1 Yohanes 5 - ALA WENE HIVIS DIRUP WATUGWA

Avyarat ombasagwi vaga avakwa Ala enanggon ombasagwi ako sovalogo bugu dogop wene

¹ Niren, “At Keretus Ala en denogo bagagi ako, At Yesus-at,” yiluk, avyarat umbutu niniselok, Ala enat endakninipigirikmu, nit At aburi-at agurik. Eke, Nenasin Ala nenendawi hunik ogagu dugwit halok andi, aburi endago ako inim nenendawi hunik oginivisagwi.

² Anderogo atma, nit nenendawi Ala inim hunik dugwit, wene “Yerogo ogarup, nderogo ogarup,” yukneragagi ako ogagu dugwit halok, nit At aburi nenendawi hunik oginivisagwi.

³ Nit At Ala nenendawi hunik ogasagwi halok andi, niren At “Yerogo ogarup, nderogo ogarup,” yukneraliga akoat, ogasagwi. Eke, At Ala en wene, “Yerogo ogarup, nderogo ogarup,” yukneraliga ako, anggin mondok dek.

⁴ Andi, nit Ala endakninipigi akoen it avakwa wen vaga menda Ala enanggon ombasagwi ako sovalogo biselagwi. It avakwa wen vaga menda Ala enanggon ombasagwi sovalogo biselagwi andi, nit Yesus ovaga vanggabaluk avyarat ombasagwi andi vaga sovalogo bisiluk, nit siyalek-at agurik.

⁵ It ap sanien Ala enanggon ombasagwi ako sovalogo biselagwi ombasagwi? Dek. Niren, “Yesus andi, Ala Abut aro,” yiluk, avyarat ombasagwi ako enat sovalogo biselagwi.

Ala en Abut avok vagalogo yukneragagi wene

⁶ At ima wombabagya hagagup ako inim, eke, hambigya dugwit, amuya wambigya hagagup ako inim, andi, Yesus Keretus eyave aro. Ima wombabagya hagagup ako adigat andi dek o. Ata, At amuya wombagagi ako inim hugu lagagurik, “Yi Yesus Keretus avyarat o,” yiluk, umbutugup. Eke, Ala Averiniki ako andi, Ala yagaliga wane-wane avyarat adigat yagaligama, Aren ogo, “Yi Yesus Keretus avyarat o,” yiluk, avok vagalogo yukneraliga.

^7-8 Anderogo atma, wene henggam agarik. Wene ambi andi, Ala Averiniki en yukneraliga ako. Wene ambi andi, ima wombabagya hagagup ako, eke, wene ambi andi, amuya wambigya ninil hagagup ako, wene henggam andiat agarik. Wene henggam andiat agarik ovara, adem ambiat, “Yesus andi, Nenowa Inis Ombok Keretus Ala en denogo bagagi ako, Araro,” yiluk, ninilup aruguluk, agarik.

⁹ Ala en wene yuknirigya dugwit, “Yesus andi, An Nabut aro,” yiluk, yukneraliga. Anderogo atma, avakwa en vagalogo yukniruguselok andi, avyarat ombakluk waup sek ombasagwi ovara, nit avyarat ombaruguluk Ala en wene yuknirigya dugwit, “Yesus andi, An Nabut aro,” yiluk, yukneraliga andi, mondok iya atma, “Yi avyarat o,” yiluk, wugu dogosogom.

¹⁰ Nit nenendawi Ala Abut ovaga vanggabaluk, avyarat umbutu niniselok, nenendawima en, “Yi Ala Abut avyarat wigyo,” yiluk, ombasagwi. Eke, it Ala avyarat embetetek dugwit, wene At Abut avok vagalogo yugeragagi ako ogo avyarat embetetekma, Ala huluk yagaliga ovagak okbelagwi.

¹¹ At Ala en wene vagalogo yukneragagi ako yi aro: Nit niniluk mondok-mondok dogoguluk, Ala en okbininggigi atma, At Abut wugu niniselok, mondok-mondok niniluk dogosogom.

¹² Eke, ap ambi saen Ala Abut waliga halok, niniluk mondok-mondok dogosogom ovara, ap ambi saen Ala Abut waligadek halok andi, iluk mondok dogosogonbuk.

Niniluk mondok-mondok dogop wene

¹³ Hit henendawi Ala Abut ovaga vanggabaluk avyarat ombasagwi ako, Ala en hiniluk mondok-mondok dogop andok okbininggigi hinilup arovovok yiluk, wene yi dirup warogo wokheraliga o.

¹⁴ At Ala endawi ombasiga ako wane-wane woknerapwak yiluk, nggino yugugu niniselok, At aruk hulisiga andi ninilup atma, nenalon embetetek At nggino yugugu dogosogom.

¹⁵ Andien, niren At nggino yugisagwi ako, At avyarat aruk hulisiga ninilup atma, nit nggino yugisagwi ako andi avyarat woknerayogon ninilup aro.

^16-17 Yi weyak ndi weyak ogasagwi ako andi, ovok erogo inis weyak ovara, weyak menda andi adem mberen agarik. Weyak menda adem ambi andi, enasam helok Ala en enomaduk ako degerogo baup ndak ovara, adem ambi andi, mondok weyak atma, Ala en omaduk andi degerogo baup mondok dek, mondok-mondok hambup menda-at agarik. Anderogo atma, ap ambien mondok weyak hambup menda ako mikbetaluk ogarit lagya halok, ap ako ake Ala yugeravovok yiluk, yukheraligadek. Ata, henaswe ambi weyak menda ogagya hinil helagwi halok, weyak ogagya andi Ala en nenomaduk degerogo bininaup ndak ako menda halok, Ala en ap ako omaduk degerogo baluk, iluk mondok dogop menda okbapwak yiluk, “Ap ako ake Ala yugugu dogones o,” yiluk, yukheraliga.

¹⁸ Ap ambi Ala en endagagi halok, At weyak ogarit landigadek andi, ninilup aro. Ala Abut Yesus en ap andi, des erogoat vagago agarik atma, at Sile mondok weyak ogasiga akoen ap andi, mondok weyak okbayogonbuk.

¹⁹ Yi avakwa ndi avakwa weyak ogasagwi ako ovok erogo at weyak ogonivisiga Sile ako avema agarwik ninilup ovara, nit andi, Ala aburi-at agurik.

²⁰ At Ala Abut wambu wagya lagagirik, Ala mondok avyarat agarik ako nit dibapwak yiluk ninilup okbininggigi. Eke, At mondok avyarat agarik Ala, Abut Yesus Keretus iperen ninim nenendawi mondok hunigat agurik. At Yesus Keretus andi, At mondok avyarat agarik Ala ako Aratma, niniluk mondok dogop andok okbininiliga menda adem Araro.

²¹ Naburi nendawi hunik yi wa! At Ala mondok avyarat agarik ako hekbaluk, avoloma huvuwak adik ambi vakbaluk, inis siyabagu hinisaoen, dibagu dogwes yiluk, yukheraliga o. Ai naburi wa!