1 Timotius 3 - ALA WENE HIVIS DIRUP WATUGWA

Ala aburi vagenombogo dogop mendok okbisaup wene

¹ “Ap ambi en, an Ala aburi vagenombogo dogosogon o, ombasiga halok, yavup ogarup embetas andi, iya aro,” yiluk, avakwa en yagalagwi menda ako andi, avyarat yagalagwi.

² Ap ambi Ala aburi vagenombogo dogop mendok okbaup ombasagwi halok andi, avakwa enane at ovaga belagwidek halok, ogwa ambiat wogo halok, endawi suam wakhidigya halok, endawi werek halok, endawi luvuk erek halok, enagania isagya halok, avakwa sek mamulirigya halok,

³ amburup nenek oginivisiga menda agaum erogo naligadek halok, aninis mbikit asigadek, endawi sagain halok, yerek-warek yagaligadek halok, endawi yoparip hogop ombasigadek halok, ap anderogo menda andi, Ala aburi vagenombogo dogopwak yiluk mendok okbisaup sek aro.

⁴ Ap ambi Ala aburi vagenombogo dogop andi, at aburi des erogo vagenombogo dugwit, mamulirigya, aburi en at ane hunggwis, ogasiga menda halok adigat mendok okbaup.

⁵ Ap ambien at aburi des erogo vagenombogo dogop inggut halok, Ala aburi andi, nggarogonggan vagenombogo dogosogon embetep?

⁶ Ap ao swiat Yesus ovaga vanggabaluk avyarat embetas halok mendok okbabuk. Sile endawi siyabatigya lagagimu, anggin ovaga okbagagi ako hak, ap andi, anderogo endawi siyabetaliga vaga anggin ovaga okbagya haoen, mendok okbabuk.

⁷ At mendok okbaup ako, it ap avyarat ombasagwidek menda en at ogasiga vaga avok yugu dugwit, “Ap andi, andogon sek aro,” yagalagwi halok adigat mendok okbaup. Ata, at weyak ogarimi vaga, it ap avyarat ombasagwidek menda en at ogasiga vaga avok yugu dugwit, “Ap andi, andogon weyak,” yugusigik mendok okbaup halok, bagas heda bagoma adonggop nggeto yagaliga hak, Sile en ap andi, anderogo endawi nomalisogon.

Ap yonggaragak mendok okbisaup wene

⁸ Eke, it ap yonggaragak ako, anderogo it enovavut sek halok, enane mberen dek ambiat adigat yagalagwi halok, anggur agas nenek oginivisiga menda enagaum erogo nelagwidek halok, yoparip hogop umbutu dugwit avakwa yewes oginivisagudek halok,

⁹ eke, Ala en ninim dambubininagiluk At abut Yesus lakba wagagi wene mbauk hwilago welagagi ovara yogak sigam agagi ako, vagago dugwit, enomaduk horogo baluk enendawi seyalek vaga ogaguselok, it ap anderogo menda mendok okbisaup sek aro.

¹⁰ It ap yonggaragak dogop andi, endak enavut mbabaluk, enane enovaga biselagudek halok, mendok okbisaup sek.

¹¹ It enogwai andi anderogo enovavut sek dugwit, wolok-wolok ane yagan nelagwidek halok, enendawi suam wakhiduguselok, eke, it yagalagwi ndatak vaga ogaguselok, akwa anderogo menda iniselok, it enaguni ap yonggaragak mendok okbisaup sek.

¹² It ap yonggaragak andi, enogwa ambiat wogo halok, eke, inaburi inim, it inim agarwik menda inim, des erogo vagenombogo iniselok adigat mendok okbisaup sek aro.

¹³ It ap yonggaragak ogarit lendagwi menda ako it enova hwalek vaga ogaguselok, ininis werek dogosogom. Eke, it enova hwalek vaga ogaguselok, nit nenendawi Keretus Yesus ovaga vanggabaluk avyarat ombasagwi wene ako, it enalon embetetek dugwit, yugeregek nagu dogosogom.

Wene mbauk hwilago welagagi wene

^14-15 An vage hadema warup ombasiga ovara, an ambi yidup iri haoen, Ala aburi dugwit, nggarogo ogarit lagu dogop hilup arinok yiluk, nape wenggelek dugwit, dirup yi wasiga. Nit Ala aburi ako Ala mondok iluk itok menda angge aro. Eke, o valek ako owak sek ngguvulik vaga ndun yagaligadek itok-itok agarik hak, avyarat wene Yesus avok ako nit Ala aburi vaga sigam erogo itok-itok agarik.

¹⁶ Ala wene wokbaluk nenendawi eve vaga ogarit lagu dogop wene mbauk hwilago welagagi ako mondok iya aro. Andi, “At ap-at ari wagya lagagimu, ‘Yi Ala abut,’ ombarupwak yiluk, Averiniki en sigam okbagagi. Sigam okbagya lagagimu, it malaikat en At eyave inil hugwi, At awene it weram Yakuri dek menda werekma yugeregek lagwi, It ap yi awi ndi awi ‘Yesus Ala abut avyarat ai,’ umbutwi, ogagu lagagwama, o segedokma abinak adigat agarikmu wolok inggigi o,” yiluk, yagalagwi menda ako mondok avyarat higyo.