2 Peterus 3 - ALA WENE HIVIS DIRUP WATUGWA

Yesus warup wene

¹ Nowa-nasin nendawi hunik. An dirup ambi endak warogo wokheragagis ako wane-wane, yogak ambi yi inimat dirup warogo wokheraliga. Dirup warogo wokheraliga yi ako andi, henendawi eve sek adigat dogop henape wenggenggu dogovovok yiluk, endak dirup warogo wokheragagis ovara, ambi inimat warogo wokheraliga.

² It navi adik enek menda o muk Ala en At ane yugirigya hegek yugurugu lagagwa wene ako henape wenggenggwis, eke, nenagap wendasiga Nenowa Inis Ombok en, “Yerogo ogagu dogopwak o,” yiluk, it ap lakbigik menda yugirigya lagagimu, yukhirugu lagagwa wene ako inim henape wenggenggwis, wene mberen andi henape wenggenggu dogovovok yiluk, dirup yi warogo wokheraliga.

³ Hit endak hinilup arovovok yiluk, wene eve iya erogo yiat yukheraliga o. Hivis o atok vaga it avakwa wiyiknom-weyaknom okbugwis, enendawi en ninggya halok musek lagwi, ogasagwi akoen, warusogom. Wagu dogomundik, wiyiknom-weyaknom okbigigu dugwit,

⁴ “Henowa en, ‘An hivis warisogon,’ yiluk, yagagi ako, At eyave wandiga ngga? At wagatek adigat hegek, nenombawi hombagagwa ovara, o wen-mbogot yi werek agagi hudien, mbikit, yogak yi hudi adik ambi asigadek itok-at agarik yi,” yiluk, yukhirugu sagup.

⁵ Anderogo yagalagwi ako andi, o muk Ala ane vaga mbogot ogagya lagagirik, wen ogagya dugwit, is adigat agya lagagimu, Ala en, “Wen arupwak o,” iri hegek, is endawima en wenat sigam agagi ako, it inilup dugwit ovara, sovalogo hekbelagwi.

⁶ Eke, hivis musu lakba wagagi ako vaga is yanggadit inggya dugwit, wen o endak ogagagi ako weyak erogo bagagi.

⁷ Eke, yogak mbogot wen ninil helagwi yi ako andi, hivis it avakwa Ala enanggon umbutu dugwit, weyak ogasagwi ako enowak dibaluk, eneyave degerogo bisaup ari wasogon ako vaga, o yi, hali bagiluk, At ane vaga vagago agarik.

⁸ Anderogo ovara, nowa-nasin nendawi hunik. An wene ambi yukherayogon yi, hinunggut akluk hekbabuk. Niren o ndugwis ambiat wandiga ombasagwi ako, At Nenasin Ala en 1.000 tahun-at ombasiga, eke, niren 1.000 tahun ombasagwi ako, Aren ndugwis ambiat o yanggo yagas ombasiga.

⁹ Anderogo atma, Nenowa en, “An hivis warisogon o,” yiluk, yagagi ako, it avakwa ninen, “Ao wagetek yi, huluk yagagi a?” yiluk, ombasagwi ako hak, hit anderogo umbutu dogobuk. Ata, “Ala en, ‘Avakwa degerogo bisaup andi, nanggon o,’ imbita dugwit, nit yi avakwa ndi avakwa ovok erogo nenasam helok, weyak ogasagwi ako hekbapwak yiluk, Ala endawi sagain vaga nenabyam agarik,” umbutu dogones.

¹⁰ At Nenowa warup ako andi, “Ndugwis andi vaga warisogon,” embetetek inigik, ap onggop waliga ako hak enape wenggelekdekma warisogon. Eke, wagya halok, mbogot ane sukup iri dugwit dek agya, saut-dadiwap mbogot vaga agarik menda ovok hali ninggya, wen yi inim, wen vaga agarwik inim, ovok erogo dek agya, ogagya hagup.

^11-12 Yi menda ndi menda ovok anderogoat dek arisogon atma, nit nenandogon nggarogo dugwit ogarit nagu dogop embetep? Dek o. Nenasin Ala wagya andi vaga mbogot hali ninggya dugwit dek agya, eke, saut-dadiwap hali idup wisane en agas owangga sigirigis wunggu dugwit degerogo bagya, ogarisogon atma, “Nenowa hodorogo warupwak o,” yiluk, abyam dugwit, heneyave ovok erogo Ala ake enogo baluk, weyak ogagetek henandogon mondok sek adigat dugwit, henendawi adenggen erogo ogarit nagu dogones.

¹³ At Ala en, “Mbogot-wen swi menda ogarogo baluk, avakwa An nendawi ombasiga menda ogasagwi adigat, o andoma dogopwak yiluk, andok okbisayogon o,” yiluk, avok yukneragagi ako andok okbininapwak yiluk, abyam agurik.

¹⁴ Anderogo atma, nowa-nasin nendawi hunik, an wene ambi yukherayogon. At ovok erogo anderogo okbininapwak yiluk abyam agurik atma, avakwa enane ambi henovaga agetek, henendawi sek adigat dugwit Ala hinim henendawi ambiat dambulik werekma hinisa warupwak yiluk, ndugurek-ndagarek henendawi wakit hidugu dogones o.

¹⁵ Anderogo ogagu dugwit, henendawi en, “Nenowa hodorogo wagetek halok andi, nit ovok erogo nenagap wendarupwak yiluk nenabyam agarik atma, nanonggal aga o,” yiluk, umbutu dogones. Wene andi, at nenaswe nenendawi hunik Paulus ako, Ala en at endawi anggat erogo okbagya hegek, endawi werek dugwit dirup watigi ako wane-wane aro.

¹⁶ At Paulus akoen, at yi wene ndi wene ovok erogo dirup watya dugwit, wene andi menda adigat yagaliga. At wene dirup wasiga ako andi, nin dibaup anggin agarik. Eke, it avakwa nin enendawi mberen en, wene andi inunggut dugwit, wene Ala en yugugu lagagimu Paulus en dirup watigi ako inim, Ala wene it ninen dirup watugwa ako inim, irenen avut dagalogo yugeralagwi. Ala wene avut dagalogo yugeralagwi atma, irenat eneyave degerogo betelagwi.

¹⁷ Anderogo halok, nowa-nasin nendawi hunik. An wene yukhirigi ako andi, hit mondok hinilup aro. Hinilup atma, it Ala wene sovalogo baluk enane ugun yagan nelagwi vaga nomalhinipu saoen, eke, hit wene avyarat umbutu lagagupik wogogup mondok wadokdek sek erogo vagago agipik ako, hekbaluk, it yagan nelagwi ako musek lagu hinisaoen, henendawi mondok suam watu dogones.

¹⁸ Nenasin Ala endawi hunik en okbininaliga ako hit henendawi hoda arovovok yiluk, ambi inim okbigigu, eke, At nenagap wendasiga menda Nenowa Inis Ombok Yesus Keretus eyave hinilup-at ovara, ambi inim hinilup arovovok yiluk, okbigigu, ogagya dogopwak o. Yogak en, mbikit, mondok dogogup hudi At eyave mondok siyalek-at dogopwak yiluk, an Peterus en ovogat yukheraliga o. Wa!