2 Tesalonika 2 - ALA WENE HIVIS DIRUP WATUGWA

At weyak adigat ogasiga akoen ogagya dogosogon wene

¹ Ai nowa-nasin wa. At Nenowa Yesus Keretus wagya halok, nit At ninim homakbininaup wene ako yukherasogom.

² It avakwa en, “Nenowa warup ako vage horok ari waga o,” yiluk, yagan wagu dugwit, at ambi en, “Ala en wene yuknugu halok, yukheraliga o,” eke, at ambi en, “Dek o. Paulus en yuknogogimu, yisogon,” ata, “Paulus en dirup watigirikmu, yukherayogon,” yiluk, it yagan waguselok, mbikit henalon en henendawi dek agu hinisaoen yiluk, yukheraliga.

³ It avakwa huluk anderogo yagan wagu dugwit, henambukmu unggu saoen, dibugu dogones. Nenowa warup ako andi, avakwa wisane en Ala wene, “Nenanggon o,” yiluk, hekbagetek inigik, eke, at ap mondok weyak adigat ogasiga, elese degerogo baup ake denek ako, sigam ari wagatek hegek, warisogonbuk.

⁴ It avakwa en yi menda ndi menda ambi, mondok okbaluk, “Nenasin Ala aro,” yiluk, agayuk wutwis, huvuwak ogarogo baluk, siyabagwi, ogasagwi menda ovok erogo at ap mondok weyak adigat ogasiga akoen sovalogo bisiluk, At adigat siyabatigya dugwit, Ala awi valekma o Yerusalem mendok yi nunggwigya dogomindik, “Henasin Ala An aro,” yiluk, yugirigya dogosogon.

⁵ An endak hit ninim dugwit, wene yi ovok yukheragagis ako hinunggut agagup a, ao hinilup agipik a?

⁶ At mondok weyak adigat ogasiga ako andi, o ngga vaga sigam ari warup mirik agarik ako vaga warupwak yiluk, nano en sovabaluk agarik ako hinilup aro.

⁷ At madis Sile anye vaga weyak ogarit lendagwi ako andi, vage mbauk hwilagago ogarit lendagwi ovara, at sovalogo baliga ako ao wolok enggetek hegek, weyak ombok erogo wigalarisogonbuk. At sovalisiga menda ako en, sovalogo bagya dogosogon aro.

^8-12 At wolok inggya halok andi, at mondok weyak adigat ogasiga ako sigam ari wasogon. Sigam ari wagya dogomindik, Sile ogasiga wane-wane at anye vaga ogarit lagya dugwit, “Ala anye vaga ogasiga,” ombarupwak yiluk, huluk enalon werek menda ogagya, nggarogo ogarubuk menda ogagya, nadok-hadok wisane ogagya, ogarisogon. Ogagya dugwit, it avakwa Ala en enagap wendarupwak yiluk, avyarat wene Yesus avok ako enendawi sek embetetek waup enanggon dogosogom vaga weyak erogo bisaup ako, enambukmu dagaligiluk, ane adik wisane molalogo yugirigya dogosogon. It ako, huluk wene yagan wagya ako avyarat ombarupwak yiluk, Ala en enendawi apik erogo bisayogon. Eke, it avakwa avyarat wene ako wegetek weyak ogarup adigat enendawi hogop ombasagwi ako ovok erogo enowak dibaluk, weyak enovaga bisayogon. Andien, at mondok weyak adigat ogasiga anderogo ogarit lagyama, Nenowa Yesus mondok siyalek agayuk werek wagya dugwit, elagap agarero vaga eyave mondok degerogo warogo bawasogon.

Enagap wendarupwak yiluk miginipigi wene

¹³ Ai nowa-nasin wa. Hit Ala henabwa ombasiga ako vaga Ala wa yugurup adigat okninivisiga. Ala en, henagap wendarigiluk, hit endak erogo mikhinipigi. Mikhinipigirikmu, Averiniki en hit henendawi weyak horogo bigigu, avyarat wene Yesus avok avyarat umbutwi, ogasagwi ako vaga henagap wendarisiga. Anderogo atma, hit vaga “Ala wa,” hunik-hunik yugisagwi.

¹⁴ At Ala en hit anderogoat henagap wendarigiluk, nit Sek Wene yukheragagup ako vaga yanggup yukheragagi. Nit Nenowa Yesus Keretus mondok abinak agarik ako hit hinim ndatak henabinak dogovovok yiluk, yanggup yukheragagi.

¹⁵ Anderogo atma, naswei o. Yi wene ndi wene nenane vaga yukhirugu lagagup inim, dirup warek vaga yukhirugu lagagup ako inim, henendawi wadokdek dugwit, wene andi, nggitik-nggetok erogo vagago dogones.

^16-17 Nenasin Ala ako nenabwa en endawi hunik okbininggu dugwit, nenendawi mondok-mondok aik wakbininggu, nenape wenggelek mbogot vaga menda ako woknirigya, ogasiga ako andi, At Nenowa Yesus Keretus inim iperenen hit sek ogarit lagwi, henane sek adigat yugeregek lagwi, ogagu dogovovok yiluk, henendawi aik wakbugugwis, henanye okbugugwis, ogagu dogopwak.