1 Yohanes 3 - ALA WENE HIVIS DIRUP WATUGWA

“Hit Ala aburi aro,” yiluk, yugeragagi wene

¹ At Ala en, “Hit An naburi aro,” yukneraliga andi vaga At Nenasin nenabwa mondok eve iya erogo nenombasiga andi, dibas. Nit avyarat At aburi agurik. It avakwa wen vaga menda adigat musek lendagwi akoen endak Ala yedok hegetek welagagwa andi vaga, yogak ogo, nit At aburi yedok ninigitek-at agarwik.

² Naswei. Hit an nendawi hunik atma, wene ambi yukherayogon. Nit yogak At Ala aburi agurik o. Eke, nit hivis nggarogo okbininaup ako, nit ao sigam hegetek ovara, At wagya halok, “At eve anderogo agarik,” yiluk, yedok hagup ako ndatak-at neneyave okbininaup ninilup.

³ Nit okbininaup ako nenape wenggelek agurik halok, At Keretus endawi sek adigat agarik ako ovagak, nit wane-wane nenomaduk horogo nenendawi sek adigat okhidugu dogosogom.

⁴ Ap weyak ogasagwi andi, Ala wene akoat sagalisagwi atma, ap ambi weyak ogarit lagya halok andi, Ala wene ako at weyak erogo baliga.

⁵ At Keretus weyak mondok ogasigadek atma, nit nenomaduk degerogo bininaigen yiluk, wambu wagagi ako hinilup-at agipik.

⁶ Anderogo atma, ap ambi At Keretus inim hunik agarik halok andi, at o ndugurek-ndagarek weyak ogarit landigadek. Eke, ap ambi weyak ogarit landiga menda halok andi, Keretus eyave il higya, ilup agya, ogagetek-at agarik.

⁷ Naburi nenendawi hunik yi, wai. It avakwa ugun en hit nomalhinivit wagu hinisaoen, dibagu dogwes o. Ap ambi weyak ogagetek sek adigat ogarit lagya halok, At Keretus weyak ogasigadek mondok sek adigat agarik ako, ap andi ogo anderogo agarik.

⁸ At Sile o muk endak en weyak adigat ogarit naliga atma, ap ambi weyak adigat ogarit lagya halok, at Sile abut-at agarik. Eke, at Sile ako weyak adigat ogarit naliga atma, At Ala Abut wambu wagagi ako andi, at Sile en ogasiga ako mondok degerogo bagiluk, wambu wagagi.

⁹ Ap ambi Ala en endagya halok, endawi swi vaga At Ala andogon at waliga atma, at weyak ogagya dogosogonbuk. At Ala enat endagagirikmu, at o ndugurek-ndagarek weyak ogagya dogosogonbuk.

¹⁰ Ala aburi inim, Sile aburi inim, nano vaga ninilup arup ako yerogo: It avakwa sek ogagetek weyak adigat ogagwi, enowa-enaot inim enendawi hunik oginipitek enanggon umbutwi, ogaguselok andi, Ala aburi dek andi yedok-at iniselagwi.

Nendawi-hendawi hunik ogagu dogop wene

¹¹ O endak erogo en wene hit henaruk hunggu lagagup ako, “Nendawi-hendawi hunik ogagu dogones o,” yiluk, yukheragagi akoat.

¹² At Hain en ogagagi ako ovagak, hit anderogo ogarup moga. At Sile weyak okninivisiga ako abut aratma, aot mondok watigi. Nano yiluk aot watigi ombasagwi? Dek. At Hain weyak adigat ogasiga menda atma, aot sek adigat ogagya il higya lagagirik, aninis en at aot watigi.

¹³ Anderogo halok, naswei. It avakwa wen vaga menda adigat musek lendagwi akoen enanggon hinumbutuselok, “Wi,” yiluk, henalon ombarubuk.

¹⁴ Nit nenendawi nggorak ndatak welagagup ovara, Ala en nenendawi iluk okbininggigi ako, avyarat mondok niniluk agurik halok, nit nenaswei nenarupwi Ala wene welagwi menda ninim nenendawi hunik oginivisagwi ako vaga yedok helagwi. Ap ambi saen avakwa endawi hunik oginivisigadek halok andi, at endawi nggorak ovagak ao agarik.

¹⁵ Ap ambi at aswe Ala wene waliga menda anggon imbita halok, at avakwa inirisiga menda arat. Eke, avakwa inirisiga menda ako andi, at mondok-mondok iniluk dogop menda andok okhedegetek andi, hinilup aro.

¹⁶ Nano ogasagwi vaga nenaswei ninim nenendawi hunik oginupwis ako ninilup arup ombasagwi? Dek. At Yesus endawi hunik en, “An avakwa enake narupwak o,” imbita lagagirik, nenake hombagagi andi wane-wane, nit ogo, “Nenaswei enabwa en enake hambup segat,” yiluk, umbutu dogones.

¹⁷ Ap ambi yi menda ndi menda werek en, aswe ambi yi menda ndi menda dek il haliga ovara, abwa embetetek, “Nanggon,” yiluk, hekbagya halok, Ala en avakwa enabwa ombasiga ako menda endawima mondok degat agarik.

¹⁸ Naburi nendawi hunik yi wai. Nit nenane vaga en adigat, “Avakwa ninim nenendawi hunik agurik o,” yiluk, yup moga. Ata, nenendawi vaga en enabwa wisane erogo umbutu dugwit, sek okbigik lagu dogosogom o.

Ala nenalon dek dugwit, yugurup wene

^19-20 Nit ogasagwi menda ako Ala ivaga wenggelagya dugwit, weyak ambi ogagyo vaga nenendawi en nenanggadi wakbininggu halok, nenalon ombasagwi. Nenalon ombasagwi ovara, nit yi ogagek ndi ogagek ogasagwi menda ako inim, nenendawima okninivisiga menda ako inim, ovok erogo At Ala ilup. At ovok ilup atma, nit Ala ivaga, “An avakwa enabwa en sek okbigik lagya lagagis ako vaga Hat Ala yagaliga menda ako an wane-wane ogagya lagagis o,” umbutu dugwit, nenalon dek At yugurup sek aro.

²¹ Naswei nendawi hunik yi wai. Nit weyak ambi ogagetek vaga nenendawima en nenanggadi wakbininggitek halok, Ala ivaga nenalon ombarubuk.

²² Anderogo atma, At Ala en, “Yerogo ogarup, nderogo ogarup,” yiluk, yukneraliga menda wene inim, nit ogarup endawi sek ombasiga menda ako inim, wane-wane ogagu niniselok, nit yi menda ndi menda woknerapwak yiluk, nggino yugisagwi ako, At woknirigya dogosogon aro.

²³ At Ala en “Hit henendawi An nabut Yesus Keretus ovaga vanggabaluk avyarat umbutwi, eke, Anen yukheragagis ako wane-wane hikit henendawi hunik oginipwis, ogagu dogones o,” yiluk, wene ombok yukneraliga ako, andi aro.

²⁴ Wene, “Yerogo ogarup, nderogo ogarup,” yukneraliga menda wene ako, hit ambien wane-wane ogagu hiniselok, At hit hinim hunik agarik, eke, hit At inim hunik agipik. Eke, Ala Averiniki wokneragagi nenendawima yukneraliga andi vaga At Ala avyarat nit ninim hunik agarik ako ninilup agurik.