2 Korindus 5 - ALA WENE HIVIS DIRUP WATUGWA

Neneyave mbogot vaga menda yikbininaup wene

¹ O wen vaga yoma neneyave o eravo valek hak yi, mbugup-mbugup wambigya halok, avoloma ambi mbogot vaga menda valek agarik ninilup aro. Mbogot vaga menda valek andi, avakwa en valogo bininggitek. Ata, Ala enat valogo bininggigi atma, mondok-mondok-at dogosogon.

^2-3 Neneyave mbogot vaga menda ako ao yikbininggitek hegek, nenagap mbedan ninisagwi en yiluk, o eravo valek hak neneyave endak menda yi, degerogo baluk, avoloma mbogot vaga menda hodorogo yikbininapwak dek, “Ai,” ombasagwi.

⁴ Nit nenagamut endak wen menda yi, “Nenanggon,” yiluk, hekbaluk, un nenagap mbedan dogop ombasagwidek o. Ata, niniluk mondok-mondok dogop menda okbininggu dugwit, swi menda hodorogo okbininapwak dek “Ai,” embetek nagu dugwit, o eravo endak valek yi vaga anggin hegek-at nelagwi.

⁵ Niniluk mondok-mondok dogop menda okbininaup yiluk, nenendawi dikduk erogo bininaliga ako andi, Ala aro. Nit niniluk mondok-mondok dogop menda okbininaup andi, “Avyarat okbininayogon,” ombarusogom yiluk, Ala Averiniki nenendawima mabininggigi.

^6-7 Neneyave endak menda yi, hegek Nenasin werekma nunggusogombuk andi, ninilup-at agurik. Ala en, “Okbigigayogon o,” yagagi ako ninil helok ogasagwidek. Ata, ninil hegetek dugwit, avyarat ombasagwi vaga, ndugurek-ndagarek nenendawi seyalek adenggenat agurik.

⁸ Neneyave endak menda yi, hekbaluk, Nenasin werekma, mondok-mondok inim dogop hogop wisane ombasagwi ovara, nenendawi seyalek adenggenat agurik.

^9-10 Anderogo atma, neneyave yi, hambegetek dugwit, sek-weyak ogagu lagagup ako, Keretus en hivis nenowak dilogo onggo wane-wane wokneragiluk, nit ovok erogo At adema wonggalogo bininayogon. Anderogo atma, neneyave yi, niniluk dugwit halok, hambugu dugwit halok, Keretus endawi sek ombarupwak yiluk adigat ogarit laup ombasagwi.

Keretus en Ala inim dambubininggigi wene

¹¹ Nit Nenowa Inis Ombok nenalon ombarup ako ninilup atma, yi avakwa ndi avakwa Nenowa Yesus avyarat ombarupwak yiluk, yugerelagwi. Nit nenendawi nenovavut nggarogo dugwit, yugerelagwi ako andi, Ala ilup. Eke hit ogo, henendawi en “It Paulus melen enendawi anderogo aro,” nenombasagwi, ombasiga.

¹² Nit wene yukherelagwi yi ako andi, nit ap iya atma, hit woknenombavovok en yiluk, ambi inim yukherelagwidek. Ata, it ninen avakwa enandogon dombabigitek dugwit, enelose enugu dugwit adigat iya ombasagwi akoen nenavok mbangguselok, hit mbup yubuk. Ata, “Nenasini atma,” yiluk, nenanggangga wugu dogovovok yiluk, yukherelagwi.

¹³ Nit yugurugwi vaga, “Hit ap nenek ovagak,” yiluk, yuknirugusigik ovara, Ala ake ogarit nagu ninigik, yuknerelagwi atma, segat. Eke, it ninen “Ap enendawi werek dugwit, yuknerelagwi,” yiluk, yuguselok andi, hit henake yiluk, yukherelagwi atma, segat.

¹⁴ At ambi nit avakwa ovok nenavoloma hombagagi ako vaga nit ovok erogo ninimat hombagagup, avyarat ombasagwi. Keretus endawi hunik enat okninipigi atma, At eyavup ogarup andi, nit mbup yegetek ogarup adigat okninivisiga.

¹⁵ Eke, nit ovok nenavoloma hombagagi ako andi, nit niniluk agurik yi nenadigat nenake ogarit nagu dogopwak yiluk, hambegetek. Ata, At nenake hambigya lagagimu, iluk erogo mondok okbagagi ako, ake ogarit nagu dogosogom yiluk, nenavoloma-at hombagagi higyo.

¹⁶ Anderogo atma, it avakwa wen vaga menda en, enelese dibisiluk sek umbutu dugwit yugerelagwi hak, nit anderogo yugerelagwidek. Eke, endak andi, nit Keretus anderogo o, yiluk dibagetek dugwit yugu lagagup hak, yogak nit anderogo yagalagwidek.

¹⁷ Ap ambi Keretus inim hunik agarik halok, at endawi swi menda okbagarikmu, ovavut endak menda ako dek agya dugwit, avoloma endawi swi menda arisogon.

¹⁸ Yi menda ndi menda andi ovok erogo At Ala enat okbininaliga. Ala ninim ogorek welagagup ovara, Arenen Keretus ogagagi vaga dambubininggigirikmu, nit Ala ninim dambubininggigi wene yi, yugurugu dogopwak yiluk, andok okbininggigi.

¹⁹ Wene yugurugu dogopwak yiluk andok okbininggigi ako andi, yerogo: At Ala en yi avakwa ndi avakwa ovok At ane saganggusigik ovara, Keretus ogagagi vaga, At inim dambubininggigi. Dambubinunggu dugwit, nit weyak ogasagwi ako inggis dinggilisigadek. Aren anderogo ogasiga wene ako andi, niren yugeregek nagu dogoguluk, andok okbininggigi.

²⁰ Anderogo halok, nit Keretus avoloma ane wolok yugeregek nelagwi. At Ala en ane anye erogo yukheraup hak nirat nenane anye erogo yukherelagwi. At Yesus inis vagalogo “Ala hinim ogorek dogobuk. Hinim dambules,” yiluk, nirenen yukherelagwi.

²¹ At Ala en nit Keretus ninim hunik ninigu dogomindik, “Ap yi, endawi sek sagain-at higi o,” yiluk, woknenombapwak yiluk, Keretus weyak ogagya lagetek ovara, nit nenomaduk ako At ovaga lobalogo bagagi.