2 Korindus 9 - ALA WENE HIVIS DIRUP WATUGWA

It Yerusalem menda enake yoparip wongganggugwa wene

¹ It Ala aburi adik denek o Yudea menda yonggar-inivup wene ako, nit dirup ambi inim warogo wokhera warup dek ovara, horok maduk hivis atok vaga yiat yukherasogom.

² Hit Korindus menda henendawi en yonggar-inivup ombasagwi ako an ovok nilup. Anen it Makedonia menda yugirigya dugwit, “Tahun endak ako vaga it o Akaya menda en Ala aburi o Yudea menda yonggar-inivup enendawi adenggen wisane umbutugwa o,” yiluk, it o Makedonia menda inivaga hit umbutugup ako wogobugugu dugwit, yugeragagis. Yugirigya lagagimu, it Makedonia menda nin wisane en, “Nit ogo wane-wane wogerasogom o,” yiluk, umbutugwa.

³ Anen hit Korindus menda wogobugugu dugwit, Makedonia menda yugeragagis ako, “Yi un hulugat yagas,” ombaruguven, an nane yagagis ako avyarat ombarupwak yiluk, wonggalup umbutugup ako waup yiluk, irat lakbisa wagi andi.

⁴ “Hit avyarat wonggalugup,” hinimbita dugwit, yugeragagis ako, an it Makedonia menda ninim bikhinisa wagu dogomindik, “Yi wonggalek dek hegek yukneraga higyo,” umbutuselok, hit hinim nenanggadi arugwi en, hodorogo wongganggu dogones.

⁵ Anderogo atma, endak, hit yi menda ndi menda wonggalup yiluk yuknugugup ako, “Yi un enanggon umbutu dugwit, wongganggubuk. Ata, enabwa en enendawi adenggen umbutu dugwit, wongganggao,” henombarupwak yiluk, an ao wagetek neyagek, it ap andien wonggalek ako wongganggu dogopwak yiluk, lakbisa warup sek imbiti.

⁶ Wene yi, dibagu dogones. Ap ambi saen yavup okbaluk awiangge ambudumat yatya halok, enggen ambukumat mbalhidigya, eke, ap ambi saen yavup okbaluk awiangge wisane yatya halok, enggen wisane-at mbalhidigya, ogasiga.

⁷ Anderogo ogasagwi atma, it avakwa enendawi adenggen vaga woguruguselok, Ala endawi hunik oginivisiga atma, hit wogurugu dugwit, henendawi anggin hegek wogurugwi, mondok henanggon embetek wogurugwi, ogagu dogobuk. Ata, henadik-henadik henendawi wenggebaluk en adenggen vaga wogurugu dogones.

^8-9 Ala wene ambi iri dugwit: “Enangge dek iniselok, At angge wogeregek landiga, sek adigat okbigik lendagwi ako yelemele yisogonbuk, mondok ape wenggelek-at dogosogon,” yiluk, dirup warek ako wane-wane, hit henendawi adenggen vaga wogurugu hiniselok, Ala henabwa en hit, “Andi menda hogop,” umbutu hinigik, ao embetetek menda inim wisane erogo ndugurek-ndagarek wokhirigya dogosogon. Anderogo atma, hit yi menda ndi menda dek yiluk, ambi hogop ombarusogombuk. Ata, avakwa enabwa en yonggar-inivup yiluk, umbutu hiniselok dek ambi dek, werek adigat hugu dogogup.

¹⁰ It ap awiangge yasagwi menda en yarupwak yiluk awiangge homalogo bagya, eke, erom eyave endarupwak yiluk hoda erogo bagya, ogasiga andi Ala-at. Arenen hit ogo, avakwa yonggar-enovovok yiluk, awiangge ovagak wonggalogo ombok erogoat wokhirigya, eke, erom eyave endarupwak yiluk, hoda erogo baliga hak, avakwa enabwa en wogorugu hiniselok, Ala en ombogat wokhirigya, ogagya dogosogon.

¹¹ Henanggidik-dek dugwit, avakwa wogeregek nagu dogovovok yiluk Ala en hit hininggis werek okbugugu dogosogon. Eke, nit yukherelagwi hobaluk, henanggidik-dek dugwit, wogerelagwi atma, it avakwa wisane At Ala, “Wa, wa,” yugu dogosogom.

¹² Avakwa enabwa umbutu dugwit, wonggalogo wogerelagwi ako andi, it Ala aburi anggin enovaga agarik ako, dek agya, eke, it avakwa wisane en Ala, “Wa!” yiluk, heyaga watwis, ogarusogom atma, yonggar-inipu dogop sek aro.

¹³ Hit Keretus ogagya lagagi Sek Wene avyarat ombakluk wugu hinigis ako wane-wane ogarit nagwis, eke, henanggidik-dek dugwit, henangge it avakwa ovok o Yudea menda inim yonggar-inupwis, ogasagwi vaga, henavut mbabaluk, “Ala aburi avyarat inigup,” yiluk, Ala inis siyabagu dogosogom.

¹⁴ Ala henabwa en mondok iya erogo okbugugu hegek, henanggidik-dek dugwit, henangge it avakwa yonggar-inupu hiniselok, it avakwa enendawi hunik okhinipu dugwit, henake samban ogagu dogosogom.

¹⁵ Ala nenabwa en mondok iya erogo wokneragagi ako mbilinogo yup meyan atma, At adigat, “Wa, wa,” yugugu dogosogom.