1 Tesalonika 3 - ALA WENE HIVIS DIRUP WATUGWA

¹ Anderogo atma, hit nggarogo agipik ako ninunggut dogop meyan agya lagagimu, nit nenadik o Atena andenam mbup yup umbutu lagagurik,

^2-3 at nenaot Ala ayeloman dugwit, Sek Wene Yesus Keretus avok ako ninim yugeralagwi menda Timotius ako henadema lakba wagagup. At akoen, it avakwa anggin henovaga bigigelagwi vaga wene andi, “Nenanggon o,” yiluk, hekbagu hinisaoen, hit Yesus avyarat ombasagwi ako henendawi wadokdek okbugugu, hit henendawi aik wakbugugu, ogagya dogopwak yiluk, at henake lakba wagagup. Nit anggin-mbanggin nenovaga okbininaup denek agurik ako hinilup-at.

⁴ Eke, hit ninim dugwit, ao okbininggitek hegek, “Anggin okbininggu dogosogom o,” yukhirugu lagagup ako, ovok oklagagi andi, hit hinilup.

⁵ Anderogo atma, hit nggarogo agipik an ninggut dogop meyan oknitya lagagimu, at nit weyak ogarupwak yiluk nenendawima malisiga menda akoen hit henendawi nomalhinivup hegek nit enam warogo wene yukhirugu lagagup haoen, nendawi anggin dugwit, hit henendawi Yesus ovaga vanggabaluk avyarat ombasagwi ako nggarogo ogasagwi an nilup arigiluk, henake ap Timotius lakba wagagis.

⁶ Eke, yogak andi, at Timotius vage hit werekma en nit nenadema waga. Nenadema wagya lagarik, hit Yesus avyarat ombasagwi wene inim, avakwa hinim henendawi hunik okbugwis wene inim, eke, niren, “Hit bikhinisaup ai,” ombasagwi hak, hiren, “It bigisaup ai,” nenombakluk, ndugurek-ndagarek henendawi nenovaga wenggenggu dugwit, henadenggen ombasagwi ako inim, Sek Wene andi yuknera waga o.

⁷ Anderogo atma, ai, nowa-nasin. Anggin-mbanggin nenovaga biningguselok, nenendawi anggin ndun yagan lagusim, Yesus vaga avyarat ombakluk hit musek lagwi ako yuknera wagya lagama, nenendawi seyo aga.

⁸ Eke, yogak hit Henowa Inis Ombok henendawi hunik dugwit, mondok wadokdek hiniselok, nit anggin en nenendawi wakhedasogombuk. Nenadenggen dugwit, ogarit lagu dogosogom.

⁹ Hit ogarit lagwi vaga nit nenendawi adenggen wisane okninivisigama, nit Ala ombok erogo “Wa, wa, wa” yiluk, yugisagwi.

¹⁰ Nit henelokwe hinugu dogomindik, Yesus vaga vanggabaluk hit avyarat ombasagwi ako ambi ao henendawi hoda agetek halok, ambi inim yukheraguluk, hup-dingga nenendawi adenggen ombok erogo umbutu dugwit henake samban ogasagwi.

¹¹ Nit bikhinisa warup ako Nenasin Ala Nenowa Yesus Iperenen sup mbilogo bininapwak yiluk, samban ogasagwi.

¹² Niren hit nenendawi mondok hunik okbigigelagwi ako ndatak, hikit inim, avakwa ovok erogo inim, ambi inim nendawi-hendawi hunik oginipu dogop Nenowa Inis Ombok en okbugugu dogopwak o.

¹³ Eke, Nenowa Yesus At aburi ake denek menda inim wagu dogomundik, hit weyak ogagetek mondok sek adigat ogagu hiniselok, Nenasin Ala ane anggin ambi henovaga bigigayogonbuk yiluk, henendawi wadokdek okbugugu dogopwak o.