2 Timotius 4 - ALA WENE HIVIS DIRUP WATUGWA

¹ Avakwa At avema bisaup yiluk, Nenasin Keretus Yesus sigam ari wagya lagagirik, it iniluk agarwik inim, hombagagwa inim, enowak dili warup Keretus Yesus inim, Ala inim, iperen inivaga an wene yi yukhisogon o.

² Ala wene yugeregek lagya dogwen. O sek hegek, o weyak hegek, ugun yugirigya dogonyok yiluk, vipuk erek dogwen. “E o,” yupwak yiluk yugirigya, weyak ogaguselok enanggadi watya, enendawi aik wakbugu, ogagya dugwit, hendawi mondok hora yiluk mamulirigya dogwen.

³ Avakwa wene adem Ala aburi vagago dogop modo wene ako hulup, “Nenanggon o,” yup hudi vanggo yi wasogon. Vanggo yi wagya halok, iren, “Wene ngga yugu samwi?” yiluk, enaruk hulit nagu dugwit, wene it enendawi hogop ombasagwi adigat yuknerapwak yiluk, wene mamulerelagwi menda homakbugu dogosogom.

⁴ It avakwa andien avyarat wene Yesus avok halok, enaruk nggedabetaluk, mupilin halok adigat mbilinit nagu dogosogom.

⁵ Anderogo ovara, hat halok andi, yi wene ndi wene wagya haoen, hendawi suam watya dogwen. Edup-mbedup okbagagusigik, hendawi wadokdek dugwit wigya, ap Sek Wene yugeregek lendagwi hak, hat ndatak yugeregek lagya, eke, hat Ala eyavup ogagya dogonyok yiluk, mendok okbagagagwa ako weralogo ogagya, ogagya dogwen.

⁶ Eke, an halok andi, Ala ake yiluk, narusogom andi mondok denogo baninggigi werekma, an hambup ako vage vanggalek agarik.

⁷ Ap ndup ogasagwi hak, an Ala wene sek erogo ogarigiluk, ndup ogagya lagi. Hudi atokma vupuk lendagwi ako hak, an vage hudi atokma ari wagi o. Nit Yesus avyarat umbutu dugwit musek lendagwi ako andi, an sek erogo vagago welagagis.

⁸ Eke, yogak At wene atma nggedok owak dilisiga Nenasin en it avakwa yavup sek okbaguselok, onggo nggudit-nggudit henago mahkota yikbisaliga menda, At warup hudi an ambi yikbanupwak yiluk, baninggigi ako agarik. An nadik yikbanisogonbuk. Ata, yi avakwa ndi avakwa en, “At sigam ari warupwak ai,” yiluk, sok helagwi ako ovok erogo yikbisayogon.

Timotius des erogo ogagya dogop wene

⁹ [It nin ovok hekbaniluk wunggugwarikmu, hat] hodorogo nadema warinok yiluk wal okhegek adigat ogagya dogwen.

¹⁰ Andi, ap Demas wen vaga menda adigat endawi hunik agagima, hekbaniluk o Tesalonika winggigi. Eke, ap Kerekes o Nggalatia lagya, ap Titus o Dalamatia lagya, ogagusigik,

¹¹ ap Lukas adigat ninim agarik. Ap Markus ako yavup an yonggat-nitya dogop sek atma, hat wagya dugwit, wegek-wegek omano.

¹² Ap Tikikus ako, o Evesus lakbagi.

¹³ Hat wagya dugwit halok, sogwesum o Teroas ap Karupus umwa baluk wagagis ako inim, nambuku virik-verek ogarek ako inim, eke, mbuku ndomba agamut vaga dirup warek andi iya atma, andi inim, ovok erogo woknombolok omano.

^14-15 Ap mbusi tembaga ogasiga menda inis Alesander akoen wene nit yugerelagwi ako at mondok anggon adigat imbita dugwit, weyak iya erogo okbaninggigirikmu, hat ogo weyak okbagagwi en, suam watya dogwen. At okbaninggigi ako andi, Nasin en onggo ndatak okbayogon.

^16-17 [Endak, it Yakuri menda en enane novaga banunggugwarikmu, it Oroma menda en] navok mbanggusim, naswei ambi mondok nadema wagetek ovok erogo hekbanunggugwa ovara, Nowa Yesus en andi, ninim welagagi. Ninim dugwit, it avakwa weram Yakuri dek menda ovok erogo hulupwak yiluk, anen Sek Wene ambi wombabagetek ovok saborogo yugirigya dogogiluk, nanye okbaninggigi. Anderogo atma, weyak okbanup embetao ako yangge singga elagapma en ndiyalisagwi hak, ndiyalnitugwa. Eke, naswei hekbaniluk wunggugwa ako weyak enovaga bugu haoen, Ala yugisiga.

¹⁸ Yi weyak ndi weyak okbanup ombasagwi ako okbanunggu saoen, Nasin en nagap wendarisogon. Eke, At avema bisaligama mbogot vaga andoma enewogogo bani layogon o. At inis mondok-mondok siyalek-at dogopwak! Amin.

Heyaga wakbagagi wene

¹⁹ Pirikila, Akwila iperen, eke, ap Onesivorus abur-ogwa inim, wa yugeranok yiluk yukhisiga o.

²⁰ Ap Eratus o Korindus andoma mbup yagas. Ap Torovimus aup agagirikmu, o Miletus andoma hegek wagagis.

²¹ O soges ogagya mbeda ao vanggo yi wagetek hegek, hat hodorogo nadema warinogen ogagya dogwen. Ap Ebulus ogo, Pudes ogo, Linus ogo, Kolaudia ogo, eke, nenowa-nenasin Ala aburi ogo, it ovok erogo en wa yukhisagwi.

²² Nenowa Yesus habwa en okbagagya dugwit, hinimat dogopwak o. Ai wa!