2 Timotius 1 - ALA WENE HIVIS DIRUP WATUGWA

^1-2 Nabut Timotius nendawi hunik wai. An Paulus Ala endawi imbitigi vaga Keretus Yesus en yonggo lakbigik menda baninggigi ako wene ambi yukhisogon o. An ako, Ala en Keretus Yesus ninim hunik dugwit niniluk mondok-mondok dogop yagagi ako yugirigya dogogiluk an lakbigik menda okbaninggigi akoen yukhisiga. At Nenasin Ala, Nenowa Keretus Yesus Iperen habwa en okbagagwi, enaigwak aberen okhitwis, eke, hendawi ugun adenggen wadokdek dogonyok yiluk, okbagagwi, ogagu dogopwak o.

Endawi aik wakbagagi wene

³ An hup-dingga samban ogagyama, hat vaga nape wenggelek dugwit, “Nenasin Ala wa,” yiluk, yugisiga. An nombawi weyak embetetek enendawi sek vaga Ala ake ogagu lagagwa ako hak, an ndatak-at ogasiga o.

⁴ Hat yup yagagin ako nape wenggelagya halok, an nendawi adenggen iya erogo hagiluk, “Bikheya warik ai,” ombasiga.

⁵ Hat hendawi enggen vaga Yesus ovaga vanggabaluk avyarat imbitigin ako, nape wenggelek agirik. Hambeyak Lois inim, hisa Eunike inim, iperen endak avyarat umbutugwa ndatak, hat ogo avyarat ombasiga andi, an nilup.

⁶ Anderogo atma, an ninggis hunggul vakbagagya neyagek, Ala eyavup ambi ogarinok yiluk, Averiniki anye wokhogogi ako, hali nagaup iri halok monggalisagwi ako hak, Averiniki anye hendawima andi ombok erogo okhedanok yiluk, yukhisiga.

⁷ Andi, At Ala en nenendawi nenalon werek menda wokneregetek. Ata, Averiniki anye okbininggu hegek nenalon dek dugwit ogagu dogop inim, avakwa enendawi hunik oginivup inim, nenendawi werek inim, wokneragagi.

⁸ Anderogo atma, Nenasin Inis Ombok ninim hunik dugwit, niniluk mondok dogop wene yugirigya dogop ako hanggadi habuk. Eke, an wene andi yugirigya lagagis vaga heda maknitugwa ako ogo, hanggadi habuk. Ata Sek Wene ako yugurugwi vaga anggin-mbanggin nenovaga bininelagwi ako, an nadik dek. Ala anye woknirigya hegek, niperen ndatak anggin hugu dogosogom.

⁹ At Ala en nenagap wendatya lagagirik, nit At aburi ake denek dogoguluk, neneyanggup yukneragagi. Nit ambi ogagagup vaga andi dek. Ata, At okbininaup imbitigi ako ndatak, nenabwa en okbininggu dugwit, nenagap wendatigi. At aigwak aberen okbininaliga menda ako andi, o yi ao wakhegetek hegek, “Keretus Yesus vaga okbisayogon o,” yiluk, hologo bininggigi ako,

¹⁰ yogak yi nenagap wendarisiga menda Keretus Yesus wagagi ako vaga sigam agagi. At hambisagwi adem nenovaga hondalek welagagup ako, degerogo baluk, Sek Wene vaga niniluk mondok-mondok dogop wene ako sigam agagi.

¹¹ Sek wene andi, yi awi ndi awi yugeregek lagya, mamuleregek lagya, ogagya dogogiluk, lakbigik menda denogo baninggigi.

¹² Denogo baninggigirikmu, ogarit lagya neyagek, avakwa en anggin okbanilagwi ovara, nanggadi embetetek agirik. An nendawi At ovaga vanggabaluk avyarat imbitigis Yesus ako andi, an ovok nilup aro. Eke, an ogagya dogogiluk, yavup ninggimu okbaninggigi ako Nenowa warup ako wagetek hegek, dek arisogonbuk. Ninim dugwit, nanye okbaninggya hegek, ogagya dogosogon o, avyarat ombasiga.

¹³ Wene Ala wene modo menda yukhugu lagagis ako wane-wane haren des erogo vagago dugwit, yugirigya dogwen. Yugirigya dugwit, Keretus Yesus avyarat imbita, eke, avakwa hinim hendawi hunik okbugu, ogagya dogwen.

¹⁴ Eyave sek menda Ala en hinggimu bagagagi ako, Averiniki nenendawima agarik akoen anye okbagagya hegek, des erogo vagago dogwen.

¹⁵ It o Asia agarwikmu ovok erogo ap Vigelus ogo, ap Heromogenes ogo, an hekbaniluk wunggugwa ako andi, hat hilup.

¹⁶ At ap Onesivorus andi, an mbusi heda mago neyagek, anggadi en hekbanenggetek hunik adigat nendawi aik wakbani wagek ogagagirikmu, at amwa agarwik ovok erogo Nenasin aigwak aberen okbugu dogopwak.

¹⁷ At o Oroma nunggwigya lagagirik mondok belalnetek adigat lagya dugwit, avuk agagup.

¹⁸ At o Evesus dugwit iya erogo yonggat-nitya lagagi ako hat mondok hilup aro. O hivis arup hudi vaga Nenasin en ap andi, aigwak aberen okbapwak ai.