1 Timotius 1 - ALA WENE HIVIS DIRUP WATUGWA

^1-2 Nabut Timotius wai. At nenagap wendarisiga menda Ala inim, Nenowa Inis Ombok Yesus Keretus Ala en denogo lakba wagagi nenape wenggelek agurik ako inim, iperenen wene yuknugu lagagwama an Paulus Keretus Yesus lakbigik menda okbanunggugwa akoen, nit Yesus avyarat ombasagwi ako vaga hat an nabut-at agagindikmu, wene ambi yukhisogon o. At Nenasin Ala, Nenowa Inis Ombok Keretus Yesus Iperen habwa en okbagagwi, enaigwak aberen okhitwis, eke, hendawi ugun adenggen wadokdek dogonyok yiluk, okbagagwi, ogagu dogopwak.

Huluk wene yagan waguselok ogagu dogop wene

³ An o Makedonia warigiluk, ogagya dugwit, “Hat o Evesus yenam dogwen,” yiluk, nane anye erogo yukhogogis akoat, ambi inim yukhisiga. It ap nin avyarat wene inunggut dugwit adik huluk wene yagalagwi ako, “Mamuleraup moga,” yiluk, yugirigya,

⁴ eke, “It avakwa mupilin adigat mbilinggwis, ap enadem endago mbilinggu dugwit, mbup yegetek enane likhelok lagwi, ogasagwi andi, moga,” yugirigya dogonyok yiluk, yenam dogwen yukhogogis ako ambi inim yukhisiga. Wene andi menda mbilinggu dugwit, nenendawi Yesus ovaga vanggabaluk avyarat ombasagwi vaga Ala en okbininaup imbitigi ako ninilup arupwak yiluk yuknerelagudek un wene adem belanggu dugwit, nane-hane yagalagwi atma, “Moga,” yiluk, yugirigya dogwen.

⁵ Eke an wene yukhisiga yi, avakwa nabwa-habwa ombarupwak yiluk, yukhisiga. It enendawi weyak embetetek sek adigat ogagwi, enendawi enggen vaga Yesus avyarat umbutwi, ogasagwi ako vaga avakwa enabwa ombasagwi atma, anderogo ogagu dogopwak yiluk “Yugirigya dogwen,” yiluk, yukhisiga.

⁶ Avakwa nabwa-habwa ombarup wene an yukhisiga yi, ogarup hegek it avakwa ninen nomalogo wene dek arup menda adigat enam warogo mbilinisagwi.

⁷ It ap andien, “Musa wene andi nirat yugurugu dogosogom,” ombasagwi ovara, it mamulerelagwi inim, eke, enane anye vaga, “Andi avyarat ninilup o,” yiluk, yagalagwi inim, it enendawi ugun inunggut dugwit, yagalagwi.

⁸ Ala wene Musa en dirup watigi ako des erogo ogaruguluk, welagwi halok andi, segat helagwi.

⁹ Musa wene ako andi, ap enendawi sek iniselok yugeregetek andi, ninilup. Ata, it ap wene hobalek sagalisagwi menda inim, enasini enane hulup enanggon ombasagwi menda inim, Ala enanggon ombasagwi menda inim, it weyak ogasagwi menda inim, samban ogarup enanggon umbutu dugwit ugun-ugun ogarit lendagwi menda inim, inisai-enasini enasagwi menda inim, avakwa ugun-ugun enarit lendagwi menda inim,

¹⁰ avakwa ugun oginivisagwi menda inim, ap-ap ogasagwi menda inim, avakwa eneyak enaburi hwilak inivisagwi menda inim, enane huluk yagalagwi menda inim, enane huluk enovaga biselagwi menda inim, it anderogo ogasagwi menda ovok erogo wene Ala aburi nggarogo ogarit lagu dogop modo wene ako hegek adik ogaguselok, Musa wene ako it enake yugeragagi ninilup aro.

¹¹ Modo wene ako At Ala siyalek abinak agarik akoen Sek Wene Yesus ninim hunik dugwit, niniluk mondok dogop wene ako, an vagago dogopwak yiluk, andok okbaninggigi akoat.

Ala okbagya vaga, “Wa,” yugogogi wene

¹² An nanye okbaniliga menda Nowa Inis Ombok Keretus Yesus akoen, “Ap yi, ambi ogagya dogopwak yiluk, denogo bayogon halok, des erogoat ogagya dogosogon,” nimbita lagagirik, an yavup ambi ogagya dogopwak yiluk, denogo baninggigi atma, “Wa,” yugisiga.

¹³ An endak “Yesus andi Ala abut dek,” yiluk, wiyiknom-weyaknom erogo bagya, naninis en, At ane welagwi menda enarit lagya, wiyiknom-weyaknom erogo bugu, ogagya lagagis ovara, an Yesus ovaga vanggabaluk avyarat embetetek ugun ninggut dugwit, ogagya lagagimu, Ala aigwak aberen hekbaninggigi.

¹⁴ Nowa Inis Ombok Keretus Yesus nabwa en okbanenggek adigat ogagya dugwit, Yesus ako Ala abut an avyarat ombarupwak yiluk okbaninggya, eke, avakwa nendawi hunik oginipu dogogiluk okbaninggya, ogagagi.

¹⁵ “Avakwa weyak ogasagwi menda ako enagap wendarigiluk, Keretus Yesus o yoma wambu wagagi,” yiluk, yagalagwi ako andi, avyarat wene atma, waup segat. Avakwa ovok erogo weyak ogasagwi ovara, an ako mondok eve weyak ogagya lagagis,

¹⁶ adem andi vaga At aigwak aberen hekbaninggigi. Hivis it avakwa iniluk mondok dogop ombasiga akoen enendawi At ovaga vanggabaluk, avyarat ombasagwi vaga wugu dogop ako, il wakhegek ogagu dogop an neyave-at. Niren Yesus Keretus weyak okbelagwi ovara, onggo mbikit okbininaligadek dibaluk okbininaliga ako, weyak ogagya eve iya an neyave ako vaga sigam arupwak yiluk, aigwak aberen hekbaninggigi.

¹⁷ Eke, avakwa endak welagagwa inim, yogak agarwik inim, o hivis dogogup inim, Nenasin Inis Ombok hambisigadek iluk mondok itok menda ninil helagudek Ala adigat agarik ako inis mondok-mondok abinak agayuk werek dogopwak o. Amin!

Timotius yavup vagago dogopwak yiluk okbagagi wene

^18-19 Eke, nabut Timotius wai. Hat ao ogagetek heyagek, Averiniki en Ala aburi enasini yugirigya hegek it yukhugu dugwit, “Hivis anderogo ogagya dogogun o,” yiluk, yukhogogwa wene ako hat vagago dogonyok yiluk ambi inim yukhisiga. Wene andi vagago dugwit ogagya heyalok, hat hanye erogo halon dek dugwit ogarit lagya dogosogon. Hat hendawi Yesus avyarat ombasiga inim, hendawi sek ombasiga halok adigat ogarup inim, mondok nggetok erogo vagago dogosogon. It ap nin andi, Yesus ovaga vanggabaluk avyarat umbutugwa ako mbobaluk, adik ogarit lendagwi.

²⁰ It ap Himeneus, Alesander ogo, anderogo ogasagwi atma, it Ala inis wiyiknom-weyaknom erogo baup enalon ombarupwak yiluk, anen madis Sile inggimu okbogogis.