1 Timotius 5 - ALA WENE HIVIS DIRUP WATUGWA

Avyarat ombasagwi menda okbugu dogop wene

¹ It ap enanggok halok, hane anye vaga mbererabuk. “Yi nasini ndatak atma,” yiluk, enendawi aik wakbugu dogwen. It apsawe andi, hat haswei ndatak,

² it akwa enanggok andi, hat hisai ndatak, eke, akwa sawe andi, hat harupwi ndatak, it vaga hendawima weyak mondok embetetek dugwit, yugirigya dogwen.

³ It akwa sogwa eneyagi-enowawi en des erogo inim agarwikbuk halok, dibugu dogwen.

⁴ Akwa sogwa eneyagi-enowawi werek halok andi, it akoen Ala wene ndatak ogarupwak yiluk, inisai-enambeyagi it enendak yonggar-inipu dogopwak. It inisai-enambeyagi en eneyagi-enowawi endarinipu lagagwa ako onggo yogak it anderogo yonggar-inipu dogopwak. Anderogo ogaguselok, Ala endawi sek ombasiga.

⁵ Hwa ambi sogwa ovara, eyagi en yonggat-helagwidek halok, “Ala en yonggat-nitya dogopwak,” yiluk, Ala ovaga vanggabaluk ape wenggelek dugwit, hup dingga Ala adema hunik adigat nggino yugugu, samban ogagya, ogasiga menda halok, hwa andi, eyave sogwa aro.

⁶ It akwa sogwa ininggis-vaga yavup ogagetek dugwit, “Amburup werek menda adigat nela-nela,” ombarit naguselok andi, iniluk agarwik ovara, Ala wene enendawima dek halok, nggorak ndatak-at agarwik.

⁷ Akwa sogwa anderogo ogaguselok, avakwa enane enovaga bisaguven yiluk, wene yi, yugirigya dogwen.

⁸ Ap ambi, ata hwa ambi, at owa-asin erom wogirigya, yonggar-inipu, ogasigadek andi, weyak ovara, at abur-ogwa, isa-asin, agun-eyak adigat erom wogirigya, yonggar-inipu, ogasigadek halok andi, weyak eve ombogat ogasiga. It avakwa Yesus Keretus avyarat embetetek menda andi, un weyak horogat ovara, at andi, weyak eve ombogat ogasiga. At Yesus Keretus avyarat imbitigi ako, hekbagagi agarik.

⁹ It akwa sogwa Ala aburi en yonggar-isaguluk ininis dirup wasagwi andi, hwa ambi endaklagagi hegek 60 tahun agetek halok, inis dirup warubuk. Ata, hwa sogwa ambi, agun ambi nggelabigitek sogwa bago halok,

¹⁰ “Hwa andi sek ogasiga menda,” yuguselok, eyagi des erogo sawe oginipu halok, ap huru enagania isagya halok, it Ala aburi avyarat ombasagwi menda enayeloman ovagak oginipu halok, it avakwa anggin enovaga agya yonggar-inipu halok, eke, yi yavup ndi yavup sek okbisaup ovok erogo “An neyavup-at,” yiluk, ogasiga halok, ininis dirup warup sek ovara,

¹¹ it akwa sogwa ao ndugum iniselok andi, ininis dirup warubuk. It akwa andi, enendawi ninggya halok, Keretus wene wogogwa ako hekbaluk, ap adik hedaup ombarusogom atma, ininis dirup warubuk.

¹² It endak “An Ala eyavup adigat ogagya dugwit an hwa sogwa mondok dogosogon,” yagagwa ako Yesus adigat musek laup umbutugwa ako hekbaguselok weyak okhidugu dogosogom.

¹³ O ya nonggegek nda nonggegek yagan nagu dugwit, yavup ogarup enanggon okhedelagwi. Andi adigat ogarit nelagwi andi dek. Ata, wene enabis atok vaga wolok nagwis, o ambima ya nonggegek yagan nagu dugwit, it nin enawene ako it milo-milo yugwi, ogarit nagu dugwit, wene yup dek ako menda hegek ugun yagan nelagwi.

¹⁴ Anderogo atma, it akwa andien ambi ogarusogom vaga it ninim ogorek akoen nenanggadi wakbininaguven, it akwa ndugum sogwa bisamwi ako, enaguni hidugwi, eneyagi endak inipwis, enaguni eneyagi inim segerogo welagwi, ogagu dogop segat ombasiga.

¹⁵ Akwa sogwa nin andi, madis Sile musek nagu dogoguluk, vage eneyami vaga yungguliluk wendagwi.

¹⁶ Hwa endawi avyarat ombasiga ambien isa sogwa werek halok, it Ala aburi evenuk anggin enovaga bisaguven yiluk, at eyak akoen yonggat-higya dogopwak. Eke, it akwa sogwa ovara, eneyagi dek halok, it Ala aburi en yonggar-inipu dogopwak.

Mbilape wene

¹⁷ Ala aburi enasini enavok ambi yisogon. It ap Ala aburi enasini enagayuk werek ovara, sek erogo vagenombogo iniselok, ambi inim onggo enagayuk wurup andi sek aro. It Ala wene ombok vaga yugurugwi, wene mamulirugwi, mondok hunik adigat ogaguselok andi, evenuk ambi inim onggo enagayuk wutu dogopwak.

¹⁸ Andi, Ala wene ambi, “Sapi en inisok gandum enggen enggenit lagya hegek nin naguven yiluk, enelagap heda marogo bisaup moga,” eke, ambi, “It ap yavup ogasagwi menda yavup onggo hedaup sek aro,” yiluk, yagagwa dirup warek agarik.

¹⁹ Ap mberen a, henggam a, “Anderogo ogaga o,” yiluk, yegetekma, at ambien adigat ap Ala aburi enasin ambi ane ovaga bagya halok, at ane andi, hulubuk.

²⁰ Ala Aburi enasin ambien weyak ogagya dogosogon halok, it avakwa ovok erogo enalon ombarupwak yiluk, avakwa ombokma anggadi watya dogop.

²¹ Avakwa yerogo ogarup, nderogo ogarup, wene yukhisiga yi, ovok ogagya dugwit, hat hinim hunik halok ogagu dogop yugeregetek hekbigya, eke, avakwa ugun halok ogagu dogop yugirigya, ogagya dogobuk. Ata, avakwa ovok erogo inilup akluk, ogagu dogopwak yiluk, yugirigya dogwen. Anen, Ala inim, Keretus Yesus inim, it Ala ake denek malaikat ako inim, ovok inivaga an wene yi yukhisiga.

²² Avakwa Ala eyavup ogagu dogopwak yiluk, mbikit hinggis inunggul vakbisiluk mendok okbisabuk. Avakwa weyak ogaguselok, hat hinim avuk arup andi moga. Hat hendawi mondok sek adik denek dogwen.

²³ Hagaum edup okhitya, heyave anyedek okhitya, okheraligama, hat is adigat ninggya dogobuk. Ata, anggur agas ambukumat inim ninggya dogwen.

²⁴ It ap nin andi, enavut mbanggitek hegek, it weyak ogasagwi ako sigam agarik atma hekbiselagwi ovara, it nin andi, enomaduk hwilago agarik atma, hivis sigam arisogon.

²⁵ Anderogo hak, it sek ogasagwi ako, yedok iniselagwi. Eke, it nin sek ogasagwi hwilago agarik andi, hivis hwilago anderogo dogosogonbuk. Sigamat arisogon.