2 Tesalonika 3 - ALA WENE HIVIS DIRUP WATUGWA

Nenake samban ogagu dogop wene

¹ Ai, nowa-nasin. Wene ovogat yukhirigyo ovara, atok vaga ambi yukherasogom. Nenowa Yesus ninim hunik dugwit, niniluk mondok dogop wene ako hit wugu lagagupik, mbigalit lagu dugwit, wene ako wogobalin nagu lagagup ako ndatak, nit anderogoat yi awi ndi awi yiluguluk yugeregek nagu dogoguluk, nenake samban ogagu dogones.

² Eke, it avakwa wisane Ala en denogo bagagi Yesus ako avyarat embetetekma, it ap weyak ogasagwi menda ovok erogo weyak adigat ogarit lendagwi andien, nit weyak erogo bininggu haoen, Nenowa en nenagap wendarupwak yiluk, nenake samban ogagu dogones.

³ At Nenowa andi, At yagaliga ako adik asigadek, mondok des erogo ogasiga atma, Aren henanye okbugugu dogosogon. Eke, at weyak ogasiga menda akoen weyak okbigigagwi en yiluk, hinimat dogosogon.

⁴ Hit ogagu dogop wene yukherelagwi ako andi, vage ogasagwi ninilup. Eke, hit ambi inim ogagu dogovovok yiluk, Nenowa Inis Ombok en okbigigayogon.

⁵ At Ala en yi avakwa ndi avakwa endawi hunik oginivisiga ako hinilup okbugugu, eke, Keretus anggin-mbanggin ovaga agya hegek, endawi wadokdek dugwit wogogi ako ndatak, hit ogo anderogoat henendawi wadokdek dugwit wugu dogovovok yiluk, okbugugu, Nenowa Inis Ombok en ogagya dogopwak o.

Ininggis anye vaga ogagu dogop wene

⁶ Ai nowa-nasin wa. Nit Nenowa Yesus Keretus inis vaga wene ambi yukherasogom o. Wene, “Anderogo ogagu dogones,” yukhirugu lagagup ako, henaswei nin ogagetek yavup ogarup enanggon en un nagu hiniselok, hinim nagu dogobuk.

⁷ Hit ninim dugwit, nit ugun welagetek sakdida ogarit lagu lagagup ako, hit ogo wane-wane ogarit nagu dogop andi hinilup aro.

⁸ Nit hit hinim dugwit, henagarom onggodek un nunggu lagetek. Nit andoma wagu lagagurik, hit anggin ambi inim henovaga bugugu ninisaoen, nenagarom namunda nggino yukheregetek hutun-howam nininggis vaga adigat okhedegek nagu dugwit, nenanyedek erogo bininggigi ako hinilup aro.

⁹ Henangge-henangge nggino yukherelok un naup sek ovara, nit ogarit lendagwi ako hit ndatak ogagu dogovovok yiluk, ogagu lagagup.

¹⁰ Ninim dugwit, “Ap ambi yavup ogagetek halok, erom wogurubuk,” yukhirugu lagagup.

¹¹ Hit nin henovadombok okhedegetek it nin enawene ako andok okbetaluk yagan nagu dugwit, yavup enanggatek ugun-ugun ogarit lendagwi yugu selagwi atma, yukherelagwi.

¹² “It ap anderogo ogasagwi andi, eneyavup des erogo okhidugu dugwit, it enagarom adigat nunggu dogopwak,” yiluk, wene andi Nenowa Yesus Keretus inis vaga henaruk wasagwi.

¹³ Ai nowa-nasin wa. Hit andi, sek okbigik lendagwi ako henanggon okhinipu halok, “Nenanggon,” ombarubuk.

¹⁴ Nit wene yukherelagwi dirup warek yi, at ambi en, “Ogarup, nanggon,” iri halok, ap andi, eyave dibagu dogomundik, anggadi arupwak yiluk, hinim avuk arubuk.

¹⁵ Ovara, hinim ndup ogorek ovagak dogop andi weyak. Ata, “Nenaswe atma,” yiluk, wene aruk des erogo wares.

Heyaga wakbigigi wene

¹⁶ Yogak nenendawi ugun wadokdek adenggen okbininaliga menda Nenowa Inis Ombok akoen yi ogagek ndi ogagek ovok erogo ogarit lagu hinigik, henendawi ugun wadokdek adenggen dogovovok yiluk, okbigilin lagya dogopwak. Hit ovok erogo Nenowa hinimat dogosogon o.

¹⁷ “At Paulus enat dirup yi warogo lakba waga higi,” ombarupwak yiluk, atok vaga heyaga wakbisaliga wene andi, an ninggis vaga en warisiga atma, dirup yi, “Arenat yukneraga,” ombarovovok yiluk, atok vaga heyaga wakbigigaliga wene yi, an ninggis vaga dirup warogo wokheraliga o.

¹⁸ Nit Nenowa Yesus Keretus hit ovok erogo henabwa en okbugugu dogopwak o. Ai wa, wa!