2 Korindus 7 - ALA WENE HIVIS DIRUP WATUGWA

¹ Anderogo atma, naswei nendawi hunik. Ala en wene nggatuk erogo yagagi yi ako, nit niniselok-at yukneragagirikmu, nenendawima en weyak ogarup adigat umbutwi, eyave-at ogagwi, ogasagwi ako ovok erogo hekbaluk, Ala nenalon umbutu dugwit, weyak ogagetek At ake denek sek adigat ogagu ninisapwak yiluk, ogagu dogosogom.

Paulus endawi adenggen imbitigi wene

² Henendawi sek vaga nit neneyave woknenombavovok yiluk, yukherelagwi. Niren hit ambi adem dek hegek weyak henovaga okbigigitek, sup weyak vaga nomalhinipitek, eke yewes erogo okhinipitek, nit anderogoat agurik.

³ “Hit hinim nenendawi mondok hunik atma, ninim hambugwi, ninim niniluk dugwit ogarit nagwis, ogagu dogop andi sek aro,” yiluk, endak yukheragagup atma, wene yukherelagwi andi, hit weyak okbininggu hiniselok, yukherelagwidek. Ata, unat yukherelagwi.

⁴ An nendawima en, “Hit sek ogarusogom,” hinimbita lagirik, nendawi adenggen imbita dugwit, yukheraliga. Anggin-mbanggin nenovaga agya hegek ovara, hit avyarat ombakluk, ogarit lendagwi vaga nendawi aik wakbanilagwima, “Hit yi, iya,” yiluk, nendawi adenggen mondok iya erogo okneraliga.

⁵ Nit o Makedonia nunggu wagu lagagurik, anggin mondok iya erogo nenovaga agya lagagimu, neneyave aburuk sat yanggalup mondok degat welagagup. Wenemuk yagalagwi vaga anggin nenovaga agya, “Nggarogo oklarimi,” yiluk, nenalon okninipu, ogagagi.

⁶ Ogagya hegek, it avakwa enendawi wakhiduguselok, enendawi aik wakbisaliga menda Ala akoen, nit nenendawi aik wakbininapwak yiluk, ap Titus lakba waga.

⁷ At eyave nadema waga andi vaga adigat dek. Ata, hiren at endawi aik wakbagagup vaga at wagya lagarik, nendawi aik wakbani waga. Eke, hit yokneya warup, “Ai,” ombasagwi ako inim, hit endak ogagagup vaga henendawi wakhedelagwi ako inim, eke, an navok mbangguselok, henane anye vaga an nanggangga welagwi ako inim, ovogat mbilinogo yukneraga andi vaga, nendawi aik wakbenanggarikmu, yogak nendawi adenggen wisane haliga.

⁸ An dirup warogo lakbigiga wagagis ako bikhugu lagagupik, “Ai,” yiluk, henendawi wakhedagagup ako hunggu lagagirik, “Dirup warogo lakbisaup dek hegek ogagi ai,” yiluk, an ogo nendawi wakhedagagis. An nendawi wakhedagagis ovara, nendawi imbita dugwit, “It enendawi mondok-mondok wakhedelagwi andi dek. Ata un ndugwis ambiat enendawi wakhedagao,” imbita lagirik, “Andi halok, segat dirup warogo lakbogogis higi,” imbiti.

⁹ Eke, yogak andi, nendawi adenggen imbita dugwit vok yagaliga. Hit henendawi wakhedelagwi vaga an vok yagaligadek. Ata, an dirup warogo wokheragagis ako bikhugu lagagupik, “Avyarat yukneraliga higyo,” yiluk, henendawi wakhidugu dugwit, henasam helok weyak menda hekbagagup andi vaga, an nendawi adenggen imbita dugwit vok wisane yukheraliga. At Ala ombasiga wane-wane hit avyarat henendawi wakhedagagup atma, dirup watigis andi vaga nit weyak ambi okbigigitek-at ombasagwi.

¹⁰ It wen vaga menda en enangge idi menda ambi dek agya halok, enendawi wakhedegek lagu dugwit, atok vaga hambit lendagwi. Anderogo ovara, nit andi, Ala en, “It enendawi wakhedapwak,” yiluk okbininaliga ako andi, nit weyak ogasagwi ako nenasam helok, mbobagu niniselok, Ala en nenagap wendarogo niniluk dogosogom yiluk, okbininaliga. Anderogo atma nenendawi anderogo wakhedelagwi andi, segat yiluk, nit nenendawi uwa mbalusogombuk.

¹¹ Hit henendawi wakhidugu lagagupmu, Ala en okbigigigi ako dibagu dogones. Hit ogagagup ako andi, henendawi wakhidugu dugwit, weyak henanggelekma agarik ako hodorogo amot ogagwi, “Weyak menda mamulhedagao,” henombaruguven, hodorogo henawene amburup mbalhidugwi, weyak ogarup ako, mondok henanggon umbutwi, henalon agwi, “Nenasin Paulus nenadema warup ai?” umbutwi, henendawi adenggen vaga ogagwi, weyak ogarek hodorogo owak dinggwis, ogagagup. Hit andi ogagagup vaga weyak ambi ogagetek segat ogagu hinugup.

¹² Anderogo atma, an dirup warogo lakbigiga wagagis ako andi, at weyak ogagagi ako inim, at weyak okbagagi ako inim, it enake adigat andi, dirup watitek. Ata, hiren henendawi hunik ninumbutu dugwit, yukherelagwi ako hodorogo-at dibaluk ogagwi Ala en hinisapwak yiluk, dirup andi, warogo lakbigiga wagagis.

¹³ Wene mbikit amot ogagagup, andi vaga nenendawi adenggen wisane ombasagwi. Andi ao umbutu ninigik, at Titus endawi modo erogo aik wakbagagup andi vaga, adenggen wisane imbita dugwit, nit yuknera wagya lagama, nit ogo nenendawi adenggen wisane imbito.

¹⁴ Anen endak Titus yugugu dugwit, “It sek ogasagwi ako inisayogon,” yiluk, siyabugugu lagagis ako hit wane-wane ogagagup atma, an nanggadi agetek. Niren yi wene ndi wene avyarat halok adigat yukhirugu lagagup hak, at Titus yugugu dugwit hit siyabigigugup andi ogo, avyarat yugogogup.

¹⁵ At Titus endak henabwa imbita lagagi ako, yogak henabwa iya erogo ombasiga. At henadema lagya lagagimu, henalon en agayuk wutu dugwit eyave wagagup. Eke, amot ogarup yukheragagup ako, “Sek,” yiluk, mbikit amot ogagu henogogi. Ako, ape wenggelek dugwit, at Titus yogak henabwa iya erogo ombasiga.

¹⁶ Hit ogarit lendagwi ako ovok erogo sek adigat ogarit nagu dogogup avyarat hinimbita dugwit, an nendawi sek adigat henombasiga.