1 Yohanes 2 - ALA WENE HIVIS DIRUP WATUGWA

Keretus nenake ogasiga wene

¹ Naburi o. Hit weyak ogagu hinisaoen yiluk, wene yi, dirup warogo wokheraliga o. Ovara, nit ambien weyak ogagu niniselok, At sek atma nggedok adigat ogasiga Yesus Keretus akoen nit nenavokot agya dugwit, nenake wene wolok Nenasin yuguri lagek ogasiga.

² At Yesus ako, nenomaduk degerogo baluk, Ala ninim dambulogo bininaup nenake ogasiga andi, Arat. Nit nenadigat nenomaduk degerogo baluk, Ala ninim dambulogo bininaup yiluk, nenake ogasiga andi dek. Ata, nit yi avakwa ndi avakwa o wen vaga yoma agurik ovok erogo nenomaduk degerogo baluk, Ala ninim dambulogo bininaup yiluk, nenake ogasiga.

³ Ala en, “Yerogo ogarup, nderogo ogarup,” wene yukneragagi ako wane-wane ogasagwi vaga, “It ap yi, avyarat Ala inilup inugup o,” yiluk, yagalagwi.

⁴ Yagalagwi ovara, ap ambien Ala wene yukneraliga ako ogagetek dugwit, “An Ala nilup aro,” iri halok andi, avyarat wene Yesus avok ako at endawima dek. At endawima dek dugwit yagaliga atma, ap andi huluk yagaliga menda araro.

^5-6 Eke, ap ambien Ala wene ako wane-wane ogagya halok andi, ap andi mondok avyarat Ala endawi hunik wisane ogasiga. “Nit Ala ninim hunik agurik o,” yugu dugwit, At Yesus Ala wene ako wane-wane ogagagi hak, nit ogo, Ala wene wane-wane ogasagwi andi vaga, Ala ninim avyarat hunik agurik ninilup asiga.

Wene swi menda ogagu dogop wene

⁷ Naswei nendawi hunik yi, wa. Anen, “Yerogo ogagu dogones o,” yiluk, dirup warisiga yi andi, wene o muk erogo Yesus en “Yerogo ogagu dogones o,” yiluk, yagagi akoat dirup warisiga. Wene yi, wene swi menda dek. Wene yi, o muk erogo Yesus en yagagi henaruk hobaluk avyarat umbutugup akoat dirup warogo wokheraliga.

⁸ Dirup warogo wokheraliga ovara, o hup dek agya hegek, o awiya eve sek menda ako nunggu wagya dugwit, wene muk menda ako At Keretus en ogarit lagya, eke, hiren nendawi-hendawi hunik okhedegek nagwis, ogasagwi vaga sigam asiga. Andi atma, wene swi menda ovagak halok, dirup warogo wokheraliga.

⁹ Ap ambi saen, “An o awiya vaga agarik o,” iri dugwit ovara, at aswe Ala wene waliga menda anggon imbita halok, ap andi, endawi ao hwiserek-at agarik.

¹⁰ Eke, ap ambien at aswe Ala wene waliga menda endawi hunik ogagya halok andi, at o awiya vaga landiga atma, lagya dugwit, owak dede iri dugwit weyak ogasogon dek o.

¹¹ Eke, ap ambien at aswe Ala wene waliga menda anggon imbita halok, ap andi, endawi o hwiserek-at agarik. At o hwiserek vaga landiga atma, o hwiserek akoen at il mbuk erogo bagagi atma, “An o andoma vikit landiga,” embetetek-at agarik.

¹² Naburi nendawi hunik yi wa. Hit henendawi Ala Abut ovaga vanggabaluk avyarat ombasagwi ako vaga, Ala en henomaduk degerogo bigigi atma, wene yi dirup warogo wokheraliga.

¹³ Nasini wai. Wen-mbogot yi ao dek hegek en, yogak hudi itok mondok agarik ako hit hinilup agagupikmu, wene yi dirup warogo wokheraliga. Naori wai. At Sile weyak okninivisiga ako hit vage sovalogo bagep atma, wene yi dirup warogo wokheraliga.

¹⁴ Hit An naburi nendawi hunik yi, wai. Nenasin Ala hinilup agagupikmu, wene yi dirup warogo wokheraliga. Hit nasini wai. Wen-mbogot yi ao dek hegek en, yogak hudi itok mondok agarik ako hit hinilup agagupikmu, wene yi dirup warogo wokheraliga. Hit an naori wai. Hit Ala wene henendawima hidugu lagagupik, henendawi hoda agagup ako vaga en at Sile weyak okninivisiga ako sovalogo bagagup atma, wene yi dirup warogo wokheraliga.

¹⁵ It ap wen vaga menda en enendawi ninggya halok wenggebaluk ogasagwi inim, yi menda ndi menda wen vaga weyak menda inim, ovok erogo henendawi hunik dogobuk. It ap wen vaga menda en enendawi wenggebaluk ogasagwi ako henendawi hunik okhidugu hiniselok, Nenasin inim henendawi hunik okhedelagwidek.

¹⁶ It ap wen vaga menda en enendawi ninggya halok musek lendagwi ako inim, inil hugu dugwit hogop ombasagwi ako inim, ogarit nagu dogopwak yiluk, Nenasin en ombasigadek. Eke, iren, “An wenggelisiga adigat iya o,” yiluk, wogobategek nelagwi ako ogo, ogarit nagu dogopwak yiluk, Nenasin en ombasigadek. Ata, it ap wen vaga menda enat, enendawi wenggebaluk, ogasagwi.

¹⁷ It ap wen vaga menda en enendawi wenggebaluk ogasagwi inim, yi menda ndi menda enendawi ninggya halok musek lendagwi inim, ovok erogo dek arisogon. Dek arisogon ovara, Ala endawi ombasiga menda ako, hit wane-wane ogagu hiniselok andi, mondok-mondok hiniluk-at dogogup.

Keretus inim ogorek menda en yagan warusogom wene

¹⁸ Naburi nendawi hunik yi wai. O hivis atok vaga ogarup ako vage vanggo yagas. Eke, “Hivis it nin At Ala denogo mondok okbagagi Keretus ako, inim mondok ogorek menda wasogon,” hit henaruk hunggugup. Hit hunggugup ako, yogak Keretus inim ogorek ako menda eneyave wisane vage mondok yagao. It vage mondok yagao agarwik ako vaga, “Wi! O hivis oklarup ako avyarat elokwe yedok ari wandiga,” yiluk, ombasagwi.

¹⁹ It ap Keretus inim ogorek menda andi, endak ninim homagu lagagup ovara, “It andi, nit menda dek o,” yiluk, hekbininiluk wunggugwa. “It ap andi, nit menda aro,” yiluk ombatlipmu en, ninimat duklu ovara, Ala en, “It andi, ovok erogo hit menda dek, hunogo menda agarwik, yiluk, sigam arupwak,” yiluk, imbitigi vaga anderogo hekbininiluk wunggugwa.

²⁰ Anderogo ovara, hit andi, At Yesus Keretus mondok sek adik denek akoen hit denogo bigiluk, Ala Averiniki wokheragagirikmu, avyarat wene ako hit ovok erogo hinilup-at hinigis.

²¹ Avyarat wene Yesus avok ako hit hinilup atma, wene yi dirup warogo wokheraliga. Eke, adem avyarat wene ako vaga en, huluk wene yagalagwidek andi, hit hinilup aro.

²² Ap huluk yagaliga menda andi, sa ombasagwi? Dek o. Ap ambi en, “Yesus andi, Nenowa Inis Ombok Keretus Ala en denogo bagagi ako, At dek aro,” iri halok, ap huluk yagaliga menda arat. “Yesus andi, Nenowa Inis Ombok Keretus Ala en denogo bagagi ako, At dek,” yagalagwi ako vaga Ala Abut Yesus inim, Asin Ala inim, “Nenanggon o,” yiluk, hekbelagwi. Hekbelagwima, Keretus inim ogorek menda irat.

²³ Abut Yesus hekbagwi halok, Asin ogo hekbelagwi, eke, “Yesus andi, Nenowa Inis Ombok Keretus Ala en denogo bagagi ako, Araro,” yiluk, welagwi halok andi, Asin ogo welagwi.

²⁴ Hit andi, wene o muk endak erogo henaruk hobaluk, wagagup ako, henendawima mondok wenggelek dugwit, vagago dogones. Mondok wadokdek vagago hiniselok, Nenasin Ala Abut iperen hinim hunigat dogosogom.

²⁵ Nit okbininaup Yesus en avyarat nggatuk erogo yagagi ako andi, “Hit mondok-mondok hiniluk dogovovok yiluk, okbigigayogon,” yiluk, yukneragagi andi aro.

²⁶ Iren henambukmu unggu dugwit, nomalhinivit lagu saoen, wene yi dirup warogo wokheraliga.

²⁷ Naburi. Ala Averiniki henovaga wombabigiga wagagi henendawima werekma, ap ambien hit mamulheraup dek. At Ala Averiniki en yi wene ndi wene ovok erogo mamulhirigya dugwit, huluk wene mamulheraligadek avyarat adigat mamulheraliga. Avyarat adigat mamulheraliga atma, At mamulheraliga ako andi, wane-wane ogagu dugwit, Keretus hinim mondok-mondok hunik okhidugu dugwit, vagago dogones.

²⁸ Anderogo atma, naburi. Hivis At warup ako hudi vaga nit nenanggadidek nenendawi seyalek dogoguluk, yogak en hit Yesus inim mondok hunigat okhidugu dogones.

²⁹ At Keretus andi, At sek adigat atma nggedok ogasiga hinilup atma, it avakwa sek ogasagwi ako, “It yi At Ala en endaginipigi o,” yiluk, hinilup arusogom.