3 Yohanes 1 - ALA WENE HIVIS DIRUP WATUGWA

¹ Naswe Nggayus wai. An Ala aburi vagenombogo agirik yien, hat naswe nendawi avyarat mondok hunik atma, wene ambi yukhirisogon.

² Naswe nendawi hunik. Hat Ala wene des erogo musek lagya dugwit, hendawi eve sek erogo wenggebaluk ogarit landiga. Anderogo ndatak, hat heyave edudek mondok sek adigat dugwit, yi menda ndi menda ogasiga ako sek adigat higya dogonyok yiluk, hake samban ogasiga.

³ Hat avyarat wene Yesus avok ako wokbaluk, ogarit landiga ako, naswei Ala aburi nin nadoma wagu lagarwik, “At Nggayus ako avyarat wene des erogo wane-wane-at ogarit landiga o,” yiluk, mbilinogo yukniri wagu lagaoma, an nendawi adenggen wisane ombasiga.

⁴ Yi menda ndi menda ogarit lendagwi ako andi, nadenggen horok madugat ombasiga ovara, an naburi akoen, avyarat wene Yesus avok ako wokbaluk, mondok wane-wane ogarit lendagwi naruk hunggu neyalok andi, nendawi adenggen wisane ombasiga.

Ala aburi yonggat-yonggat ogagu dogop wene

⁵ Naswe nendawi hunik, an wene ambi yukhisogon. Hat ndugurek-ndagarek nenaswei Ala aburi ako sek okbugu dugwit, nenaswei nin huru ininis hinggut menda hadema waguselok, eve iya erogo okbisaliga ako vaga, “Wa!” yukhisiga.

⁶ It akoen eneyami vaga wagu lagarwik, Ala aburi o gereja homasagwima yoma inivaga mbilinggu dugwit, “Ap Nggayus endawi hunik okninipu dugwit, anderogo okbininggas o,” yiluk, yukneragao. Yukneragao atma, ap huru ininis hinggut menda nin ambi hat Nggayus hadema waguselok, Ala endawi sek hombarupwak yiluk, enangge ambi dek halok, wogirigya dogomindik, lakbisaup andi sek aro.

⁷ It ap andi, Keretus wene yugeregek laguluk, nagu dugwit, “It ap avyarat ombasagwidek menda enangge waup nenanggon o,” yiluk, yagarwikmu, hat yonggar-inipu dogop andi, segat yiluk, yukhisiga, naswe.

⁸ It ap avyarat wene Yesus avok ako ombok erogo mbigalit lagya dogopwak yiluk, ogarit lendagwi akoen, “Ninim wane-wane ogasagwi o,” yiluk, nenombarupwak yiluk, yonggar-inipu dogop andi sek aro.

Ap Diotereves weyak ogagagi wene

⁹ Ala aburi gereja andoma homasagwima ako, enake dirup maduk ambi warogo lakba wagagis ovara, ap Diotereves akoen, “Enanggelekma ap ombok an nadigat dogosogon,” yiluk, endawi hogop imbita dugwit, nane wegetek.

¹⁰ Anderogo atma, nit weyak ogagetek ninigik ovara, ap Diotereves en ane mondok weyak nenovaga bininggigi atma, an wagya dogomindik, at yagagi ako sigamat yukhugu neyayogon. At Diotereves en ane weyak andi adigat nenovaga baluk, mbup yagaliga andi dek. Ata, at weyak ogasiga ambi yi: nenaswei Ala ayelomani ako waguselok, at Diotereves en eneyave woginipitek. Eke, woginipitek dugwit, it nin woginivup ombasagwi ako, at Diotereves en “Woginivup dek o,” yiluk, yugeraliga. Yugirigya dugwit, it woginivup ombasagwi ako inim, enanggelekma en wibisaliga atma, des erogo yukhugu neyayogon.

¹¹ Naswe nendawi hunik yi wai! It weyak ogasagwi ako hat wane-wane ogagya dogobuk. Ata, it ap sek ogasagwi ako wane-wane adigat ogarit lagya dogwen. Ap ambi sek ogasiga halok andi, avyarat Ala abut arat agarik ombarup ovara, at weyak adigat ogasiga akoen andi, Ala mondok dibagetek-at agarik.

Ap Demeterius sek ogagagi wene

¹² Ap Demeterius ako, avyarat wene Yesus avok ako dibaluk, wane-wane ogarit lagya halok, Ala inim, it avakwa ovok erogo inim, iren, “Ap andi, mondok sek aro,” yiluk, yagalagwi. Eke, nit huluk dek, avyarat yagalagwi hat hilup atma, nit ogo, ap andi, iya erogo ogagya helagwi andi vaga, yukhisagwi.

Atok vaga heyaga wakbagagi wene

¹³ An wene wisane erogo yukhirup imbiti ovara, dirup warogo wokhirup nanggon okneraliga atma,

¹⁴ an hodorogo hadema wagya dogomindik, nenelose hunlakluk, wene yup hogop ombasiga.

¹⁵ Ala hinim werekma, hendawi sek wadokdek adenggen dogogun o. Haswei ninim agarwik akoen “Wa,” yukhugu lagarwik, heyaga wakbagagao. Eke, an naswei hinim agarwik ako andi, “Aren hit henadik henadik hininis hunogombo ‘Wa,’ yukheraliga,” hat Nggayus en yugerano. Anen hat Nggayus ovogat yukhigis o. Naswe wa!