2 Korindus 11 - ALA WENE HIVIS DIRUP WATUGWA

Huluk wene yagan waguselok, yugeragagi wene

¹ An ap wes ovagak dugwit, wene yi yukheraliga ovara, hegek henaruk hunggu dogovovok yiluk, yukheraliga, naswei.

² Hwa ap ninen agap vagatitek agarik hak, hit an naburi anderogoat dugwit, henagun ambiat Keretus-at hedavovok yiluk, avok yukhirigya lagagis. Avok yukhirigya lagagis ako hegek, adik ogasagwi hinigu lagirik, Ala aburi At ane hekbaluk, adik musek lagu hiniselok, At endawi wakhedaliga hak, an ogo wane-wane nendawi wisane wakhedaliga.

³ Mbas ane agil-amok wisane vaga, hwa Hawa yugugu dugwit, at ambukmu inggigi wane-wane, it ap adik en enane agil-amok wisane yukhuruguselok, enane hunggu dogobuk. Hit henendawi sagain dugwit, Keretus ane adigat musek lagu dogosogom yiluk, avyarat umbutugup ako hekbaluk, nomalogo wokhinivuluk lagu saoen, nalon imbita dugwit, yukheraliga.

⁴ Hit Yesus ane wavovok yiluk, wene endak yukhirugu lagagup ako hegek, it avakwa adik menda en wagu lagarwik, “Yesus ambi yi aro,” yiluk, yukhirugwi, Ala Averiniki wagagup ako hegek, “Averiniki ambi yi aro,” yiluk, yukhirugwi, eke, Sek Wene avyarat ombakluk, wagagup ako hegek, “Sek Wene ambi yi o,” yiluk, yagan wagwi, ogagusigik, hiren “Nggarogo yugu samwi?” yiluk, henendawi sek vaga mbauk erogo hinigis atma, nalon imbita dugwit, yukheraliga.

⁵ Hiren, “It ap yi, lakbigik mondok iya menda en yuknerelagwi,” yiluk, siyabiselagwi ako, it andi iya, eke, an horok sovalek, an anderogo ombasigadek.

⁶ Nane nin weyak yipi-nipi yagaliga ovara, nilup dugwit yagaliga ako hinilup aro. Nit henanggelekma dugwit, ogarit lagu lagagup ako andi, ovogat hinilup atma, adem ngga yukherabuk asiga.

⁷ Hit sek ogarit lagu hinisaigen yiluk, an nendawi sovabetaluk, Ala ogasiga menda Sek Wene onggodek unat yukhirigya lagagis andi vaga weyak okbigigis haoen?

⁸ An hit henake ogagya neyagek ovara, hiren yonggat-neyagetek hiniselok, Ala aburi homasagwi adikmu en yonggat-neyagu lagagwa atma, it enangge andi, nonggop ovagak wagagis higi.

⁹ Eke, an henanggelekma hinim neyagek, nangge dek atma, naswei Makedonia menda akoen wagu lagagwarik, enangge wokniri wagagwarikmu, hit ambi woknerovovok yiluk, an mondok nggino yukheregetek. An yukhirigya vaga anggin henovaga arugwi en, an ambi mondok nggino yukheregetek agirik. Eke, yogak ogo wane-wane-at nggino yukhirigya dogosogonbuk.

¹⁰ “An ambi mondok nggino yukheregetek andi, an iya erogo ogasiga,” ombasiga ako, it o Akaya avilis ambot agarwik en, “Anderogo yup moga,” mondok yuknirubuk. An Keretus ane nendawima dugwit huluk yup dek atma, avyarat yigi.

¹¹ Nano yiluk an ambi nggino anderogo yukheregetek agirik ombasagwi? An nendawi hunik okhinipitek dugwit, yukheraliga ombasagwi? Dek. An mondok nendawi hunik okhinivisiga ako andi, Ala ilup-at.

¹² An andi ogagya dogop yukhirigi adem ako yerogo: it avakwa wene adik yukherelagwi menda en, “At Paulus inim ogasagwi ako nit wane-wane-at ogasagwi,” yiluk, wogobategek nelagwi ako, enane mondok degerogo bisagiluk, “An ogasiga andi, adigat ogagya dogosogon,” imbita dugwit, yukhirigi.

¹³ It ap andien, “Nit Keretus en lakbinina waga,” yiluk, enane atokma en agil-amok yagan wagu dugwit huluk-huluk yugeregek nagwis, avakwa yovalek-sovalek oginipu dugwit enambukmu unggwi, ogarit lendagwi.

¹⁴ At Sile ogo, malaikat elose awiya agarik ako wane-wane okbaluk, ogarit landiga atma, it andi ogasagwi halok, “Wi!” vok yubuk.

¹⁵ Enasin Sile ogarit landiga wane-wane, aburi ogo anderogoat wane-wane ogasagwi. Ogagu dugwit, ap enelose sek en ogasagwi ovagak okbaluk, ogarit laguselok, “Wi iya yiluk!” henalon habuk. It ogarit nelagwi andi, atokma andoma onggo wane-wane okbugu hagup.

Paulus anggin ovaga agya lagagi wene

¹⁶ “An ap wes en yagaliga yiluk, nombarubuk,” yiluk, ambi inim yukheraliga. Ovara, an avyarat ap wes ovagak en yagaliga yiluk numbutu hiniselok andi, an anderogoat yukhirigya neyagek, nane hunggu dogones. Nane hunggu hiniselok, an siyabetaigen yiluk, ogasiga ako mbilinogo yukherayogon.

¹⁷ “An iya erogo ogasiga,” ombakluk, siyabatigya dugwit, yukheragiluk imbiti ako yi, Nenasin Inis Ombok Ala en yuknugu halok yisogonbuk. Ata, an avyarat wes ovagak dugwit, yukhirigya neyagup.

¹⁸ It avakwa wen vaga menda en siyabatugu dugwit, yagalagwi atma, an ogo wane-wane, siyabatigya dugwit, wene ambi yukherayogon.

¹⁹ Hiren “Nenendawi werek,” umbutu dugwit, ap wes ovagak en yukhiruguselok, yukhirugu dogopwak yiluk hit hekbiselagwi.

²⁰ It avakwa en enayeloman okhinupwis, henangge mondok degerogo nenggek lagwi, enavema sovalogo bigugwis, siyabatigya dugwit, weyak okbigugwis, henelose vaga hinitwis, ogagusigik, “Sek aro,” yiluk, mbuverek hinigis.

²¹ Nit andi, anderogo okbigigaup nenalon en nenane sagain erogo yukheragagup atma, nit weyak ai? It ap wes en ovagak ugun yagalagwi hak, an anderogo yup nanggon ombasiga ovara, it avakwa nin enalon dek, ambi ogagao vaga wogobetelagwi atma, an ogo nalon dek dugwit, ambukum wogobetayogon.

²² It wogobatugu dugwit, “Nit Iberani menda aro,” yiluk, yagalagwi atma, an ogo Iberani menda-at. Irenen, “Iserali menda nit aro,” yagalagwi atma, an ogo Iserali menda-at. Irenen yugu dugwit, “Averakam ombawi menda nit aro,” yagalagwi ako, an ogo Averakam ombao menda-at.

²³ Iren “Keretus ayeloman dugwit, ake ogasagwi,” ombasagwi atma, an ogo, Keretus ayeloman mondok iya erogo ogasiga. Wene yi, ap nenek en yagalagwi ovagak yagaliga ovara, avyarat yagaliga atma, hunggu dogones. Keretus ayeloman dugwit, ake ogarit lagya neyagek, anggin novaga agya, heda marogo lembaga mabiselagwima mabanunggwis, narisagwi andi ininggis dinggilup meyan, hambup-at oknitya lagagi ovara, niluk agya, it nin andi madugat okbugu dugwit, an ako andi, mondok iya erogo okbanunggu lagagwa.

²⁴ It avakwa Yakuri menda en nabirok vaga natu dugwit, ndugwis ambi vaga elap 39 hudi natugwa, eke ndugwis ambi vaga elap 39 hudi natugwa, anderogo natu dugwit, ndugwis 5 hudi natu lagagwa.

²⁵ Iren ndugwis henggam vaga nabirok mbuyawi vaga natwis, ndugwis ambi vaga helep vaga natwis, eke mburis vaga lagyaim, elap henggam vaga is anye en mburis ako weyak lagya dugwit avut endenogo wombabaninggya, ndugwis ambi vaga ima wombabaninggigirikmu dugwit, an is iri vaga neyagek, o hup en o dingga agya, ogagagwa.

²⁶ An yi awi ndi awi lagyama, is nggut wagya dugwit, woknombolok laup ogagya, ap enonggop welagwi menda en naruguluk ogagwi, an nowa-nasin ap Yakuri menda inim ap weram Yakuri dek menda inim en weyak okbanunggwi, o kota inim, o harumu inim, is ombok yanggadekma inim, naswei huluk yagalagwi menda enanggelekma inim, it ovok en weyak okbanup yiluk, okbanunggugwa ovara, atma agagibuk.

²⁷ Yugeregek adigat lagya neyagek, nanyedek erogo baninggya, ndugurek-ndagarek nogo yigitek niluk adigat welagya, erom uvup oknitya, is uvup oknitya, erom dek halok uvup nogo yugu, nasum dek agya dugwit soges-at nogo yugu, ogagya lagagis ako andi, an nilup aro.

²⁸ Andi un an nagamut vaga oknitigirikmu, yiluk yigi. Eke, nendawi en andi, Ala aburi yi awi ndi awi homarisagwi ako ovok erogo hutun-howam enovaga nendawi wenggelit landiga andi inim nendawi anggin aro.

²⁹ It avakwa enanyedek aguselok, an ogo nanyedek agya, it weyak oginipu halok, “Ai,” imbita dugwit, nendawi wakhedaliga.

³⁰ An ogasiga mbilinogo yukheraliga ako andi, an sek ogasiga vaga siyabatigya dugwit, yukheraligadek. Ata, an neyave nanyedek dugwit, ogasiga ako wogobetaliga.

^31-33 An o Ndamasik werekma, ap inis ombok Aretas aot Gubernur akoen an vaknerapwak yiluk, aori yegen werek yugeragagi wulu wagya neyaoen, sup leget ndanggi vaga hanjalek welagagwa. Hanjalek inigik, naswei en mburiyum yago vaga yedogo leget ovasup wombabanunggu lagagwama, it enelola en visilogo winggigis. Anderogo ogagagis andi, ovok erogo nit mondok-mondok inis siyabelagwi Nenowa Yesus Asin Ala ako, ilup atma, an huluk yagaligadek, avyarat yukheraliga.