1 Yohanes 1 - ALA WENE HIVIS DIRUP WATUGWA

At Eve Wene Yesus en niniluk okninivisiga wene

¹ Wen-mbogot yi ao dek hegek, At endak erogo welagagi avakwa iniluk oginivisiga menda Eve Wene ako, avok vagalogo yukherelagwi. At ane nenaruk hunggwis, eke ninil enggen en hugwi, ogarit lagya ako dibagwi, eyave nininggis vagatwis, ogagagup akoat yukherelagwi o.

² At mondok iluk agarik menda sigam agya lagagimu, ninil hagagup akoat vagalogo yukherelagwi. Eke, nit mondok-mondok niniluk dogoguluk, okninivisiga menda Yesus ako, Nenasin Ala inim welagagi. At sigam agagi ako, “Yi aro,” yiluk, yukherelagwi.

³ Nit Nenasin Ala Abut Yesus Keretus inim hunik agurik. Hunik werekma, hit ogo, ninim nenendawi ambiat hunik dogoguluk, ninil hugwi, nenaruk hunggwis, ogagagup akoat yukherelagwi.

⁴ Eke, vagalogo yukherelagwi yi ako ovok erogo, nit nenendawi adenggen mondok ombok arupwak yiluk, dirup yi, warisagwi.

At Ala o awiya hak agarik wene

⁵ At Ala Abut Yesus akoen yuknirigya dugwit, “At Ala andi, o awiya hak agarik atma, At endawima o hwiserek ovagak agarik mondok dek o,” yiluk, yukneragagi ako, nenaruk hunggu lagagurik, yukherelagwi andi aro.

⁶ Anderogo atma, nit o hwiserek vaga nagu dugwit, “An Ala inim hunik agirik o,” yugu niniselok, avyarat wene ako wane-wane ogagetek dugwit yagalagwi atma, nenane hulugat yagalagwi.

⁷ Anderogo ovara, At Ala andi o awiya vaga agarik hak, nit o awiya vaga lagu niniselok andi, nenaswei ninim nenendawi hunik werekma, At Abut Yesus amuya vaga nenomaduk ovok degerogo bininggu dogosogon.

⁸ Nit weyak ogagu dugwit arova, “Nit weyak ogasagwidek o,” yugu niniselok, hulugat yugu dugwit nenambukmu dagalhedelagwi atma, avyarat wene Yesus avok ako nenendawima agarik mondok dek aro.

⁹ Eke, nit nenomaduk avyarat vaganggu niniselok andi, At mondok des erogo atma nggedok sek adigat ogasiga menda atma, nit sek ogagetek weyak adigat ogarit lendagwi ako nenomaduk degerogo bagya, eke weyak nenendawima agarik ako horogo bininggu, ogagya dogosogon.

¹⁰ “Nit mondok weyak ogasagwidek aro,” yuguselok, At Yesus huluk yagaliga menda okbelagwi atma, At Yesus awene ako nit nenendawima agarik mondok dek aro.