2 Korindus 6 - ALA WENE HIVIS DIRUP WATUGWA

^1-2 At Ala en yugugu hegek Yesaya en dirup watigi ako iri dugwit: “Anen hit henane naruk hulup imbitigis vaga, naruk hunggu, Hat hagap wendarup hudi vaga yonggat-heyagya, ogagagis o,” yiluk, yagagi. Anderogo yagagi atma, hit ninim Ala eyavup ndatak ogarit lagu ninigik, At nenabwa en sek okbininaliga ako, “Un enam warogo okbisaliga higi,” hinimbita haoen, nenendawi, “Ai,” umbutu dugwit, wene yi yukherelagwi. Hit henane aruk hulup imbitigi ako andi, yogak aro, eke, henagap wendarup imbitigi ogo, yogak atma, yukheraliga.

Paulus melen anggin enovaga agagi wene

³ Nit ambi ogarusogom vaga yidup iri halok, wene yukhirugu dogop andok okbininggigi ako, weyak erogo bagu saoen yiluk, nit mondok dibaluk ogasagwi.

⁴ Yi menda ndi menda ogagu dugwit, nit avyarat Ala ayelomani yedok ninigu dogopwak yiluk, nenendawi horaik dugwit, mondok dibaluk-at ogarit lendagwi. Anggin-mbanggin nenovaga agya, yi weyak ndi weyak okbininggu, “Nggarogo ogaruk,” yiluk, nenendawi anggin okninipu, ogagya hegek nenendawi sagain dugwit welagwi.

⁵ Avakwa en yo yawi vaga ninitwis, heda marogo lembaga mabinunggwis, it ap ovok en enane wonggalogo ninitwis, ogasagwi. Okninipusigik, sakdida okninipu, nogo sek erogo yup ako dek agya, erom nenendawima uvup okninipu, okninivisiga.

⁶ Anderogo okninipu hegek, nit nenendawi mondok sek vaga yukhirugwi, wene nit ninilup akoat hit hinilup okbugugwis, nenendawi sagain dugwit henabwa en sek okbugugwis, ogasagwi. At Ala Averiniki nenendawima dugwit, nenanggon embetetek avakwa avyarat nenendawi sek hunik okbigik nelagwi.

⁷ Anderogo ogagu dugwit, Ala anye vaga avyarat wene yugeregek nelagwi. Nit sek adigat ogasagwi ako, yegen-segowa ndatak nininggimu venak-venak vagago dugwit Ala andup ogarit nelagwi.

⁸ It ninen siyabininggwis, nenavok sek yugwi, yugusigik, it ninen sovabininggwis, nenavok weyak mbanggwis, yagalagwi. Nit avyarat adigat halok yagalagwi ovara, “Hit huluk yagalagwi,” yiluk, nenovaga bininelagwi.

⁹ Avakwa ovok erogo nit inilup ovara, it ninen ‘Ap yi sa o,’ yiluk, yagalagwi. Nit hambupwak yiluk okninivisagwi ovara, niniluk agurik. Ninirisagwi ovara, ao hambegetek-at agurik.

¹⁰ Nenendawi ut yunggup yagaliga ovara, hegek adenggen adigat umbutwi, nininggidek ovara, it wisane ininggis werek okbugwis, nenangge dek ovara, yi menda ndi menda ovogat nininggimu arit wagya, ogarit nelagwi.

¹¹ Hit ap Korindus menda wai. Nit henabwa umbutu dugwit nenendawi okninivisiga ako ambi hekbagetek ovok erogo vagalogo yukherelagwi.

¹² Nit mbup yegetek nenendawi hit hinim hunik okhinivisagwi ovara, hit henendawi nit ninim ari warup andi meyanat hiniselagwi.

¹³ Anderogo atma, hit nit nenendawi hunik okhinivisagwi anderogo wane-wane, hit henendawi nit ninim hunik dogoguluk, an hit henasin naburi atma yiluk, yukheraliga.

It avakwa avyarat embetetek halok, “Ninim nenendawi ambiat aro,” yiluk, ugun hinim nagu dogop moga wene

¹⁴ Hit Ala ovaga vanggabaluk avyarat ombasagwi menda andi, it avakwa avyarat ombasagwidek menda halok, “Ninim nenendawi ambiat aro,” yiluk, ugun hinim nagu dogobuk. It sek ogasagwi menda inim, weyak ogasagwi menda inim, inim dambulik dugwit, ogagu dogop sek ombasagwi? O awiya inim, o hwiserek inim, mberen dambulup sek ombasagwi?

¹⁵ Keretus iri halok Sile en, “Sek,” iris, eke, Sile iri halok Keretus en, “Sek,” iris, yagalagwi ombasagwi? Eke, it avyarat ombasagwi inim, avyarat ombasagwidek inim, nano vaga enendawi ambiat okbaluk, dambulik dogop ombasagwi?

¹⁶ Ala awi valekma en ogasagwi inim, madis awi valekma en ogasagwi inim, andi iperen wane-wane ogasagwi atma yiluk yagalagwi? Nit neneyave andi, Ala iluk agarik awi valek agurik. At Ala en iri dugwit: “An enendawima dugwit, enanggelekma nagu dogosogon. It An naburi-at agwi, eke, Anen it Enasin-at agya, ogarisogon,” yiluk, yagagi.

¹⁷ Eke Nenasin en wene ambi iri dugwit: “Anderogo atma, avakwa enanggelekma en wulumanes. Wulu wagu dogomundik, henadik denek dogop. Weyak menda ambi hininggis vakhegetek wulu wagu hiniselok, An wokhinupu dogosogon,” yiluk, yugeragagi.

¹⁸ Eke, ambi, At Anye Adigat Agarik Nenasin Inis Ombok akoen iri dugwit: “An andi Henasin agya, eke, hiren An naburi avivak inim, hwiyavivak inim, agwi, ogarusogom o,” yagagi ako wane-wane, it avakwa avyarat embetetek halok, “Ninim nenendawi ambiat aro,” yiluk, ugun hinim nagu dogop moga.