1 Peterus 4 - ALA WENE HIVIS DIRUP WATUGWA

Nenandogon adik swi menda ogagu dogop wene

¹ Ap ambi eyave idup yagan watya dugwit, “An weyak ambi inim ogarisogonbuk,” yiluk, asam haliga atma, At Keretus eyave idup-mbidup okbagusigik, endawi wadokdek dugwit wigya lagagi ako hak, hit wane-wane henendawi wadokdek dugwit, wugu dogones.

² Hit anderogoat henendawi wadokdek agipik halok, o yogak yi hudien wen vaga yenam ao dugwit, henendawi ninggya ako adigat musek lagu dogobuk. Ata, Ala endawi ombasiga ako adigat wane-wane ogarit lagu dogones.

³ Hit endak henandogon it avakwa Ala inunggut menda en ogarup enendawi hunik okhidugu dugwit, ogarit nelagwi ako, hit eve iya erogo ogarit nagu lagagup. Ogarit nagu dugwit, ugun hogop adigat umbutu dugwit ogagwi, henendawi en ninggya halok musek nagwis, amburup nenek oginivisiga menda enagaum erogo nenggek nagwis, ndawi weyaravok watu dugwit, avakwa ugun ogunupwis, amburup enagaum erogo nelok nenek-nenek yagan nagu dugwit, weyak ogagwi, madis agoda werek menda inis adup ogagwi, ogarit nagu lagagup.

⁴ Eke, yogak ambi inim ogagetek hiniselok, it avakwa Ala wene inunggut menda ako enendawi mondok dek dugwit, yi weyak ndi weyak ugunat ogasagwi ako, it inim ari lagatek hiniselok, “Wi,” yiluk vok yugu dugwit, enane weyak henovaga bigigelagwi.

⁵ Ovara, At Ala en, avakwa niniluk menda inim, hombagagwa menda inim, nit ovok nenowak diligiluk mbagarek agarik atma, it anderogo ogasagwi menda ako Ala en, “Sigam yukneres,” yugirigya halok, sigamat yugurusogom.

⁶ Anderogo atma, it avakwa hombagagwa menda ako, Ala en avakwa ovok erogo enowak dilisogon hak, it ogo enowak dilisogon ovara, At Ala iluk agarik hak, it wane-wane enanggela mondok-mondok iniluk dogopwak yiluk, Sek Wene yugeralagagi.

Ala aburi en ogagu dogop wene

⁷ O hivis ogarup ako vage horok ari wagarikmu, samban ogagu dogovovok yiluk, henendawi alep mbabetaluk, henova hwalogo dogones.

⁸ Nendawi-hendawi hunik ogagu dugwit, ap ambien aswe ambi weyak okbaliga ovara, aswe endawi mondok hunik en weyak ako sovalogo degerogo baliga atma, hit anderogoat, henaswei-henarupwi henendawi enggen vaga nendawi-hendawi hunik ogagu dogones, yiluk, an wene mondok iya andiat yukheraliga.

⁹ Henaswemuni ambi henadema waguselok, henanggon embetetek henendawi sek vaga woginipu dogones.

¹⁰ At Ala en ogagu dogop nenadigetap andok okbininggigi ako, “Ala endawi hunik en andok okbaninggigi atma, nendawi hora yiluk avakwa enake ogarit lagya dogosogon o,” yiluk, hikirat ambien at ambi sek okbagek ogagu dogones.

¹¹ Yi ogagek ndi ogagek ogagu dugwit, Yesus Keretus inim hunik dugwit, At Ala inis ombok arupwak yiluk, hit ambien wene yugeraup ombasagwi halok, Ala weneat yugurugwi, eke, ambien avakwa yonggar-inipu dogop ombasagwi halok andi, Ala anye okbigigu hegek yonggar-inipwis, ogagu dogones. At Ala andi, anye wisane atma, mondok-mondok siyalek dogopwak o. Amin!

Ala aburi idup-mbidup okbugusigik wugu dogop wene

¹² Nowa-nasin o. Hit an nendawi hunik atma, wene ambi yukherayogon. Hit henavut mbalup yiluk, anggin-mbanggin mondok iya erogo henovaga bigigelagwi andi, hiren, “Wi,” yiluk, “Yi hunogo ogasagwidek menda nenovaga asiga,” ombarubuk.

¹³ Ata, hit idup-mbidup okbigigelagwi ako andi, hivis, At Keretus mondok siyalek wagya ako hinil hugu dogomundik, henendawi adenggen mondok iya erogo okhinivupwak yiluk, “Yogak At Keretus okbagu lagagwa akoat okbininelagwi atma, sek aro,” yiluk, henendawi adenggen umbutu dogones.

¹⁴ Hit Keretus ane welagwi menda atma, it avakwa ninen wiyiknom-weyaknom erogo okhinipuselok, “Ala Averiniki mondok siyalek agarik ako nit nenovaga agarik halok, yuknirugu selagwi,” yiluk, henendawi adenggen umbutu dogones.

¹⁵ Hiren ap watwis, henonggop wugwi, weyak ogagwi, ap ambi awene hegek andok akluk yugwi, ogasagwi ako vaga idup-mbidup okhinipuselok, henendawi adenggen habuk.

¹⁶ Ata, “Hit Keretus aori menda aro,” yiluk, anggin henovaga bigiguselok andi, henanggadidek dugwit, “Wi! An Keretus aot halok, At inis andi an ninis sabanilagwi atma, segat,” umbutu dugwit, Ala, “Wa,” yiluk, inis siyabagu dogones.

¹⁷ At Ala en nit yi ap ndi ap ovok erogo nenowak dilnenavup vage amor ari wagarikmu, nit Ala aburi endak nenowak dinggu dugwit, At ane yugup wane-wane ogagetek dogosogom halok, onggo nenovaga bininayogon atma, it Ala wene Sek Wene ako mondok wegetek iniselok andi, enowak dinggitek hekbisayogon ombasagwi? Dek o. Enowak dilogo baluk, onggo anggin mondok iya erogo okbisayogon.

¹⁸ Ala wene endak warek ambien iri dugwit: “It avakwa enendawi eve sek adigat ako enagap wendarup dek hegek ovara, enagap wendarisogon atma, it an nane hulisagwidek weyak adigat ogarit nelagwi ako andi, nggarogonggan okbisayogon ombasagwi?” yiluk, yagagi dirup warek andi agarik.

¹⁹ Anderogo atma, hit idup-mbidup okbigigelagwi ako andi, Ala endawi ombasiga vaga okbigigelagwi atma, hit sek adigat ogarit lagu dugwit, henendawi inim, heneyave inim, ovok erogo At heneyave werek okhinipigi des erogo adigat ogasiga ako andok dogopwak yiluk, wogokluk dogones o.