2 Korindus 4 - ALA WENE HIVIS DIRUP WATUGWA

Idi menda sogolowak vaga yidik wene

¹ Anderogo atma, At Ala aigwak aberen, nit At eyavup yi ogagu dogoguluk andok okbininggigirikmu, nit nenendawi uwa betaluk, mbuverek dogosogombuk.

² Nit andi, avakwa en yi menda ndi menda hwilago weyak ogagu lagarwik enanggadi asiga andi menda nit hekbagagup. Anderogo hekbaluk, avakwa enambukmu unggwi, Ala wene hegek adik huluk wene molalogo yukhirugwi, ogasagwidek. Ata, it avakwa yoma enendawi nit sek ogasagwi ako sek ninisapwak yiluk, wene eve wene Ala ivaga selekma-at yugeregek nelagwi.

³ Nit Sek Wene yugeregek nelagwi ako it ninen yedok helagwi ovara, it nin avyarat embetetek dugwit, enelose degerogo bisayogon akoen wene andi, hwilago atma, yedok hegetek-at agarwik.

⁴ It avakwa wema menda enasin Sile akoen, it Ala avyarat embetetek menda andi, enendawima o hup ovagak okbogogi. It enendawima o hup ovagak okbogogirikmu, irenen Sek Wene awiya okninivisiga ako yedok hegetek agarwik. At Ala elose wane-wane mondok siyalek Keretus wene ako, mondok dibagetek-at agarwik.

⁵ “Nit ap iya o,” yiluk, ogasagwi menda mbilinogo yukherelagwidek. Ata, “At Yesus Keretus andi, Nenowa Inis Ombok atma, At adigat mondok iya,” yiluk, yukherelagwi. Eke, nit ogo, “Yesus ake yiluk, hit henayeloman aro,” yiluk, yukherelagwi.

⁶ At Ala en iri dugwit, “O hwiserekma awiya arupwak o,” yiluk, awiya ogagagi ako hak, Aren nit nenendawima awiya okninipigirikmu nit nenendawima andi, awiya-at agarik. Eke, Ala en anderogo ogagya dugwit, nit Keretus elose dibaluk, Ala mondok abinak siyalek agarik ako yedok hugu dogopwak yiluk, nenendawima awiya okninipigi.

⁷ Nit Sek Wene yugeregek nagu dogoguluk Ala en andok okbininggigi ako, wene mondok idi menda andok okbininggigi. Wene mondok idi menda andok okbininggigi ovara, is sogolowak wen vaga ogarek nudik ovagak idi menda ako nit neneyave ndaik nenanyedek menda yidibininggigirikmu agurik. Andi vaga en, avakwa inil ninigu dugwit, enendawima en, “Yi avakwa enanye vaga ogasagwidek. Yi Ala mondok anye wisane vaga-at okbigik landiga,” yiluk, sigam hugu dogosogom.

⁸ Yi wene ndi wene sagambit erogo bininelagwi ovara, sovalogo bininelagwidek. “Nggarogo ogaruk,” yiluk, nenendawi anggin agurik ovara, nenendawi ut yunggup yegetek at agurik.

⁹ Nit anggin-mbanggin erogo bininggusigik ovara, Ala en hekbininaligadek. Eke, ninirisagwi ovara, neneyave hambisagwidek.

¹⁰ Nit neneyave okbinunggwis andi vaga, At Yesus watu lagagwama, hombagagi ako wane-wane, nit ogo wane-wane hutun-howam neneyave ninitwis vaga hambisagwi ovagak ogasagwi. Andi vaga en, nit neneyave vaga At Yesus hambigya lagagirik, iluk agarik ako, avakwa yedok hasogom.

¹¹ Nit niniluk dugwit, Yesus ake ogasagwi vaga avakwa hutun-howam neneyave ninirisagwi. Andi vaga en, nit neneyave hambisagwi yi vaga Yesus hambigya lagagirik iluk agagi ako yedok hasogom.

¹² Anderogo atma, nit wene yukherelagwi andi vaga, neneyave ninitu selok, hambugu ninigik ovara, hit andi, welagwi vaga hiniluk okhinivisiga.

¹³ Ala wene endak dirup warek vaga at ambien iri dugwit, “Nendawi hovaga vanggabaluk avyarat hombasiga atma, nane yigi o,” yiluk, yagagi dirup warek agarik. At andi avyarat ombakluk yagagi wane-wane, nit ogo Sek Wene avyarat umbutu dugwit, yagalagwi.

¹⁴ At Ala en Nenowa Inis Ombok Yesus iluk erogo mondok okbagagi akoen hivis nit wane-wane niniluk erogo mondok okbininggu dogomindik, Yesus ninim dogosogom yiluk, hit ninim At adema binina layogon ninilup atma, Sek Wene andi, mondok avyarat umbutu dugwit, yagalagwi.

¹⁵ Anderogo atma, anggin nenovaga asiga ovok erogo andi, hit henake-at okbininelagwi atma, segaro. Ala nenabwa en sek okbininaup wene at ambi yugigik, at ambi yugigik, ogarit mbigaliluk lagya vaga it avakwa wisane Ala, “Wa,” yiluk, At inis siyabapwak yiluk, okbininelagwi atma, segaro.

Avyarat umbutu dugwit, ogarit lagu dogop wene

¹⁶ Anderogo halok, anggin nenovaga asiga ovara, nit nenendawi uwa betaluk, mbuverek dogosogombuk. Ogarit lagu dugwit, nenagamut ndaik arit nunggwisiga vaga hambup ovara, nenendawi ako andi, hutun-howam niniluk swi menda okbinilin nunggwisiga.

¹⁷ Yogak anggin-mbanggin novaga asiga yi, hivis okbininaup wane-wane mondok dek. Hivis okbininaup ako andi, yogak anggin nenovaga asiga andi vaga, nit siyabininagwi ako mondok-mondok siyalek-at dogosogom. Anderogo atma, yogak okbininelagwi yi, “Un sidok madugat okbininelagwi,” ombasagwi.

¹⁸ Nit yi menda ndi menda ninil helagwi andi, dek asogon atma, nenendawi yi vaga vanggabaluk, agurikbuk. Ninil helagwidek ako menda halok andi, mondok-mondok agarik atma, nenendawi andi vaga vanggabaluk agurik o.