2 Korindus 13 - ALA WENE HIVIS DIRUP WATUGWA

Atok vaga enaruk watigi wene

¹ Ndugwis mberen vaga bikhinisa wagagis ovara, yogak ndugwis ambi inim bikhinisa warigiluk, ogasiga. Dirup warek ambi, yerogo yagaliga: “Ap eneyave mberen a, henggam a, en inil helok, yuguselok andi, avyarat ogagarwikmu, yiluk, enawene segat mbanggu dogop,” yiluk, dirup warek ako agarik.

² An endak ndugwis ambi bikhinisa wagagirik, hivis ambi bikhinisa wagya lagagirik, henaruk watya dugwit, “Hit weyak ogagep ambi werek halok, hekbigigayogonbuk. Henawene amburup mbalogo mondok henowak dilisogon,” yiluk, yukheragagis ndatak, yogak ambi inim bikhinisa wagatek dugwit, it endak weyak ogagagwa ako hit ovok erogo inim wene andiat henaruk wasiga.

³ Hiren “Keretus en Paulus yugugu hegek yukneraliga nit avyarat ombaruguluk, ambi ogagya hasogom,” yiluk, nombasagwi ako, an henadema wagya dogomindik, ambi ogagya neyasogom. At Keretus anyedek andi dek. At anye atma, henanggelekma dugwit mondok anye erogo okbugugu hagup.

⁴ At ap nit wane-wane eyave anyedek atma yiluk, avyarat yo winik vaga warogo bagagwa ovara, Ala anye vaga mondok okbagya lagagimu, iluk agarik. Anderogo wane-wane, nit ogo At inim hunik dugwit, nenanyedek ovara, Keretus ninim hunik niniluk dugwit, henanggelekma Ala anye vaga ogarit lagu ninisagup.

⁵ Yesus ovaga vanggabaluk, avyarat ombasagwi akoat musek lendagwi a, dek a, ako henadik-henadik henendawi dibetaluk, henavut mbalhidugu dogones. Henavut mbalhidugu dogomundik, “Segat musek lagya higi,” imbita halok, “Yi Keretus Yesus nendawima agirik atma an segat ogasiga,” ombarup. Eke, “An musek landigadek higi,” imbita halok andi, “Yi Keretus nendawima degat agirik higi,” ombarup.

⁶ Eke nit halok andi, nenavut ovok mbalhedagagup atma, “It segat musek lendagwi,” nenombarovovok yiluk, yukherelagwi.

⁷ Hit weyak ogagu dogoguven yiluk, henake Ala yugisagwi. Avakwa en nit nenavut mbabaluk, “Paulus aori inim sek adigat ogasagwi,” nenavok sek adigat yupwak yiluk, nit samban ogasagwidek. Ata, nit nenavok weyak yugusigik ovara, hegek hit sek adigat ogarit lagu dogovovok yiluk, henake samban ogasagwi.

⁸ Avyarat wene hegek nit sagalup meyan atma, wene andi wokbaluk, mondok musek lagu dogosogom yiluk ogasagwi.

⁹ Nit nenanyedek agya hegek, hit henanye vaga ogarit lagu hiniselok, andi segat, nenendawi adenggen ombasagwi. Hit mondok weyak ogagetek henendawi hoda okhinivupwak yiluk, henake samban ogasagwi.

¹⁰ Anen avakwa weyak okbisaik yiluk, Ala en At amunggat woknigitek. Ata, avakwa enendawi hoda erogo okbisapwak yiluk, amunggat woknogogi. Anderogo atma, an henadema wagya dogomindik, nane anye vaga yukheraup nanggon, yiluk, ao wagetek dugwit, wene yi dirup warogo lakbigiga wagi.

Paulus wa yugeragagi wene

¹¹ Wa, naswei. Wene andi ovogat. Henendawi weyak ogagetek hoda arovovok yiluk, ogagu dugwit, an wene yukheraliga yi, dibagu dogones. Henendawi ambiat okbaluk ugun adenggen dambulik dogones. At endawi hunik okninipu dugwit, nenendawi ugun seyalek adenggen dogosogom yiluk okbininaliga Ala akoen, hinimat dogosogon.

¹² Heyaga war-wat yugu dugwit, henendawi hunik vaga dinggik-hambuk yugu dogones. Eke, it Ala aburi adik denek o yoma agarwik ovok erogo en hai warogo wa yukherelagwi.

¹³ Nenowa Inis Ombok Yesus Keretus henabwa en okbigigu, Ala en endawi hunik okhinipu, eke, Ala Averiniki hinim hunik dugwit, hit ovok erogo hinim ogagu dogosogom atma, ovogat yukhirigi o, naswei wa.