1 Peterus 5 - ALA WENE HIVIS DIRUP WATUGWA

Ala andomba malenombogo dogop wene

¹ Nowa-nasin o. Hit Ala aburi enanggelekma dugwit vagenombogo agipik hak, an ogo Ala aburi vagenombogo agirik en wene ambi yukherayogon. At Keretus anggin-mbanggin ovaga bagu lagagwa ako, an nil hagagis atma, hivis At eyave siyalek dugwit sigam ari warup amor agyaim, “An ogo siyabanisogon,” imbita dugwit, “Wene eyave yukheraup,” ombasiga ambi des erogo hunggu dogovovok yiluk, yukherayogon o.

² Hit Ala aburi wam ndomba ovagak vagenombogo dogovovok yiluk, mikhinipigi ako, henanggon umbutu dugwit, vagenombogo dogop andi moga. Ata, Ala endawi ombasiga wane-wane, “Malenombogo dogop segat,” umbutu dugwit, vagenombogo dogones. Eke, onggo hedaup vaga adigat henendawi wenggelek dugwit, vagenombogo dogop andi ogo moga. Ata, un henendawi sek vaga-at vagenombogo dogones.

³ Vagenombogo dogovovok yiluk, andok okbigigi ako vagenombogo dugwit, “An nane adigat hunggu dogones,” yiluk, henane anye vaga yugeraup andi moga. Ata, it Ala andomba akoen hit henandogon sek adigat ogasagwi ako wakhegek dibigiluk, “At ogasiga andi, an wane-wane ogagya dogosogon,” ombarupwak yiluk, ogagu dogones.

⁴ Anderogo ogagu hiniselok, nit ndomba vaknenombogo agarik Nenowa ako, hivis wagya dugwit, “Hit mondok sek ogagu lagep o,” yiluk, nggudit-nggudit henago mondok abinak werek vidis asigadek menda yikbigiga warisogon.

⁵ Anderogo wane-wane, hit apsawe en ogagu dogop wene ambi yukherayogon. Henasini en enane yukhiruguselok, henaruk des erogo hobaluk ogagu dogones. Andi, Ala wene dirup warek ambi iri dugwit: “It avakwa enendawi wogobetelagwi halok andi, Ala en it inim ogorek agarik ovara, enendawi sovalek agarwik halok andi, enabwa en sek okbisaliga o,” yiluk, yagagi Ala wene dirup warek agarik atma, hit ovok erogo henendawi sovalek dugwit, yonggat-yonggat ogagu dogones.

⁶ At Ala en, “Ndugwis andi vaga siyabisayogon o,” yiluk, imbitigi ako atma des yi wagya halok, siyabigigapwak yiluk, At anye wisane agarik Ala ako avema seve yiluk, dogones.

⁷ At Ala en malhenombogo agarik atma, henendawi anggin wisane agarik ako ovok erogo vagalogo At ovaga adigat bagu dogones.

⁸ Hit hinim ndup agipik Sile akoen weyak okhinivigiluk, singga yangge do aninis werek ovagak heneyave yum yekhinivigiluk aik nde yagan havethinivit naliga atma, hit mondok henendawi alep mbabetaluk, suam watu dogones.

⁹ Eke, it henaswemuni yi awi ndi awi agarwik hinim henendawi avyarat ombasagwi ako, idup-mbidup hit okbigigelagwi wane-wane, it ogo anderogoat okbiselagwi ako hinilup atma, hit henendawi Ala ovaga vanggabaluk wadokdek dugwit, Sile en henendawima mali wagya haoen, henanye erogo dogones.

¹⁰ At endawi hunik en okbininaliga adem andok Nenasin Ala akoen, Keretus ninim hunik agurik vaga, At winimen siyalek agarik ako ninim wane-wane mondok-mondok winimen siyalek-at dogoguluk, nenayonggo bagagi. Eke, hit sidogat yagan watu hiniselok, Nenasin Ala en henovavut ap-at okbigigu, henendawi modo okhinipu, henanye erogo bigigu, henendawi wadokdek dogovovok yiluk okbigigu, ogagya dogosogon.

¹¹ At Ala andi, mondok-mondok agayuk werek dogopwak o, yiluk, avyarat yukheraliga o. Amin!

Atok vaga wa yugeragagi wene

¹² An wene horok dul yi, naswe des erogo adigat ogasiga Silas akoen yonggat-nitya hegek, henendawi aik wakbigigapwak yiluk, dirup warogo wokheraliga. Wene yukheraliga yi At Ala endawi hunik en sek okbininaliga ako, an nilup dugwit avyarat yukheraliga atma, wene yi vagago dugwit, henendawi wadokdek dogones.

¹³ It henaswemuni Ala aburi o Babilon menda ogo, Ala en hinim enogo bigigi atma, it akoen wa yukherelagwi, eke, an nabut Markus akoen ogo wa yukheraliga o.

¹⁴ Heyaga war-wat yugu dugwit, henendawi hunik vaga dinggik-hambuk yugu dogones. Eke, hit Keretus hinim hunik agipik ako hit ovok erogo henendawi ugun seyalek adenggen dogovovok yiluk, okbugugu dogosogon o. Wa!