1 Tesalonika 1 - ALA WENE HIVIS DIRUP WATUGWA

¹ Ai nowa-nasin wa. Hit Ala aburi, Nenasin Ala Nenowa Inis Ombok Yesus Keretus Ala en denogo lakba wagagi ako, hinim hunik dugwit o Tesalonika homarisagwi ako, an Paulus inim, Silas inim, Timotius inim, nit henggam en wene ambi yukherasogom o. Ala henabwa en okbugugu, henendawi ugun seyalek adenggen dogovovok yiluk, okhinipu, ogagya dogopwak o.

It o Tesalonika menda avyarat umbutugwa wene

² Nit hit henake samban ogagu dugwit, hit ovok agipik andi vaga ndugurek-ndagarek Ala, “Wa,” yugisagwi.

³ Hit Yesus ovaga vanggabaluk avyarat umbutu dugwit ogarit lagwi, avakwa henendawi hunik en sek okbigik lagwi, eke, Nenowa Inis Ombok Yesus Keretus Ala en denogo lakba wagagi ako vaga vonggabaluk wenggelek werekma, anggin henovaga agya hegek henendawi wadokdek dugwit wugwi, ogasagwi ako andi, o ndugurek-ndagarek nenape wenggelek dugwit, Nenasin Ala yugisagwi.

^4-5 Ai, nowa-nasin wa, Ala henabwa ombasiga. Nit Yesus ninim hunik dugwit, niniluk mondok dogop Sek Wene yukhera wagagup ako andi, un nit nenane menda yukheregetek. Ata, Averiniki anye okbininggu hegek, yukhirugu ninigik, henendawima en, “Wene yi, mondok avyarat yuknerelagwi o,” umbutu dugwit wogogup. Anderogo wugu lagagupmu, Ala mikhinipigi andi, ninilup-at. Nit henanggelekma dugwit, hit henake nggarogo ogagu lagagup ako andi, hinilup-at.

⁶ Avakwa en mondok anggin-mbanggin okbugugusigik, Averiniki en henendawi adenggen okhinipu hegek, wene Yesus ninim hunik dugwit, niniluk mondok dogop Sek Wene yukhera wagagup ako, wugu lagagupik, nit Nenowa Inis Ombok Yesus ogasiga inim, nit ogasagwi inim, hit ndatak-at ogagu lagagup.

⁷ Anderogo ogagu lagagupmu, it avakwa avyarat ombasagwi ako o Makedonia inim, o Akaya inim, ovok erogo hit Tesalonika menda ogasagwi ako il wakhegek ogasagwi.

⁸ Hit ogasagwi vaga Nenowa ane ako o Makedonia inim, o Akaya inim, andoma adigat wigalit lagetek. Ata, yi awi ndi awi ovok erogo hit Ala avyarat umbutugup ako wigalarit landiga atma, nit wene ambi yukheraup degat higyo.

⁹ It avyarat umbutugwa menda akomaen yugu dugwit, “Paulus melen it Tesalonika menda enadema wagu lagagumu, wokhinipwis, huvuwak ogagu lagagwa ako mbobaluk, Ala iluk agarik avyarat ako At ake denek dugwit eyavup ogagu dogoguluk mikhidugwi, ogagagwa o,” yiluk, yugu selagwi.

¹⁰ Eke, Ala en At abut Yesus hambuluk lendagwima en iluk erogo mondok okbagya lagagimu, hivis ambi At aninis en nit weyak okbininggu haoen, At nenagap wendasiga Yesus mbogot vaga en wambu warisogon atma yiluk, it abyam agurik o,” yiluk, hit ogasagwi ako ovok erogo nit yugu selagwi.