1 Tesalonika 5 - ALA WENE HIVIS DIRUP WATUGWA

Nenowa wasogon atma suam watu dogop wene

¹ Ai, nowa-nasin. Wene yi ogarup yukhirigyo ako andi, “O ngga vaga warimi, saut nggao irisim warimi a, tahun ogagusim warimi a?” hinilup arovovok yiluk, dirup warogo wokheraligadek.

² At Nenowa warup ako andi, ap enonggop welagwi menda en o hup wendagwi ako hak wasogon andi, ovok hinilup.

³ It avakwa en, “Wene ambi nenovaga agetek nit ovok sek atma, nenendawi ugun adenggen adigat agurik o,” yugusigik, hwa avula eyak endaklarup inggutmu, edup en yagan wasiga ako hak, Nenowa mbikit yukdekma wagya dugwit, mondok enelose degerogo bisa warisogon atma, it ambi hoda wulusogom mondok dek.

⁴ Anderogo atma, nowa-nasin. Hit andi, o hwiserekma agipikbuk. Ap enonggop welagwi menda en o hunogoma nunggwigya halok, enanggela wilisiga ako hak, o andi vaga hit anderogo henanggela wilisogonbuk.

⁵ Hit ovok erogo avakwa o hup vaga dugwit ogasagwi ako hak dek. Ata, hit andi dingga vaga dugwit ogasagwi menda ako hit aro. Eke, it avakwa o hwiserekma vaga dugwit ogasagwi hak hit dek. Ata, it o awiya vaga dugwit, ogasagwi ako hak hiratma,

⁶ it avakwa nin nogo yilagwi ako hak nit anderogo nogo yugu dogop dek. Nit nggungguk nogo yigitek suam watu dogosogom.

⁷ It avakwa nogo yilagwi menda ako andi, o hup-at nogo yilagwi. Eke, it amburup nenek okninivupwak yiluk, nelagwi menda ako andi, o hup-at nelagwi ovara,

⁸ it dingga ogasagwi ako menda niratma, nit nggungguk nogo yigitek suam adigat watu dogosogom. Ap yegen werek en, meda naruguven yiluk, sin enagap vaga yikhedelagwi hak, niren, madis Sile, weyak okbininagwi en yiluk, nenendawi Yesus vaga vanggabaluk avyarat umbutwi, avakwa nenendawi hunik okbugwis, ogagu dogosogom. Eke, ap enayegen werek naruguven yiluk, unggul agasum mbusi menda danggulik ako vonggabaluk agarik hak, nit ogo, madis Sile akoen, ninarugwi en yiluk, Ala en nenagap wendakninivisogon umbutu dugwit nenendawi vanggabelagwi.

⁹ At Ala en aninis nenovaga bininagiluk, denogo bininggitek. Ata, At Nenowa Yesus Keretus en nenagap wendarupwak yiluk, denogo bininggigi.

¹⁰ Nit niniluk agurik halok, ata hambugu niniselok, At ninim niniluk mondok dogoguluk, nit nenake hombagagi.

¹¹ Anderogo atma, hit henendawi aik war-wat yugwi, eke, at ambien at ambi endawi modo okbagwi, ogasagwi ako yogak ndatak ogarit lagu dogones.

Enaruk watigi wene

¹² Ai nowa-nasin. It ap Ala aburi enasini henanggelekma enanyedek erogo okbugugwis, Nenowa Inis Ombok inim hunik dugwit vakhenombogo welagwi, eke, mbilape yukhirugwi, ogasagwi ako enagayuk wutu dogovovok yiluk, yukherelagwi.

¹³ It ogarit lagwi andi vaga hit henendawi hunik okbugu dugwit, wogobugu dogovovok yiluk, yukherelagwi. Hit henendawi ambiat dambulik dogones.

¹⁴ Ai, nowa-nasin. It ap yavup okhedaup enanggatek iniselok, enaruk watwis, eke, it Yesus avyarat umbutu dugwit ogagu dogop inugut adigat embetek naguselok, enendawi hora okbugwis, enendawi ao hoda agetek halok, enendawi hoda okbugwis, eke, avakwa ovok erogo henane sagain vaga yugurugwi, ogagu dogones.

¹⁵ Weyak onggo-onggo ogagu hinisaoen, dibatugu dogones. Hikit inim, it avakwa ovok erogo inim, sek adigat ogagu dogopwak yiluk, dibatugu dogones.

¹⁶ Henendawi adenggen adigat umbutu dogones.

¹⁷ Mbup yegetek samban adigat ogagu dogones.

¹⁸ Hit Keretus Yesus hinim hunik dugwit, ogarit lagu dogop hinimbitigi ako andi, yi menda ndi menda okbigigelagwi ako, Ala adigat “Wa,” yugugu dogones.

¹⁹ Hali nagaup yagaliga hak, henendawi Averiniki yukheraliga ako nagaulogo baup andi moga.

²⁰ Eke, Averiniki en yugirigya hegek, yukherelagwi wene ako, wiyiknom-weyaknom erogo baup andi, moga.

²¹ Yi wene ndi wene yagalagwi ako avut mbabaluk, eyave sek halok adigat nggitik-nggetok erogo vagago dogones.

²² Yi weyak ndi weyak andogon yedok halok, hekbagu dogones.

Heyaga wakbogogi wene

²³ Nenendawi ugun seyalek adenggen okbininaliga Ala ako, hit heneyave At ake denogo bugugu dugwit, henendawi weyak menda mondok horogo bigigapwak. Eke, Nenowa Yesus Keretus wagya dugwit, hit heneyave-henendawi ovok erogo weyak ogagetek dogosogom vaga, ane ambi henovaga bigigagwi en yiluk, okbugugu dogopwak.

²⁴ At yanggup yukneragagi akoen, yagaliga ako andi adik ambi asigadek, ovok des erogo ogasigama, akoat ogagya dogosogon o.

²⁵ Ai, nowa-nasin. Nenake samban ogagu dogones.

²⁶ Heyaga war-wat yugu dugwit, henendawi hunik vaga dinggik-hambuk yugu dogones.

²⁷ Nit dirup watup yi, it nenowa-nenasin avyarat ombasagwi menda ovok erogo inivaga mbilinogo yugeravovok yiluk, Nenowa inis vaga yukheraliga.

²⁸ Nit Nenowa Yesus Keretus henabwa en okbugugu dogopwak o. Wa nowa-nasin!