1 Timotius 4 - ALA WENE HIVIS DIRUP WATUGWA

“Huluk wene yagan warusogom,” yugogogi wene

¹ At Averiniki en sigam erogo iri dugwit, “O hivis arup hudi vaga ap en avakwa enambukmu dagaguluk, madis en huluk wene yugirigya hegek mamulirugusigik, it ninen wene ako dibaluk, musek lagu dugwit, Yesus avyarat umbutugwa ako mondok hekbasogom o,” yiluk, yagaliga.

² It ap wene andi menda yagan nagwis ako andi, it enagavoval sek ova heda enane huluk molalogo yagalagwi. Nenagap yaga mbalekma omap agarikmu edup helagwidek andi hak, it ap andi, enendawima anderogoat, yi sek, yi weyak, enendawi dibelagwidek.

³ It ap huluk wene yagalagwi menda akoen, “Ap murik adigat dogop,” yiluk, yugurugwi, eke, yi menda ndi menda nelagwi menda “Naup moga,” yiluk, mamulirugwi, ogasagwi. Naup moga yagalagwi andi, nit ap avyarat wene Yesus avok ninilup akluk avyarat ombasagwi menda akoen, “Ugun naup sek yiluk Ala en bagagirikmu, ‘Wa,’ yiluk, menak-menak naup sek,” umbutu ninigik, it ako moga yagalagwi.

⁴ Yi menda ndi menda Ala en bagagi ako, sek adigat bagagi atma, nit nenendawi en, “Wa,” yugugu dugwit, welagwi halok andi, moga dek.

⁵ Ala wene inim, samban ogasagwi inim, andi vaga sek asiga atma, yi menda ndi menda ugun naup sek.

Keretus Yesus ayeloman sek dogop wene

⁶ An wene yukhisiga yi, howa-hasin Ala aburi mamulirigya heyalok, hat Keretus Yesus ayeloman mondok segedok menda dogogun. Eke, Yesus avyarat ombasagwi wene inim, wene Ala aburi nggarogo ogarit lagu dogop modo wene yugadek musek landiga inim, wogogo hendawi wenggelit landiga vaga, hendawi mondok wadokdek modo-at dogogun.

⁷ It akwa enanggok enarivit mbilinisagwi hak, yi wene ndi wene mondok eve sek menda dek hegek enam warogo yagalagwi andi menda ako, wabuk. Ala wene wogogin ako, hendawi eyave vaga ogarit lagya dogonyok yiluk, ndugurek-ndagarek mamulhidigya dogwen.

⁸ An wakhegek ambi yukhisogon. Avakwa nin andi eneyave anye aruguluk wal okhelagwi, eke, it nin andi Ala wene wokbaluk, enendawi eyave vaga ndatak ogarit lagu dogoguluk, wal okhelagwi. Neneyave anye aruguluk wal okhelagwi andi sek ovara, un horogat okninivisiga. Eke, Ala wene ndatak ogaruguluk wal okhelagwi andi Ala en o yogak inim, o hivis inim, mondok ombok erogo sek okninivisiga ninilup atma, ogasagwi.

⁹ Anderogo atma, wene wakhegek nit Ala wene ndatak ogaruguluk wal okhelagwi andi, avyarat wene atma, waup segat.

¹⁰ At Ala mondok iluk itok agarik ako, yi avakwa ndi avakwa ovok erogo enagap wendarup yiluk ombasiga ovara, nit nenendawi Yesus ovaga vanggabaluk avyarat ombasagwi andi nenagap wendarisiga. Andi vaga nenendawi vonggabaluk wenggelek agurik atma, dilwatu dugwit, hunik adigat ogarit lendagwi.

¹¹ An wene yukhisiga yi ako yugirigya, mamulirigya, ogagya dogwen.

¹² Hat heyave ao sawe atma yiluk, avakwa en sovalogo bagaup andi moga. Yagaliga inim, ogasiga inim, avakwa hendawi hunik oginivisiga inim, Yesus Keretus avyarat ombasiga inim, hendawi weyak embetetek dugwit ogarit landiga ako inim, ogasiga andi vaga it ap avyarat ombasagwi menda hat il wakhegek dugwit, ogagya dogwen.

¹³ An ao wagetek neyagek, Ala wene dirup warek ombokma bikhegek yugirigya, avakwa mbilinirigya, enaruk watya, wene mamulirigya, ogagya dugwit, des erogo ogagya dogwen.

¹⁴ Endak, it Ala aburi enasini akoen hunggul sovabagagusigik, Averiniki en yukhugu hegek, “Hat hivis Ala eyavup ambi anderogo ogagya dogop,” yiluk, Averiniki anye wokhogogi ako, moma erogo hekbaup andi moga.

¹⁵ Hendawi modo asiga ako avakwa ovok erogo yedok heyapwak yiluk, wene yukhigis andi vaga avyarat vanggabaluk, ogarit lagya dogwen.

¹⁶ Handogon hovavut ogasiga menda inim, wene mamuleraliga menda inim, dibagya dogwen. Wene yi, mondok segerogo vagago dogwen. Segerogo vagago heyalok, it avakwa hat hane hulisagwi ako enagap wendatya, eke, hat ogo hagap wendakhidigya, ogarisogon.