1 Timotius 6 - ALA WENE HIVIS DIRUP WATUGWA

Avakwa enayeloman dugwit ogagu dogop wene

¹ It avakwa enayeloman onggo hunik menda andi, it ninen Ala inis inim, nit wene mamulerelagwi ako inim, wiyiknom-weyaknom erogo bagu saoen, iren “Nenasini aro,” yiluk, enane hunggu dugwit, enagayuk wutu dogopwak.

² It avakwa enayeloman andi, it nin enasini avyarat ombasagwi menda, it nin enasini avyarat ombasagwidek menda. Eke, it enayeloman akoen enasini avyarat ombasagwi menda halok, “Nit ogo avyarat ombasagwi menda atma, Ala aburi ninim ndatak aro,” yiluk, enane sovabisaup moga. Ata, it akoen, “Nenasini yavup okbiselagwi andi, avakwa it nin andi dek. Nit ninim ndatak avyarat ombasagwi atma nenendawi hunik aro,” yiluk, ambi inim enake ombok erogo ogarit nagu dogopwak. Wene yukhisiga yi ako ovok erogo mamulirigya, enaruk watya, ogagya dogwen.

Huluk wene mamulerelagwi menda avok yugogogi wene

³ Ap ambi modo wene Nenowa Yesus Keretus wene ako inim, eke, nit Ala wene wokbaluk, ogarit lagu dogop mamulerelagwi wene ako inim, anggon imbita dugwit, wene adik huluk menda mamulirigya halok,

^4-5 aren, “An nilup o,” yiluk, siyabategek landiga ovara, inggut hegek ugun yagan landiga. At ap andien wene, “Yi yerogoma ndi anderogoma,” iri dugwit, wene watya, eke wene maduk yup hegek wenemuk iris, ogarit lagya dogop andi mondok endawi hunik adigat ombasiga. At anderogo ogarit lagya halok, it ap ninen avyarat wene Yesus avok ako mondok inunggut dugwit, weyak adigat ombasagwi akoen “An iya, hat iya,” yugu dugwit, ogot lagwi, meyan umbutu dugwit avok mbalit lagwi, eke, huluk enova yugwi, inim mondok war-wat yugwi, ogasagwi. It ap wene adik huluk yagalagwi menda ako, “Nit Ala wene ogarit lagu dugwit, nininggis mondok werek okhedasogom,” ombasagwi ovara,

⁶ nit andi, yoparip werek hegek, dek hegek, Ala wene wokbaluk, nenendawi enggen vaga ogarit lagu dugwit, nenendawi ugun adenggen agurik halok, Ala en mondok iya erogo okbininaliga o.

⁷ Ninisai enendawima en endaklagu dugwit, nenangge-nenangge ambi nininggimu wolok wulu wagetekma, lagu dugwit ogo, ambi nininggimu hedelok lasogombuk.

⁸ Nenagarom-nenayum ambi werek halok andi, “Yi ovok aro,” yiluk, nenendawi ugun adenggen dogosogom.

⁹ It ap, “Nininggis werek okhedaup,” umbutuselok, Sile en, “Nanonggal aga o,” yiluk, enendawima mali wagya hegek, bagas heda bagoma adonggop nggeto yagaliga hak, it ap andi anderogoat verak erogo weyak ogagwi, eke, “Yi an neyave weyak okhedaliga,” embetetek enendawi ugun nenggek lagwi, ogarit lagwi vaga nggedek wambugu dugwit, eneyave mondok wakhedasogom aro.

¹⁰ Yi weyak ndi weyak adem andi, yoparip adigat hogop ombarit lendagwi andi aro. It avakwa nin ogo hogop en, belalit lagu dugwit, Yesus ovaga vanggabaluk avyarat umbutugwa ako hekbaluk, sup adik vaga nomaliluk lagusim, ap segowa vaga nagalhidugu lagarwik, edup helagwi andi hak, it ap andi, anderogo enendawi wakhedelagwi.

Timotius ogagya dogop yugogogi wene

¹¹ Hat halok andi, Ala angge atma, ogasagwi andi menda wagun en yiluk, agoda wunggu dogwen. Sek halok adigat ogagya, Ala wene wokbaluk ogarit lagya, hendawi avyarat imbitya, avakwa hendawi hunik okbugu, anggin hovaga agya hegek, hendawi wadokdek dugwit wigya, hendawi sagain vaga yugirigya, ogasagwi andi menda musek lagya dogwen.

¹² Nit Yesus avyarat ombakluk musek lendagwi ako, hat ogo nin ogorek inigik, mondok hanye erogo musek adigat lagya dogwen. Eke, hiluk mondok dogonyok yiluk, heyanggup iri lagagimu, hat Keretus avyarat imbitigin avakwa wisane inivaga hane vaganggigin ako, nggitik-nggetok erogo vagago dogwen.

^13-14 Wene endak hat ogarit lagya dogop yukhugu lagagis ako inim, yogak yukhisiga yi inim, ambi wombabagetek ovok erogo enewogogo vagago dugwit, Nenowa Yesus Keretus sigam ari warugwi hudi des erogo ogarit lagya dogwen. Ala yi menda ndi menda iniluk oginivisiga menda adem ako inim, eke, At avyarat wene Pondius Pilatus adema vaganggigi Keretus Yesus ako inim, iperen inivaga nane anye erogo yukhisiga.

¹⁵ Ala en Nenowa Yesus Keretus, “O andi hudi sigam okba warup,” hologo bagagi ako ndatak sigam okba warisogon. Nit siyabelagwi At Adigat Mondok Anye Werek menda andi, Ala aro. Avakwa enasini ap ombok-ombok Enasin Araro. Yi ap ndi ap ininis werek Enasin Inis Ombok andi, At adigat o.

¹⁶ At hambisigadek mondok iluk itok agarik Araro. At werekma andoma awiya wisane atma, avakwa At adema ari laup mondok meyan. Avakwa en endak At eyave inil hegetekma, yogak ogo inil hegetek adigat agarwik. At inis mondok siyalek yi avakwa ndi avakwa ovok erogo avema seve yiluk, At ane adigat hunggu dogopwak o, yiluk, amin.

¹⁷ It avakwa o yogak ininggis werek agarwik ako, andi vaga enendawi wogobatugu dugwit, yi menda ndi menda dek arup hegek, enendawi andi vaga vanggabaluk wenggelek dogoguven, yugirigya dogwen. Nit adenggen ombaruguluk, At yi menda ndi menda nggilup-nggilup erogo wokneraliga Ala vaga vanggabaluk wenggelek dogopwak yiluk, yugirigya dogwen.

¹⁸ It avakwa ininggis werek agarwik ako yi sek ndi sek ogagu dugwit, avakwa sek okbigik nagwis, enendawi dek avunya weyak avakwa wogeraup adigat enendawi hunik okbugwis, ogagu dogopwak yiluk, mamulirigya dogwen.

¹⁹ Andi ogaguselok, heveret o eyave valuguluk, yogak o owak wadokdek wombalisagwi ako andi ndatak, it hivis iniluk mondok segedok menda hidugu dogop enendawi anggin dek, “Okbininayogon,” ombakluk, enangge eyave hunhedaguluk, enayoparip wonggalhedelagwi hak, yogak sek adigat ogarit lagu dogopwak yiluk, yugirigya dogwen.

²⁰ Timotius wai. Wene des erogo yegetek enane agil-amok amburup werek vaga yagan nagwis, huluk wene ovara, “Wene swi menda yi aro,” yiluk yagan wagwi vaga winimuk yugwi, yagalagwi ako menda wabuk. Ata, hat vagago dogonyok yiluk, Ala en mendok okbagagagi ako des erogo ogagya dogwen.

²¹ Wene andi menda yagan nagwis vaga avakwa nin wugu lagagwarik, Yesus Keretus ovaga vanggabaluk avyarat umbutugwa ako hekbaluk, sup adik vaga nomaliluk lendagwi. Nenasin habwa en okbagagya dogopwak o.