2 Korindus 10 - ALA WENE HIVIS DIRUP WATUGWA

Ogagya lagagi adem des erogo yugeragagi wene

¹ It ninen “At Paulus o adumu dugwit, alon embetetek dugwit ane anye vaga yuknirigya, eke, nit ninivaga halok andi, alon imbita dugwit ane seve erogo yuknirigya, ogasiga o,” yagalagwi. Anderogo yagalagwi ovara, At Keretus nenabwa en ane sagain erogo yukneraliga hak, an Paulus ogo anderogoat, nendawi, “Ai,” imbita dugwit, wene ambi yukherayogon.

² It avakwa ninen umbutu dugwit, “It wen vaga menda ogasagwi ovagak, Paulus aswei inim wane-wane ambi hedaugen yiluk ogarit lendagwi,” ombasagwi. Anderogo umbutuselok, an nalon dek dugwit nane anye vaga it yugeraup imbiti ako wane-wane, henadema wagya dogomindik, hit anderogo wane-wane nane anye vaga yukheraguven, nane sagain erogo yukheraliga yiat dibaluk, ogagu dogones.

³ Nit wen vaga yoma agurik andi avyarat ovara, it wen vaga menda yegen-ndugudis vaga ndup ogasagwi ako wane-wane, nit ndup anderogo ogasagwidek.

⁴ It sovabininaguluk ogasagwi ako, ninim yambogavugen yiluk, it wen vaga menda enayegen ako menda nit vagago agurikbuk. Ata, Ala ayegen-andugudis ako nenembetma dugwit, leget mondok wadokdek valek hegek masalogo bagek iniri nunggup ako menda-at vagago agurik.

⁵ At Ala adigat nenembet vaga dugwit, it Sek Wene weyak erogo baluk enane ugun yagan nagwis ako enane degerogo biselagwi. It ninen, “Ala andi nenanggon. Avakwa Ala eve inilup arup andi dek,” wogobategek nelagwi ako sovalogo biselagwi. Eke it avakwa en un enendawi ombakluk ogarup wenggelit lendagwi ako, sovalogo baluk, Keretus ane hobaluk ogarupwak yiluk, At avema bisa wendagwi.

⁶ Nit yukherelagwi ako, “Ogagu dogosogom,” yiluk, des erogo ogarit lendagwi ako hinigu dogomindik, it nin, “Ogagu dogop, nenanggon,” ombasagwi ako, nenane anye erogo enanggadi watu dogosogom.

⁷ It ninen, “Nit adigat Keretus aburi agurik o,” yiluk, yagalagwi akoen, “It ogo ninim wane-wane Keretus aburi-at inigup,” yiluk ninumbutu dogopwak. Wene andi, sigam agarik atma, hit nggarogo yiluk, dibagetek agipik?

⁸ Hit weyak erogo okbigigaigen yiluk, At Nenasin en amunggat nenovaga bininggitek. Ata, sek okhinivuguven yiluk, amunggat nenovaga bininggigi ako iya erogoat bininggigi imbita dugwit, yukheraliga atma, “At siyabatigya dugwit, yukneraliga,” yagalagwi ovara, an nanggadi degat agirik.

^9-10 “At Paulus en yokninisa wagya lagarik andi, eyave nggabelekdek ane anyedek ovara, nggarogo yiluk ane anye vaga dirup warogo wokneraga?” yiluk, yugu inigirikmu, “Nenalon ombarusogom yiluk dirup warogo lakbinini wandiga higyo,” yiluk, nenombarubuk.

¹¹ It ap wene anderogo yagalagwi menda akoen, “‘It Paulus melen anderogo ogarusogom o,’ yiluk, dirup warogo woknera wendagwi ako eneyave nenadema wagu dogomundik, dirup warek ako wane-wane yuknera warusogom,” avyarat umbutu dogopwak.

¹² It avakwa nin “An iya,” ombasagwi ako, niren, “Nit ogo iya,” inim yugwi, ninim wane-wane wakhegek yugwi, nit ogarup mondok meyanat ombasagwi. It ap anderogo ombasagwi andi, “An iya hat iya,” yugu dugwit, it ogasagwi adigat wakhegek yagalagwi atma, it ap wes ovagak yagalagwi inigup.

¹³ Nit neneyave At Ala wene yugeregek lagatek halok, ugunat, “Yi nit nenaburi aro,” yiluk, yusogom, dek. Ata, Ala en, “Andoma-at yugeregek lagu dogones,” yiluk, yukneragagi ako andoma lakluk, des erogo yugurugu ninigik, Sek Wene wogogwa ako halok adigat, “Yi nit nenaburi atma sek ogagyo” yiluk, nenendawi adenggen ombasagwi. Eke, “O Korindus ogo yugeregek elales o,” yiluk, yuknirigya lagagimu, sek erogo yukhirugu ninigik, Sek Wene wagagup atma, “Hit ogo, nenaburi aro,” umbutu dugwit nenadenggen wisane agurik.

¹⁴ Nit Keretus ogagagi Sek Wene yukhera wagagup ako, At Ala embetetek hegek, niren adigat yukhera wagetek. Ata, Ala en, “O andoma yugeregek elales o,” yuknirigya lagagimu, “Hit hinimat yukhera warup,” imbitigi halok, yukhera wagagup atma, “Hit nenaburi aro,” yiluk, nenadenggen ombasagwi ako andi, segat ombasagwi.

¹⁵ At Ala en, “O andoma yugeregek elales,” yiluk yukneregetek halok, ap adik en yugurugusigik Sek Wene wuguselok, “Nit nenaburi aro,” yiluk, yusogombuk. Andi ovara, hit avyarat ombasagwi ako mondok musek lendagwi vaga, henendawi hoda arit lagu hiniselok, nit yugeregek nagu dogop Ala en imbitigi ako andi, ambi inim ombok erogo mbigaliluk laup, “Ai,” ombasagwi.

¹⁶ It ap hunogo en yugerelagwi hegek, “Nit nenaburi aro,” yiluk, it enaburi haurogo hidugu dogomundik, wogobetaup andi, nenanggon. Ata, hit henendawi hoda agu hiniselok, it Ala wene enaruk hunggitek o hunogoma enambukmu vikit andoma yugeregek laup ombasagwi.

¹⁷ “Hat ambi saen wogobetaup imbita halok, Ala en okbagya hegek, ogasiga atma, At Ala adigat siyabagu dogones.”

¹⁸ Avakwa ogarit lendagwi vaga wogobetelagwi halok andi, iya dek o. Ata, Ala en siyabugu halok andi, mondok sek.