1 Timotius 2 - ALA WENE HIVIS DIRUP WATUGWA

Samban ogagu dogop wene

¹ Andi halok, wene endak yukhirup imbiti ako yukhisogon o. It avakwa ovok erogo enake samban ogarup. It vaga Ala wa yugugwis, enake nggino yugugwis, ogagu dogovovok yiluk, nane anye vaga yukhisiga.

² It ap ombok-ombok inim, ap ininis werek ovok erogo inim, enake samban ogagu dogwes. It sek erogo vaknenombogo inigik, nenendawi sek vaga Ala musek lagu dugwit, ugun adenggen wadokdek dogoguluk, it enake samban ogagu dogwes.

³ Anderogo ogagu hiniselok, segat ogasagwi. Eke, nenagap wendarisiga Ala ako endawi sek nenombasiga.

⁴ Aren yi avakwa ndi avakwa ovok erogo At avyarat wene Yesus avok ako inilup akluk enagap wendarup ai, ombasiga.

⁵ Andi, At Ala ambiat agarik. Eke, avakwa inim, Ala inim, serak enake yonggo lakbagek ap ambiat Keretus Yesus aro.

⁶ Yi avakwa ndi avakwa ovok erogo heda visilogo bisagiluk, eyave vaga enonggo bagagi. Enonggo bagagi ako andi, At abut lakba warup imbitigi ako sigam ari warup amor ari wagya lagagimu, sigam agagi.

⁷ Ala en yi avakwa ndi avakwa ovok okbisaup imbitigi ako, it ap weram Yakuri dek menda avyarat wene Yesus ovaga vanggabaguselok, enagap wendarisogon wene ako mamuleregek lagya dogogiluk mendok okbaninggigi. Eke, yi awi ndi awi yugeregek lagya dogogiluk, lakbigik menda baninggigi. Wene andi, huluk dek mondok avyarat yukhisiga.

⁸ Anderogo atma, it ap yi awi ndi awi ovok erogo enaninis umbutwi, winimuk yugwi, yegetek sek adigat dugwit, ininggis ilikbaluk, samban ogagu dogopwak yiluk, “Ai!” adigat ombasiga.

⁹ Eke, it akwa enendawi werek en enayum des erogo yikhedelagwi hak, it akwa ovok erogo enendawi werek akluk, anderogoat enasum enanggem nggetok erogo yikhidugu dogopwak. Ap enendawi napwak yiluk iniris danggwis, mbusi emas menda yiritwis, helep enggen onggo ombok elose sek menda mutiara ako yikhidugwi, eke, yum onggo ombok halok adigat hunogo yiritwis, ogarup andi moga.

¹⁰ Ata, it akwa Ala wene wokbaluk, musek lendagwi menda en enayum dibaluk yikhedelagwi hak, yi sek ndi sek ogarup ako andi, ndatak dibaluk ogagu dogopwak.

¹¹ It akwa ako andi, enanedek dugwit, ap enavema seve yiluk wene mamulhidugu dogopwak.

^12-14 At Hawa endak ogagetek. Ap Adam endak ogagagi. Eke, Sile akoen ap Adam ambukmu enggetek. Ata, hwa Hawa ambukmu inggigirikmu, hwa akoen weyak ogagagi. Andi atma, anen “Akwa andi, enanedek dugwit, Ala wene des erogo hunggu dogopwak. Ap mamulirugwi, eke, it akwa en ap enavema bisiluk, ‘Yi ogaru, ndi ogaru,’ yugurugwi, ogagu dogobuk,” yiluk, yagaliga.

¹⁵ Hwa ako andi weyak ogagagi ovara, it akwa ako enendawi werek dugwit, Yesus avyarat umbutwi, avakwa enendawi hunik okbugwis, eke, weyak ogagetek Ala ake denek dugwit, ogaguselok, it eneyagi endak inipusigik, Ala en enagap wendarinipu dogosogon.