknerayogon imbitigi ako hinilup agwi,

^19-20 nit avyarat ombasagwi menda Ala anye mondok wisane erogo okbininaliga ako hinilup agwi, anderogo hinilup arovovok yiluk, Ala yugisiga. Nit avyarat umbutu niniselok, At anye mondok wisane ako vaga okbininaliga ako, Keretus hambuluk lendagwima en iluk erogo mondok okbagya lagagirik, inggis amotkan siyalek dogopwak yiluk, mbogot vaga mondok okbagagi ako hak, okbininaliga.

²¹ At mondok okbagya dugwit, madis wen avema menda inim, yonggapma menda inim, mbogot avema o ilim yenam agarwik menda inim, enagayuk werek winimen menda inim, ininis werek menda inim, o yogak agarwik inim, o hivis dogop inim, it ovok erogo sovalek inigik, At Keretus adigat inis ombok siyalek dogopwak yiluk, mbogot vaga mondok okbagagi.

²² Yi madis ndi madis inim, yi avakwa ndi avakwa inim, yi menda ndi menda ovok erogo At avema bisiluk, nit Ala aburi yi awi ndi awi homasagwi ako ovok erogo ninunggul ovagak Nenowa Keretus mondok siyalek dogopwak yiluk, mondok okbagagi.

²³ Eke, nit Ala aburi yi awi ndi awi homarisagwi ovok erogo ako andi, At eyave atma, eyave ambiat arupwak yiluk, nit neneyave unggul ako vaga hubininggigirikmu, yogak At eyave yi awi ndi awi, yi menda ndi menda, ovok erogo Arenen adigat atma nggedok ogasiga.