2 Korindus 2 - ALA WENE HIVIS DIRUP WATUGWA

¹ Anderogo atma, an hit henadema wakluk, henendawi weyak okbigigagwisen yiluk, mbup yisogon yiluk, nendawi imbitigis.

² An nendawi wakhidigya neyalok, nendawi aik wakbanup hiratma, nendawi weyak dugwit henadema wagya dogomindik, mbetherami vaga hit ogo henendawi weyak agyama, sanien an nendawi aik wakbanup? Mondok dek aro.

³ Dirup endak watigis ako andi, an nendawi adenggen neyalok, hit ogo henendawi adenggen dogop andi an avyarat nilup. Nilup atma, henadema wagya dogomindik, hit sek ogasagwi vaga nendawi adenggen henombarup ovara, weyak ogasagwi vaga nendawi wakhedaup atma yiluk, mbup iri dugwit, dirup adigat endak warogo lakba wagagis ako aro.

⁴ Nendawi anggin ndun yi nunggwigya dugwit, nendawi wakhidigya, henayup wisane yagya, ogagya dugwit, hit henake dirup watigis ako andi, hit henendawi weyak arovovok yiluk dirup warogo lakbigiga wagatek. Ata, henabwa iya erogo ombasiga hinilup arovovok yiluk dirup watigis.

Ap ambi weyak ogagya halok, weyak ogagagi ako degerogo baup wene

⁵ At ap weyak ogagagi ako vaga nit nenendawi wakhedelagwi ako andi, an nadigat dek. Ata hit nin wisane weyak okbigigu halok, henendawi wakhedelagwi. An yukheraliga yi andi, nane aguruk vaga yukheraligadek, avyarat yukheraliga.

⁶ Hit endak heneyave wisane en ap ako weyak onggo okbagagup andi adigat dogopwak en hekbas.

⁷ Yogak yi vaga, ap ako endawi uwa mbalogo ut yunggup iri dugwit hekbigigiluk wulugwi en, weyak ogagagi ako degerogo bagu dogomundik, endawi aik wakbagu dogones.

⁸ Henendawi eyave vaga at abwa wisane umbutu dugwit, henendawi hunik ogagu dogovovok yiluk, yukheraliga.

⁹ An dirup hit henake watigis ako andi, yi ogarup ndi ogarup yukhirigya neyalok, “‘Sek o’ yiluk, wane-wane ogagu samwi a, ata hekbagu samwi a?” yiluk, henavut mbaligiluk dirup watigis.

^10-11 It avakwa weyak okbigigelagwi ako hiren it weyak ogasagwi ako degerogo bugu hiniselok, an ogo, it weyak ogasagwi ako degerogo bugu dogosogon. Ap ambi weyak ogasiga degerogo baup menda werek halok, at Sile en ogarup endawi wenggelisiga ako nit ninilup atma, Sile en, “Nanonggal aga o,” yiluk, nenendawima mali wagya haoen, anen henake At Keretus ivaga weyak ogasiga ako degerogo bagagis.

Paulus o Teroas endawi anggin welagagi wene

¹² An Sek Wene Keretus avok yugeragiluk, o Teroas wagya lagagirik, Sek Wene yugirigya dogogiluk, Nenowa Inis Ombok en sup hutbaninggya hagagis.

¹³ Sup hutbaninggya hagagis ovara, naot Titus nadoma wagetek welagagimu, nendawi anggin dugwit, it avakwa Teroas menda heyaga wakbisiluk, o Makedonia yoma-at wagagis.

Sek wene Keretus avok ako amben sek menda ndatak agarik wene

¹⁴ Yoma wagya lagagirik, werekma, Ala en hekbanenggetek. At Keretus ayegen inis ombok siyalagya lagarik lagyaim, nit At ninim hunik menda Ala en Keretus ambetaga wokniniviluk landiga, yiluk, “Nenasin Ala wa,” yiluk, mondok inis siyabagu dogosogom. Amben sek menda wigaliluk landiga ako hak, Sek Wene Keretus avok ako nit vaga en wigaliluk lagya dogopwak yiluk, Ala en okbininaliga.

¹⁵ It avakwa enagap wendarek inim, enagap wendarekdek menda enelokwe degerogo bisaliga inim, enanggelekma dugwit, amben sek Keretus en Ala ake hali hunisiga menda ako wane-wane nit aro.

¹⁶ It avakwa enelokwe degerogo bisaliga akoen amben ako hugu lagarwik, “Amben yi ap vidis amben ovagak,” yugu dugwit, hekbaluk hambit lendagwi. Eke, it enagap wendarek akoen andi, amben hugu lagarwik, “Niniluk okbininaup menda yiat higyo,” yiluk, welagwi atma, iniluk-at dogosogom. Ala en nit avakwa enanggelekma dugwit amben sek menda anderogo dogop imbitigi ovara, nirenen ogarup mondok meyan okninivisiga o, avyak!

¹⁷ It ninen Ala wene yugurugwi vaga, yoparip ambi hedaugen yiluk, yukherelagwi ovara, nit andi, anderogo dek o. Yukheraguluk, Ala en lakbinini wagagi atma, At il hegek Keretus ayeloman dugwit, nenendawi sek vaga-at yukherelagwi.