1 Tesalonika 4 - ALA WENE HIVIS DIRUP WATUGWA

Ala en sek nenombarupwak yiluk yugeragagi wene

¹ Ai, nowa-nasin. Wene atok vaga ambi yukheraup umbuturikmu yukherasogom. Ala endawi sek henombarupwak yiluk, “Nggarogo ogarit lagu dogop?” mamulheragagup ako, ovok ogarit lendagwi ovara, ambi inim mondok ombok erogo ogarit lagu dogovovok yiluk, Nenowa Inis Ombok Yesus en yuknirigya halok, yukherelagwi.

² Nenowa Yesus en, “Yugeranes o,” yiluk, yuknirigya lagagimu, wene, “Yerogo ogarup, nderogo ogarup,” yukhirugu lagagup ako, hit hinilup-at.

³ At Ala en hit weyak ogagetek At ake adik denek dogop ombasiga ako andi, hit avakwa ugun ogarup moga yiluk, yagagi.

^4-5 It avakwa weram menda akoen Ala inunggut dugwit, enendawi ninggya halok akwa ugun-ugun oginivit nelagwi ako hak, hit anderogo ogagu dogobuk. Ata, hininis sek dogopwak yiluk, “Ala inis vaga dambubininaup o,” yiluk, weyak ogagetek enabwa umbutu dugwit, henogwai hidugu dogop.

^6-7 Nit weyak ogagu dogopwak yiluk, At Ala en mikninipigibuk. Ata, weyak ogagetek At ake adik denek dogoguluk, mikninipigirikmu, nit endak nenane anye vaga yukhirugu lagagup ako ndatak, it avakwa weyak anderogo ogaguselok, Ala en onggo adik hologo okbininiliga atma, henaswei weyak okbugu dugwit, wanggis waup moga.

⁸ Anderogo atma, ap ambi en, “Wene yi, Ala en yegetek. Ap enat yagao,” yiluk, weyak erogo hekbagya halok, ap akoen avakwa hekbisaligadek. Ata, At sek adik denek Averiniki wokneraliga Ala akoat hekbaliga.

⁹ Henaswei Yesus avyarat ombasagwi menda hinim henendawi hunik okbisilin lendagwi ako andi, Ala en ovok mamulheragagirikmu, wene andi menda ambi inim dirup warogo wokheraup degat higi.

¹⁰ Hit henowa-henasin avyarat ombasagwi menda ovok erogo o Makedonia menda, avyarat henendawi hunik okbiselagwi ovara, ambi inim henendawi hunik oginipu dogovovok yiluk, yukherelagwi.

^11-12 It avakwa Yesus avyarat ombasagwidek menda en hit des erogo ogarit lagu hiniselok, henagayuk wutu dogopwak yiluk, it nin enawene ako hit hinim milo-milo yubuk. Ata, hit hininis sek dogovovok yiluk, henamwa des erogo dugwit, henendawi ap nin enovaga vanggabigitek hit hininggis en okbetaluk nunggwi, eke, nit endak henaruk watugup ako des erogo ogagwi, ogagu dogovovok yiluk, yukherelagwi.

Nenowa Inis Ombok warup wene

¹³ Ai, nowa-nasin. It avakwa hambugu lagarwik nggarogo asagwi wene ako, hinunggut dogop andi, nenanggon. Avakwa nin hambuluk iniluk okbisaup wene ako enendawi Yesus vaga vanggabagetek dugwit, enaswe ambi hambigya halok enendawi wakhedelagwi hak, hit henendawi anderogo wakhidugu dogoguven yiluk mbilinogo yukherasogom.

¹⁴ At Yesus hambigya lagagirik, iluk mendok yagagi ako nit avyarat ombasagwi halok, it avakwa Yesus inim hunik dugwit, hambisagwi ako At Ala en iniluk erogo mendok okbisayogon avyarat ombasagwi.

¹⁵ Nenowa Inis Ombok yagagi ndatak, niren yukherelagwi o. At wagya halok, it avakwa hombagagwa ako ao iniluk mondok okbigitek inigik, nit ao niniluk agurik ako nenendak dagasogombuk.

¹⁶ Ata Nenowa Inis Ombok akoen yanggup iris, yonggo lakbisa wandiga menda enowa ombok malaikat akoen ane iris, Ala angge ane ombok ogasiga menda trompet ako ane ogagya, ogagu dugwit, Nenowa mbogot vaga en wambu wagya hegek, it avakwa Keretus inim hunik dugwit, hombagagwa ako, At Ala en enendak iniluk erogo mendok okbisayogon.

¹⁷ Iniluk erogo mendok okbugu dogomindik, nit niniluk ao agurik ako, it ninim hena anggelekma ilim andenam Nenowa Yesus ninim dambuluguluk, woknenombolok dagasogon. Woknenombolok inggya halok, Nenowa Yesus ninim mondok-mondok dogosogom.

¹⁸ Wene andi, Nenowa enat yukneragagirikmu, andi vaga henendawi aik war-wat yugu dogones.