2 Korindus 12 - ALA WENE HIVIS DIRUP WATUGWA

Ala en Paulus nogo heda abi vaga yugogogi wene

¹ An iya erogo oknitigi ambi wogobetayogon. Andi, enam warogo-at yisogon ovara, Ala en nogo heda nabi vaga yuknogogi inim, eke, wene hwilago welagagi ako sigam erogo yuknogogi inim, mbilinogo yukhirigya dogosogon.

² An o 14 tahun endak vaga nabi vaga nil hagagis menda yisogon. Ap ambi Keretus inim hunik atma, mbogot mberen wenamen hegek, ambi winimen vaga ba inggigirik, wambu wagagi ako an nilup. Ap wolok inggigi ako andi, eyave ovok wolok inggigi a, ata anggela adigat wolok inggigi a, ako andi, an ogo ninggut ovara, Ala adigat ilup.

^3-4 At ap andi, hambuluk lendagwima o mondok segedokma akoma wolok inggigirikmu dugwit, wene avakwa en yup moga menda yugu sogogi. Ap andi, eyave ovok wolok inggigi a, ata anggela adigat wolok inggigi a, ako andi, an ninggut atma, Ala adigat ilup.

⁵ At ap andi, andoma ba inggigirikmu, il higya, aruk hunggu, ogagagi ako andi, vok yup segat ovara, an ogasiga ako andi, wogobetayogonbuk. Ata, an neyave nanyedek dugwit, ogasiga ako adigat wogobetaliga.

⁶ An wogobetaup ombaklimu en, avyarat nil hagagis halok yagaliga atma, avakwa en “Wes en yagaliga,” nombaklipuk. Anderogo ovara, an ogarit lagya neyalagwi inim, nane iris hulisagwi inim, ako adigat dibaniluk siyabanup hegek, nil hagagis mbilinogo yukheraliga vaga, “Paulus andi, ap mondok iya,” numbutu hinisao, mbilinogo yukheraup nanggon ombasiga.

⁷ Elokwe adik avakwa en helagwidek menda nil hagagis ako vaga, “An iya,” yiluk, imbita neyaoen, edup menda ambi neyave vaga adok ovagak nggutlagagi. Andi vaga Sile aot ambi wagya lagagirik, an iya imbita neyaoen, nanggadi wakbanenggek adigat ogasiga.

⁸ Edup andi, dek okbanupwak yiluk, ndugwis henggam vaga Nowa Inis Ombok yugogogis.

⁹ Yugogogis ovara, Ala en an yuknugu dugwit, “Hanyedek agyaim, an nanye mondok segedok agirik ako sigam hapwak yiluk okbagasogon. Eke, hat hanyedek aga ako, An Hasin Ala habwa en nanye wane-wane okbagagya dogosogon,” yiluk, yuknigigi. Anderogo atma, Keretus anye okbaninggya hagiluk, nanyedek okneraliga ako andi, nendawi adenggen wisane imbita dugwit, “Segat okneraliga,” nendawi ombasiga.

¹⁰ An nanyedek oknitya lagagimu, Ala en anye vaga okbaninggya hegek, nanye wisane dugwit ogarit landiga. An Keretus ake yiluk, ogagya dugwit nanyedek oknitya hegek, wiyiknom-weyaknom erogo banunggwi, yi weyak ndi weyak okbanunggwi, enaninis en anggin-mbanggin okbanunggwi, “Nggarogo ogaruk,” yiluk, nendawi anggin okbanunggwi, ogagusigik, “Sek adigat okbanilagwi o,” yiluk, nendawi seyalek adenggenat agirik.

It Korindus menda ogaguselok yugeragagi wene

¹¹ An ap wes en yagalagwi ovagak yagaliga ovara, adem hit ogasagwi vaga an wene andi yukheraliga. An ap iya atma yiluk, siyabatigya dugwit yagaligadek ovara, hiren, “It ap nin andi, lakbigik mondok iya menda en yuknerelagwi,” yiluk, siyabiselagwi ako, it andi iya, eke, an meyan, andi ombasigadek. Ata, it ninim wane-wane atma, it iya enumbutu dugwit, an ogo ninim iya nombarup sek arova, an iya nembetetek hiniselok, yukheraliga.

¹² Hiren, “Paulus yi, Ala en lakbigik menda dogopwak yiluk, avyarat denogo bagagi,” nombarovovok yiluk, an henanggelekma nendawi wadokdek dugwit, yukhirigya neyagek, hinilup arup henalon werek menda inim, nggarogo ogarubuk menda inim, ovok erogo At Ala en ogagya lagagi ako aro.

¹³ It Ala aburi yi awi ndi awi homasagwi nin ako okbisilin lagya lagagis ako, an hit adem ngga okbigigitek neyalok, yagalagwi? Henake ogarit lagya dugwit, “Onggo wokneres o,” yiluk, yukheregetek andi weyak okbigigirikmu, an weyak ogagi-at higi o!

¹⁴ Endak ndugwis mberen vaga henadema wagagis ovara, yogak ndugwis ambi inim bikhinisa warup agirik. An warup andi, anggin ambi henovaga bigigaigen yiluk, warisogonbuk. Avyak maridugi en it enasin-inisa hogop menda wonggalisagwidek. Ata, enasin-inisa en it maridugi hogop menda wonggalisagwi atma, an henasin henangge ambi hedayogon yiluk, warisogonbuk. Ata, an hit hinim nenendawi hunik dogoguluk warisogon.

¹⁵ Anderogo atma, hit henake ogagya dugwit, nangge dek agya, nanye mondok degerogo batigya, ogarup andi, nendawi adenggen wisane-at ombasiga atma, an hit henabwa wisane imbita neyagek ovara, hiren andi an nabwa ombasagwi ako horok madugat agya higi andi, nggarogo yiluk?

¹⁶ Anen anggin ambi henovaga bigigitek andi avyarat ovara, hit umbutu dugwit, “At Paulus andi, nenambukmu inggya dugwit, atok hwilagago yukneraliga,” umbutu hinigis.

¹⁷ Avyak! Hit Ala aburi enake wonggalogo bigip ako, nin agako higirogo an hedayogon yiluk, ap andi, lakbisa waga embetep?

¹⁸ At Titus Ala aburi enake bago wonggalit warupwak yiluk lakba wagya dugwit, aswe ambi iperen lakbisa wagagis ako andi, avyarat lakbisa wagagis ovara, hit wonggalogo bagep ako, Titus nin higirogo hedagas embetep? Hedegetek atma, niperen yonggat-hinipu dugwit, nenendawi ambiat wenggebaluk, ogasagwi hinilup aro.

¹⁹ Wene yi ovogat yukhirugu ninigik, hiren, “Paulus aswei inim it adigat enawene amburup mbalhedegek lendagwi,” ninumbutu hinigis ovara, nit anderogo dek, naswei nendawi hunik. Nit yukhirugu ninigik, Keretus ayeloman dugwit, Ala ivaga yukherelagwi. Yi menda ndi menda ogasagwi andi, ovok erogo hit henendawi hoda okhinivugen yiluk, ogasagwi.

²⁰ Anen, “Hit ogagu dogop,” ombasiga ako hegek adik ogasagwi atma henadema wagya neyaoen, an nendawi anggin haliga. Eke, hiren, “At anderogo ogari warupwak,” numbutu hinigik, anen adik ogari wagya neyaoen, andi ogo an nendawi anggin-at haliga, naswemuni. An henadema wagya dogomindik, nane-hane yagan nagwis, haterek-anderek yugwi, naninis-haninis yugwi, an iya hat iya yugwi, navok-havok yugwi, wene henelagap atok vaga wolok-wolok ane wolok nagwis, wogobetegek nagwis, nadok-hadok ogarit nagwis, ogasagwi atma henadema wagya neyaoen, nalon okneraliga.

²¹ An henadema wagya dogomindik, hit weyak mondok iya erogo ogagu dugwit, henendawi ninggya dugwit, avakwa ugun-ugun ogarit nelagwi ako vaga henasam helok hit weyak ogasagwi ako mbobagetek hiniselok, an henabwa en yup yasiga ako Nasin Ala aruk hobaluk, hit hinivaga nanggadi wakbaninggya haoen, nalon o, naswei.