2 Peterus 1 - ALA WENE HIVIS DIRUP WATUGWA

Peterus en wa yugeragagi wene

¹ Nowa-nasin wa. An Simon Peterus Yesus Keretus ayeloman ayonggo lakbigik menda mondok okbaninggigi akoen, wene ambi yukherayogon. At nenagap wendasiga Yesus Keretus Ala akoen, At ovavut sek adigat ogagagi ako vaga wene avyarat umbutu lagagurik, wagagup nenendawima vakhedogo agurik ako, hit ninim ndatak wagagup atma, an wene yi dirup warogo wokheraliga.

² Nenasin Ala o, Nenowa Inis Ombok Yesus Keretus o, iperen hit des erogo hinilup agipik atma, henabwa en okbugugwis, henendawi ugun seyalek adenggen dogovovok yiluk okhinipwis, evenuk erogo okbigigu dogopwak.

Adik enogo bininggu lagagirik, neneyanggup yagagi wene

³ At sek mondok siyalek agarik ako, ninim wane-wane dogoguluk, neneyanggup yukneragagi halok, nit akoen At eyave des erogo ninilup vaga, nit wen vaga yoma dugwit, At endawi ombasiga menda ako ogarit lagu dogoguluk, At anye okbininggigi.

⁴ At Ala eve sek mondok siyalek agarik akoen, “An anderogo okbigigayogon o,” yiluk, wene mondok iya idi ako menda nggatuk erogo yukneragagi. At nggatuk erogo yukneragagi ako vaga, it wen vaga menda enendawi en ninggya halok amusek lagu dugwit, eneyave weyak okhedegek lendagwi hak, hit anderogo ogagu hinisaoen, hekbaluk hoda wulu wagu dogomundik, At Ala ovavut sek adigat agarik ako hak, hit henovavut anderogo arovovok yiluk, At wene ako nggatuk erogo yukneragagi.

⁵ Anderogo atma, At Ala ovavut sek ako hak hit henovavut anderogo aruguluk, henanye erogo okhidugu dogones. Hit henendawi Ala ovaga vanggabaluk avyarat umbutu dugwit, sek ogarit nagu dogoguluk, okhidugu dogones. Eke, sek ogarit nagu dugwit, yi wene ndi wene hinilup okhidugu dogones.

⁶ Eke, yi wene ndi wene hinilup okhidugu dugwit, henendawi werek okhidugu dogones. Eke, henendawi werek okhidugu dugwit, anggin henovaga agya hegek, henendawi wadokdek dogop okhidugu dogones. Eke, henendawi wadokdek dogop okhidugu dugwit, Ala endawi ombasiga menda ogaruguluk, okhidugu dogones.

⁷ Eke, Ala endawi ombasiga menda ogagu dugwit, naswe-haswe okhidugu dogones. Naswe-haswe dugwit, atok vaga avakwa ovok erogo hinim henendawi hunik okhidugu dogones.

⁸ Ogagu dogop ako menda ovogat evenuk erogo ogarit lagu hiniselok, Nenowa Inis Ombok Yesus Keretus hinilup agipik ako, un enam warogo hinilup dogosogombuk, ata enggen sek menda ombok erogo yugu dogosogom.

⁹ Eke, hit anderogo ogagu dogop yukhirigi ako ogagetek hiniselok andi, “Nit endak weyak ogagu lagagup ako, Ala en degerogo bininggigi,” embetetek hinunggut akluk agipik atma, ap inil mbuk hwiserek ovagak agipik.

¹⁰ Andi halok, nowa-nasin. At Ala en adik enogo bininggu lagagirik, heneyanggup yukheragagi atma, yedok hinisapwak yiluk, henanye okhidugu dogones. Anderogo ogagu dogosogon halok, hinisogavit nggwes erogo nggedek wambusogombuk o.

¹¹ Andi ogagu dogosogon halok, nenagap wendakninivisiga Nenowa Inis Ombok Yesus Keretus avema bisaligama mondok-mondok agarikmu akoma, At Ala en, “Hit andok okhedomanes o,” yiluk, hai warogo wokhinivisogon.

¹² Anderogo atma, avyarat wene Yesus avok ako henaruk hobaluk wugu lagagupik, mondok wadokdek agipik ovara, hegek, ambi inim dibaluk ogarit lagu dogovovok yiluk, anen ndugurek-ndagarek yukheregek adigat ogagya dogosogon.

^13-14 At Nenowa Inis Ombok Yesus Keretus en an nagamut eravo valek ovagak yi, vage nggolalogo baluk, laup sigam yuknigas ako wane-wane, nagamut nggolalogo baup ako vage horok yi nilup atma, an nagamut nggolanggitek ao niluk wedek iri dugwit, yi wene ndi wene yukheraliga ako hit hinilup dogovovok yiluk, an yukhirigya dogop andi, segat ombasiga o.

¹⁵ An hambigya neyagek, hiren, “At nenasin akoen wene anderogo yukneragagi ako,” yiluk, henape wenggenggu dogovovok yiluk, an ao hambegetek dugwit, yi wene ndi wene yukheraliga ako, mondok sat nenggetek-at yukhirigya dogosogon.

Keretus elese adik ogagya hagagup wene

¹⁶ Nit Nenowa Inis Ombok Yesus Keretus, anye werek warup wene yukheragagup ako andi, wene mupilin it avakwa en enendawi wenggelogo yugu dugwit, enane agil-amok yagalagwi menda ako vaga nenendawi vanggabaluk yukhirugu lagetek. Ata, At Yesus Keretus mondok siyalek abinak werek ninil enggen mudis en hugu lagagurik, yukheragagup.

^17-18 Nit Keretus ninim ndom alonedok erek akovaga unggu lagagurik, werekma, At mondok siyalek abinak werek Nenasin Ala akoen Nenowa Yesus Keretus agayuk wurogo siyabagagi. Siyabagya dugwit, “An Nabut nendawi hunik nadenggen okbaniliga ako yi aro,” yiluk, mbogot vaga en ane iris ako nirat nenaruk hunggu lagagurik, yukheragagup.

¹⁹ Anderogo yagagi halok, o muk it ap navi-navi Ala en wene yugirigya hegek yugurugu lagagwa ako atma des yi wagek adigat ogagya hugu lagagurik, nit nenendawi avyarat ombasagwi ako, mondok wadokdek okbininggya hagagup. Andi halok, ao o hup yanggo yegetek hegek, hali abya lambu yevetbagipikmu awiya ogasiga hak, wene andi henendawima dibaluk, wugu dogones. Anderogo werekma, o yanggo yigiluk, huvuget mudu-mudu daga wagya hegek, dadiwap ambiat abinak herek-damok iri helagwi ako hak, At Keretus henendawima awiya okhinivi warisogon.

²⁰ Wene yi andi, mondok iya atma, dibas. Ap ambi Ala Averiniki en hologo yugigitek hegek, “Ala wene dirup warek ako, nendawi wenggebaluk, ambi yukherayogon o,” yiluk, yup andi, mondok meyan.

²¹ Anderogo halok, it ap endak Ala wene yugurugu lagagwa navi-navi akoen, enendawi wenggebaluk yugurugu lagetek. Ata, Ala Averiniki enendawima des yi nunggwigya halok, Ala en yugirigya hegek yugurugu lagagwa ako, hinilup arovovok yiluk yukheraliga.