1 Yohanes 4 - ALA WENE HIVIS DIRUP WATUGWA

“Averiniki en yugirigya halok yagalagwi a, ata Keretus inim ogorek menda yagalagwi a?” yugeragagi wene

¹ Naswei nendawi hunik yi wai. Avakwa huluk wene yugerelagwi menda eneyave wisane en yi awi ndi awi ovok erogo yugeregek lendagwi atma, ap ambi henadema wagya dugwit, “Ala Averiniki en yuknirigya halok, yukhera wagyo,” yiluk, yukhera waguselok, enane avyarat umbutu dugwit ugun waup moga. Ata, “At Ala Averiniki en avyarat lakbisa wagao atma yagan wendagwi a, ata it enendawi en wenggebaluk yagan wendagwi a?” yiluk, enavut dombabaluk enane hunggu dogop segat.

² Eke, “Ala Averiniki enendawima dugwit, yagan wendagwi a,” yiluk, yedok hugu dogop ako yerogo: “At Yesus andi, Ala en denogo baluk lakba wagagi Keretus ako avyarat wen vaga wambu wagya lagagirik, eve ap-at endaklagagi o,” yiluk, vagangguselok, “Ap andi, Ala en avyarat lakbisa wagagi Averiniki enendawima dugwit, yugu sagup o,” yiluk, enane hunggu dogop sek.

³ Anderogo ovara, it ap andien, “Yesus andi, At Ala en denogo baluk lakba wagagi Keretus ako eve ap-at endaklagagi,” vagalisagwidek iniselok andi, “Ap andi, Ala en lakbisa wagetek, it enadik enendawi en wenggebaluk yugeregek wagao,” ombarop. “O hivis erogo Keretus inim ogorek menda wagu dogomundik, ‘Yesus wagya lagagirik, ap-at endaklagagi andi dek o,’ yiluk, yagan wagu dogosogom o,” yiluk, yugwi henaruk hunggugup ako, “Vage ari waga yiat inugup,” yiluk, ombarop.

⁴ Naburi nendawi hunik yi wai. It avakwa Keretus inim ogorek menda Ala wene enanggon ombasagwi ako, enendawima agarik andi, anyedek ovara, hit andi, hit Ala aburi atma, At Ala Averiniki anye mondok wisane henendawima agarik andien, it ap huluk wene yugerelagwi menda ako sovalogo bogogup.

⁵ It Keretus inim ogorek menda andi, wen vaga menda atma, iren wene wen vaga menda enane yuguselok, it ap wen vaga menda ninen enane yagalagwi ako enaruk hulisagwi.

⁶ Eke, nit andi, Ala aburi atma, nit nenane yagalagwi ako, it avyarat Ala inilup menda akoen enadigat enaruk hulisagwi. Eke, Ala aburi dek halok andi, nit nenane yagalagwi ako hulisagwidek aro. Nit nenane hulisagwi a, ata hulisagwidek a, andi vaga niren, “Ala Averiniki avyarat adigat yagaliga ako it enendawima agarik a, ata, madis ane huluk yagaliga ako enendawima agarik a,” yiluk, ninilup asagwi.

Ala en avakwa endawi hunik ogonivisiga wene

⁷ Naswei nendawi hunik yi, wai. Avakwa nenendawi hunik oginipu dogoguluk, Ala enat okbininiliga atma, nendawi-hendawi hunik ogagu dogones. Ap ambi saen nendawi-hendawi hunik ogaguselok, Ala enat endaginipigi atma, At aburi dugwit, At Ala andi avyarat inilup-at agarwik.

⁸ Eke, At Ala en yi ap ndi ap ovok erogo enabwa imbita dugwit, endawi hunik eve iya erogo oginivisigama, ap ambi saen nendawi-hendawi hunik oginivisagwidek halok andi, it Ala inunggurat agarwik.

⁹ Nit Ala Abut vaga mondok-mondok niniluk dogoguluk, Ala en At Abut ambiat ako wen vaga lakba wagagi. At Abut ambiat lakba wagagi andi vaga, Ala avyarat nenabwa imbita dugwit, endawi hunik okninivisiga ako andi, yedok helagwi.

¹⁰ Nenaswei nenendawi hunik okbisaup ako andi, ngga ndatak ombasagwi? Dek. Niren Ala nenendawi hunik ogagetek. Ata, Ala nenabwa en endawi hunik okbininggu lagagirik, nenomaduk degerogo bagya dugwit, ninim dambubininaupwak yiluk, At Abut-at lakba wagagi.

¹¹ Anderogoma, naswei, At Ala en anderogoat nenabwa imbita dugwit, endawi hunik okbininggigirikmu, nit ogo wane-wane nendawi-hendawi hunik ogagu dogop sek aro.

¹² Nit ovok erogo Ala eyave ninil hegetek-at agurik ovara, nit nendawi-hendawi hunik ogagu niniselok andi, Ala ninim mondok hunik dogosogon. Anderogo werekma, nit nenendawi Ala inim hunik arup Ala imbitigi ako andi, mondok avyarat ogagu dogosogom.

¹³ At Ala en Averiniki wokneragagi nenendawima agarik andi vaga, At Ala avyarat nit ninim hunik agarik, eke nit At ninim hunik agurik, ako ninilup aro.

¹⁴ Eke, Nenasin en yi avakwa ndi avakwa enagap wendarupwak yiluk, At Abut lakba wagagi ako ninil hugu lagagurik, vagalogo yukherelagwi.

¹⁵ Ap ambi saen, “Yesus andi, Ala Abut aro,” yiluk, vaganggu halok, Ala at inim hunik agarik, eke, at andi, Ala inim hunik agarik.

¹⁶ At Ala nenabwa imbita dugwit, endawi hunik okninipigi ako, nit avyarat ombasagwi. Eke, nit nenabwa imbitigi andi vaga nit nenendawi At ovaga vanggabaluk, agurik. At Ala en yi ap ndi ap ovok erogo nenabwa imbita dugwit, endawi hunik ombok erogo okninivisiga atma, hit nendawi-hendawi hunik oginipu hiniselok, Ala hit hinim hunik agarik, eke, hit Ala hinim hunik agipik.

¹⁷ Nit Ala inim hunik dugwit, Keretus ogagya lagagi ako hak, nit o wen vaga yoma dugwit anderogo mondok avyarat nendawi-hendawi hunik okhidugu dogosogom. Nendawi-hendawi hunik okhidugu dogosogom halok, o hivis nenowak dilninivup ako vaga, nenalon dek nenendawi seyalek hora yisogon.

¹⁸ Nit nenendawi Ala ninim hunik halok, nit nenalon dek dogosogom. Nit weyak ogagu niniselok, Ala en weyak onggo okninivup ako vaga nenalon agurik ovara, nit avyarat nenendawi Ala inim hunik ogagu niniselok, nenalon ombasagwi ako dek asiga. Ap ambien ao alon ombasiga halok andi, at endawi Ala inim hunik ogasiga ako, ao hoda agetek.

¹⁹ Endak At Ala en nit nenabwa imbita dugwit, endawi hunik okninipigirikmu, yogak nit ogo anderogoat avakwa enabwa umbutu dugwit, nenendawi hunik oginipu dogosogom.

²⁰ Ap ambi at aswe Ala wene waliga menda il higya dugwit ovara, endawi hunik ogasigadek halok, At Ala il hegetek atma nggarogonggan endawi Ala inim hunik ogarup ombasagwi? Mondok meyan atma, at aswe anggon imbita dugwit, “An Ala nendawi hunik agirik o,” iri halok, ap andi huluk yagaliga menda aro.

²¹ At Yesus en iri dugwit, “Hit Ala henendawi hunik ogagu hiniselok, henaswei ogo enabwa umbutu dugwit, henendawi hunik oginipu dogones o,” yiluk, wene yukneragagi akoat.