2 Timotius 3 - ALA WENE HIVIS DIRUP WATUGWA

O hivis avakwa nggarogo dogop wene

¹ Andi atma, an wene ambi hilup arinok yiluk, yukhisogon o. O hivis oklarup hudi vaga anggin mondok iya erogo nenovaga ari wasogon.

² O andi hudi ogarup ako, avakwa enendawi enanggidik agwi, yoparip adigat hogop ombarit lagwi, “Wi!” vok yuknerapwak yiluk wogobategek lagwi, enendawi siyabategek lagwi, avakwa wiyiknom-weyaknom erogo bigik lagwi, inisa-enasin enane des erogo hunggitek nagwis, wogeraup ovara, wa yegetek lagwi, Ala wene sagalogo baik lagwi, ogagu dogosogom.

³ Andi ogarit lagu dugwit, enowa-enaot enabwa dek umbutwi, wene adem enendawima werek halok, ap ako inim dambulup enanggon umbutwi, ogagu dogosogom. Avakwa enavok mbalit lagwi, ogarup oginipu halok sovalogo bagetek mondok ogarit lagwi, enaninis adigat dugwit, avakwa mondok enarit lagwi, sek ogarup mondok enanggon ombarit lagwi,

⁴ avakwa enaruguluk, inil yonggoninipwis, enape wenggelekdek ugun-ugun ogarit lagwi, “An nadigat iya,” yiluk, wogobategek lagwi, Ala inim hunik dogop embetetek enendawi ninggya halok musek laup adigat umbutwi, andi menda adigat ogarit nagu dogosogom.

⁵ Eke, andi ogarit lagu dugwit, Ala wene wokbaluk ogarit lendagwi elosenggen ovagak okhedelagwi ovara, enendawi andi, “Ala wene andi anyedek, nenanggon o,” umbutu dugwit, ogarit lagu dogosogom. It ap andi ogaguselok, inim horok-horok arubuk.

⁶ It ap andien enamwa nungguguluk, enane amburup nditik yugurugu dogomundik, nungguguselok, it akwa weyak ogagu lagagwa vaga enomaduk wisane enovaga durik agarwik ako, enendawi ndaik enendawi ninggya halok musek lagusigik, it ap andien enane seve erogo yugurugu dugwit, enendawi nomalinivisagwi.

⁷ It akwa andien enane hunik-hunik yugu dugwit, “Ala wene andi, ambi mamulneranes o,” yiluk, yagalagwi ovara, avyarat wene Yesus avok ako inilup asagwidek.

⁸ O muk erogo it ap Yanes, Yamberes iperenen Musa ako, “Nenanggon o,” yiluk, yagagwa ako hak, yogak it ap andi, avyarat wene Yesus avok ako, “Nenanggon o,” yiluk, yagalagwi. It enendawi mondok weyak adigat ombasagwi atma, it wene avyarat ombakluk ogasagwi yagalagwi ako enavut mbangguselok weyagat ogagu selagwi.

⁹ It ap Yanes Yamberes iperenen ogarit lagagwa sigam agagi ako hak, it ap andi ogo, enendawi obak ugun wes dugwit, yagan nagwis ako avakwa ovok inivaga sigam agya halok, ambi inim ogagu dogosogombuk.

Ogagya dogopwak yiluk, atok vaga yugogogi wene

¹⁰ Hat halok, an wene mamulirigya, an ogarit lagya, ogarup nendawi wenggenggu, nendawi At ovaga vanggabaluk avyarat imbita, nendawi sagain dugwit ogagya, avakwa nendawi hunik okbugu, anggin-mbanggin novaga agya hegek, nendawi wadokdek dugwit wigya, ogarit lagya neyagya lagagin.

¹¹ An o Andiyokia, Ikoniyum, Lisera inim, werekma, edup-mbedup okbanunggusigik, wakhidigya lagagis ako ovok hilup aro. Iya erogo okbanunggusigik, nendawi wadokdek dugwit wigya neyagek ovara, Nasin en nagap wendaknitigi.

¹² Yi avakwa ndi avakwa Keretus Yesus inim hunik dugwit, Ala wene wokbaluk ogarit lagu dogosogom umbutuselok, edup-mbedup erogo bigik nagu dogosogom.

¹³ Anderogo ovara, it avakwa weyak ogasagwi menda inim, enane huluk yagalagwi menda inim, weyak ambi inim ombok ogarit nagu dugwit, ir-it enambukmu dagalhidugu dogosogom.

¹⁴ Eke, hat halok andi, yi wene ndi wene, “Yi avyarat o,” yiluk, mamulhedagagin ako, nggitik-nggetok erogo vagago dogwen. Sanien mamulhogogwa ako hilup.

¹⁵ Eke, hat Ala Wene Dirup Warek madukma en hilup agindik. Ala Wene andi, Keretus Yesus vaga vanggabaluk avyarat umbutu niniselok, nenagap wendarup ako ninilup okbininaliga.

¹⁶ Ala Wene dirup warek ovok erogo Averiniki avakwa enendawima des iri lagagirik, yugirigya hegek, dirup watugwarikmu, wene warek yi ako vaga en avakwa mamulirugwi, weyak ogaguselok enaruk watwis, enane adik yagan nagwis ako holinipwis, eke, sek adigat ogagu dogop yugurugwi, ogagu dogopwak yiluk, Ala Wene dirup warek agarik o.

¹⁷ At Ala en dirup warek wokneragagi ako andi, nit Ala aburi dugwit, yi menda ndi menda sek ogagu dogopwak yiluk, dikduk erogo bininaliga.