2 Timotius 2 - ALA WENE HIVIS DIRUP WATUGWA

Keretus Yesus inim hunik dugwit, endawi wadokdek dogop wene

¹ Ai nabut Timotius wa. Keretus Yesus ninim hunik dugwit, habwa en anye okbagagya hegek, hendawi wadokdek dugwit ogarit lagya dogwen.

² Avakwa wisane inivaga yi wene ndi wene yukhugu neyagek hunggigin ako, it ap enandogon sek, avakwa des erogo mamuleraup sek inigin halok, it ogo vagago dugwit avakwa yugurugu dogopwak yiluk, mamulirigya dogwen.

³ Enayegen werek menda anggin-mbanggin hegek enendawi wadokdek dugwit welagwi hak, hat Keretus Yesus aot henayegen werek hak, ninim ndatak wugu dogosogom.

⁴ Ap enayegen werek en, ndup ogagu dugwit, nowa ndup mamulnogogi ako endawi sek nombarupwak yiluk, at adik eyavup inim, angge-angge inim, hekbaluk, ndup ogarup adigat endawi wenggelek dugwit ogarit landiga.

⁵ Eke, olah raga ogagu dugwit, ap ambi, “Sa endak onggo hedami?” yiluk, wakhugu dugwit, “Anderogo ogaru,” yiluk, wene ogasagwi menda ako ndatak ogasigadek halok, onggo hedaligadek.

⁶ Ap ambi inggis anye vaga yavup ogagya halok, enggen yugup akoat endak hedaup sek.

⁷ An yukhisiga yi ako vaga hape wenggelit lagya dogwen. Hat ovok erogo yedok hanok yiluk, Nenasin en hilup okbagasogon.

⁸ An Sek Wene yugeraliga ako andi, yi: Ala en Daut ombao hivis Inis Ombok dogosogon yagagi ako, Yesus Keretus aro. Eke, At Yesus ako Ala en hambuluk lendagwima en iluk erogo mendok okbagagi. At Yesus ako vaga hape wenggelek dogwen.

⁹ An wene andi yugirigya neyalok, anggin-mbanggin okbanenggek adigat ogarit wagagwa, wagagwa, atok vaga, “Ap mondok weyak ogasiga o,” yiluk, heda marogo mabanunggugwa yoma agirik ovara, Ala wene andi, heda marup meyan.

¹⁰ Anderogo atma, it avakwa Ala miginipigi enendawi Keretus Yesus ovaga vanggabaluk, avyarat umbutuselok, enagap wendakbaluk abinak mondok-mondok dogopwak yiluk, anggin-mbanggin okbanunggusigik, ovok erogo it enake nendawi wadokdek dugwit waliga.

¹¹ Wene yi andi avyarat: “Nit At ninim hambusogom halok, At ninim niniluk dogogup o.

¹² Anggin-mbanggin okbinunggusigik, nenendawi wadokdek dugwit, welagwi halok, nit At avema siyalek dugwit, avakwa nin nenavema bisiluk, yerogo nderogo yugurugu dogogup o. Niren ‘At ninunggut o,’ yugu niniselok, At ogo ‘Hit An ninggut o,’ yuknerayogon.

¹³ Nit At yagaliga andi adik ogasagwi ovara hegek, At yagaliga andi ndatak-at ogasiga o. Andi, At itok inggut akluk adik ogarup meyan o,” yiluk, yagalagwi ako andi mondok avyarat.

Ala eyavup ogarit lagu dugwit, ogagu dogop wene

¹⁴ Wene yukhisiga yi ako andi, avakwa en enape wenggenggu dogopwak yiluk, yugirigya dogwen. Wene maduk yup hegek wenemuk yugwi ako vaga it hulisagwi ako un enam warogo nadok-hadok okbiselagwi atma, “Anderogo ogarubuk,” yiluk, Ala ivaga enaruk watya dogwen.

¹⁵ Ap ambi yavup eve sek ogagya dugwit, anggadi ombasigadek ako hak, hat avyarat wene Yesus avok ako mamulirigya dugwit, wene adik ambi inim lobalogo yugeregetek At ane adigat des erogo yugirigya heyalok, Ala en endawi sek hombarupwak yiluk, eve sek erogo ogagya dogwen.

¹⁶ Wene des erogo yegetek enane agil-amok amburup werek yagan nagwis vaga sek okhedaup dek weyak ogarup adigat okbininaup atma, hekbaup.

¹⁷ It ap enawin amu wisane hunggu lagarik, eneyave vaga ombok mbigalisiga ako hak, it ap andi, enane huluk wene ako anderogoat ombok mbigalit landiga. It huluk wene yagan nelagwi menda ako andi, it ap Himeneus Viletus inim akluk yagan nelagwi.

¹⁸ It ap andi, avyarat wene Yesus avok ako nomalogo hekbaluk, “Avakwa hambuluk lendagwima en vage iniluk erogo mendok okbogogi o,” yiluk, yugu dugwit, it nin Yesus Keretus avyarat umbutugwa menda ako enendawi avut dagalisagwi ovara, hegek,

¹⁹ Ala imbitigi andi, mondok avyarat atma arisogon andi, yi: “Nenasin ako At aburi halok andi, ilup agarik.” Eke, ambi, “Yi ap ndi ap ovok erogo, ‘Ala Abut Inis Ombok denogo bagagi andi, Yesus aro,’ yuguselok, It weyak ogasagwi ako enasam helok hekbapwak,” yiluk, Ala ogarup imbitigi ako, o owak wombalek wadokdek andi ndatak, mondok wadokdek agarik.

²⁰ Ala aburi ovok dambulik andi o ombok valek ndatak agarwik. O ombok valek ilim andi, mbusi emas vaga inim, mbusi perak vaga inim, sogolowak andi menda adigat dek. Ata, nin yo vaga, nin wen vaga, ogarek agarik. Sogolowak eve segedok halok andi, iya menda ambi ogarup yiluk, denek agarik. Eke, nin halok andi, we ugun ogagek yup yiluk agarik.

²¹ Anderogoat agarik atma, ap ambi sogolowak horek mondok sek agarik ndatak, at omaduk mbobagya halok, at asin ake yi menda ndi menda sek iya adigat ogagya dogopwak yiluk, mondok denek agarik.

²² Andi halok, apsawe enendawi nelagwi ako ndatak, hat anderogo okbagagya haoen, hekbaluk wunggu dogwen. Eve sek halok ogasagwi inim, enendawi Yesus ovaga vanggabaluk avyarat ombasagwi inim, avakwa enabwa ombasagwi inim, enendawi ambiat dambulik dogop inim, it avakwa enendawi eve vaga, “Nenowa Inis Ombok Yesus aro,” yiluk, yagalagwi ako, hinim akluk it ogasagwi andi menda adigat musek lagya dogwen.

²³ Ap inunggut dugwit avoloklok wene vaga onggo-onggo yugu dugwit war-wat yagalagwi ako hat hilup atma, hekbagya dogwen.

²⁴ Ap ambi Nenowa ayeloman halok, war-wat yup andi moga. Ata, yi avakwa ndi avakwa ovok erogo endawi sagain vaga oginipu, wene sek mamulirigya, weyak okbamwi ovara, onggo yugeregetek mbup iris, ogagya dogop.

²⁵ It hinim ogorek dugwit, wene adik yagan nagwis ako, enasam helok, avyarat wene Yesus avok inilup arupwak yiluk, “Ala en okbisaup hegek ogarup ai?” yiluk, hane seve erogo mamulirigya dogwen.

²⁶ Ala en anderogo okbugu halok, Sile ombasiga menda ogagu dogopwak yiluk, heda magogo bogogi hegek, enendawi werek akluk, heda mago ako visilogo wunggu dogosogom.