1 Tesalonika 2 - ALA WENE HIVIS DIRUP WATUGWA

Paulus o Tesalonika dugwit, ogagya lagagi wene

¹ Ai nowa-nasin wa. Nit un enam warogo bikhinisa wagetek ako, hit andi, hinilup-at.

² Nit o Pilipi werekma, anggin-mbanggin nenovaga bininggwis, wiyiknom-weyaknom erogo okninipwis, ogagagwa hinilup ako ovara, hivis, o Tesalonika dugwit, Ala wene sek menda ako it wisane en, “Nenanggon,” yiluk, ninim ogorek inigik, Ala yonggat-ninivisiga atma, nenalon embetetek yukhirugu lagagup.

³ Nit henaruk watu dugwit, yukherelagwi ako andi, nit ninunggut dugwit yukhirugwi, nit ambi hedaguluk yukhirugwi, henendawi waguluk, huluk wene yukhirugwi, ogasagwidek.

⁴ Ata, Ala en ninavut mbabaluk, niren Yesus ninim hunik dugwit, niniluk mondok dogop Sek Wene andok okbininggigi ako ndatak-at yukherelagwi. Hit henendawi sek nenombarovovok yiluk yukherelagwidek. Ata, At nenendawi avut mbalisiga Ala ako endawi sek nenombarupwak yiluk, yukherelagwi.

⁵ Nenane agil-amok vaga yukhirugu lagetek andi, hinilup. Hit henangge ambi hedaguluk, nenane vaga, “Ai-au” yagalagwi andi, At Ala ilup atma, nenane yukhirugu lagatek.

⁶ Hit inim, it avakwa hunogo inim, nit wogobininapwak yiluk, wagetek. Eke, Keretus wene yugeregek nagu dogoguluk lakbigik menda bininggigi halok, nenane anye vaga yukheraup sek ovara, dek.

⁷ Ata, hwa ambi at eyak abwa en elola okbetaluk yonggonisiga hak, nit henanggelekma dugwit, anderogoat nenane sagain erogo yukhirugu lagagup.

⁸ Henabwa adigat umbutu dugwit, hit nenendawi hunik okhinipugup atma, Sek Wene Ala en yukneragagi ako adigat yukheraup embetetek. Ata hit hinim hondo yup halok andi, segat umbutugup.

⁹ Ai, nowa-nasin. Nit ogarit adigat lagu dugwit, nenanyedek erogo bininggigi ako andi, henape wenggeles. Sek wene Ala en yukneragagi ako yukhirugu dugwit, “Hit ambi anggin henovaga bugugu saoen,” umbutu dugwit, niren hit henadema ambi nggino yukheregetek, ata, o hup-dingga nenadik neneyavup okhedegek nagu lagagup.

¹⁰ Nit hit avyarat ombasagwi menda henanggelekma dugwit, Ala wene dibaluk ogagagup, eke, weyak ogagetek mondok sek ogagagup vaga henane ambi nenovaga bininggitek dugwit, ogarit lagagup ako andi, Ala ogo il ninigu, eke hit ogo ninugwis, ogagagup.

^11-12 Ala mondok siyalek dugwit, “Hit An siyalek nabinak agirikmu yoma, navema omanes,” yiluk, yanggup yukheraliga ako, endawi ombasiga ndatak ogarit lagu dogovovok yiluk, ap ambi aburi mbilivisiga ako hak, nit anderogoat hit henadik-henadik henendawi yonggonhinipwis, henendawi aik wakbugugwis, hit henaruk watwis, ogagu lagagup ako hinilup-at.

¹³ Anderogo atma, Ala wene yukheragagup hunggu dugwit, “Yi un avakwa enane dek o. Yi Ala wene nit avyarat ombasagwi menda nenendawima hobininaliga wene avyarat o,” yiluk, wogogup atma, nit mbup yegetek ndugurek-ndagarek “Ala wa,” yugisagwi.

¹⁴ Ai, nowa-nasin. It Ala aburi Keretus Yesus inim hunik agarwik o Yudea homarisagwi ako, it enowa-enasin Yakuri menda en anggin-mbanggin oginupu lagagwa ako hak, hit henowa-henasin en hit anderogoat anggin-mbanggin okbigigugwa.

¹⁵ It ap Yakuri menda en andi, it navi-navi Ala yugirigya hegek yugurugu lagagwa menda ako initwis, Nenowa Inis Ombok Yesus warogo bagwi, eke, nit ogo haryogo wibinunggwis, ogagu lagagwa. It ako andi, avakwa ovok enanggon umbutu dugwit, inim ogorek werekma, Ala ogo, endawi sek enombasigadek, anggon enombasiga.

¹⁶ It ako andi, avakwa weram Yakuri dek menda Ala en enagap wendarup wene, nit yugurugu dogoguven yiluk, sup manggalogo bininilagwi halok, it weyak ambi lambok adigat ogarit wagusigik, “Andi hudi ari labuk,” vaup bagoma ako ari lagya halok, Ala aninis avakwa enovaga bisaliga ako ndatak, yogak ogo aninis mondok it enovaga bisaliga o.

Ndugwis ambi vaga bigisa laup imbitigi wene

¹⁷ Ai, nowa-nasin. Nit andi, hit vaga nenape wenggelek adigat agurik ovara, ndugwis ambiat neneyave adik-adik welagagup, vage bikhinisa warup, “Ai,” adigat umbutu dugwit, wal okhegek ogagu lagagup ovara, dek agagi.

¹⁸ Naswei ninim bikhinisa warup ombasagwi, eke, an Paulus ogo nadik ndugwis ambi vaga bikhinisaup degat. Ata, ndugurek-ndagarek bikhinisa warup yiluk, wal okhagagis ovara, madis Sile en sup manggalogo bininaliga halok, agurik.

¹⁹ Nit nenape wenggelek inim, nenendawi adenggen ombasagwi inim, sek ogagu niniselok nggudit-nggudit mendago yikbininggu halok, nenendawi sek hagup ako inim, andi sa vaga embetep? Dek o. Hit vaga yikbininayogon. Nit Nenowa Yesus wagya halok okbininaup ako andi, hit avyarat umbutu lagagupik ogarit lendagwi vaga.

²⁰ Nit siyabinunggwis, nenendawi adenggen erogo bininggwis, ogarup ako andi, hit heneyave vaga-at.