1 Peterus 3 - ALA WENE HIVIS DIRUP WATUGWA

Ap enogwai inim dugwit, nggarogo ogagu dogop wene

^1-2 Anderogo wane-wane, hit akwa henaguni enavema dugwit, enane hunggu dogones. Hit Ala henalon akluk, henandogon sek erogo dugwit, wene yugeregetek ovara henovavut des erogo dugwit ogasagwi vaga, it henaguni nin enendawi Ala Wene ao avyarat embetetek menda ako hinugu dogomundik, iren, “An ninim Yesus musek layogon,” ombarupwak yiluk, enavema dugwit, enane hunggu dogones.

³ It avakwa en, “Hwa yi, eyave mondok sek aro,” yupwak yiluk, heneyave vaga adigat sek okhidugu dugwit, hiniris eve sek erogo mbilinhidugwi, heneranggan-henadonggop-mangge mbusi emas menda yikhidugwi, henasum sek onggo ombok menda yikhidugwi, anderogo adigat ogagu dogobuk.

⁴ Ata, hwa andogon eve sek endawi horaik ako, adik agetek mondok vagago halok, At Ala en, “Hwa yi, mondok sek aro!” yiluk, endawi hunik ogasiga atma, hit henandogon anderogoat dogones.

⁵ O endak it akwa Ala aburi enendawi At ovaga vanggabaluk welagagwa ako andi, avakwa en, “Hwa yi eve mondok sek aro,” yupwak yiluk, eneyave vaga adigat sek okhidugu lagetek. Ata, it ogo anderogoat enaguni enavema dugwit, enane des erogo hunggu lagagwa atma,

⁶ at hwa Sara akoen Averakam ane iri halok, “E o, nasin,” yiluk, endawi sagain dugwit ogagya lagagi ako wane-wane, hit akwa o yogak agipik yi, henalon dek sek adigat ogarit nagu hiniselok, hwa Sara eyagi endago menda hirat agipik.

⁷ Anderogo wane-wane, yogak hit ap henogwai werek en ogagu dogop ambi yukherayogon. It akwa eneyave andi enanyedek agarwik dibisiluk, henogwai hinim enabwa umbutu dugwit henendawi sagain vaga henane sek erogo yugurugu dogones. Eke, henendawi weralek dugwit, hinim samban ogarup meyan okhinipu haoen, “Ala nenabwa en niniluk mondok dogop menda nenogwai ninim wane-wane andok okbininayogon o,” yiluk, sek okbugu dogones.

Sek wene yugerelagwi vaga idup-mbidup okbigigaup wene

⁸ Andi halok, an wene ambi atok vaga yukherayogon. Hit hinim henendawi ambiat akluk wene yugwi, henendawi aik war-wat yugwi, naswe-haswe yugwi, nabwa-habwa umbutwi, henendawi sovalek dugwit nagwis, ogagu dogones.

⁹ At Ala en adenggen henovaga bigigagiluk, heneyanggup yukheragagi atma, avakwa en weyak okhinipuselok, hiren weyak onggo enovaga bisabuk. Eke iren wiyiknom-weyaknom erogo yukhiruguselok, hiren onggo wiyiknom-weyaknom erogo yugerabuk. Ata, it weyak okbigigelagwi ako sek okbugu dogones.

¹⁰ Andi, Ala wene endak ako vaga At Ala en iri dugwit: “Hit avakwa sanien, hit hiniluk dogop henendawi hunik umbutwi, ‘Nit sek adigat dugwit, nanggok akluk, hambup segat,’ umbutwi, ogasagwi andi, henabis vaga wolok-wolok ane yagan nagwis, henabya atok vaga wene huluk wolok nagwis, ogagu hinisaoen, suam watu dogones.

¹¹ Weyak menda hekbaluk, sek menda halok adigat ogarit nagwis, nenendawi ambiat dambulik dogop andi nggarogo ogarup umbutu dugwit, henape wenggebaluk, andiat henanye erogo musek lagwi, ogagu dogones.

¹² It avakwa Ala endawi ombasiga menda ogasagwi ako, Nenasin Inis Ombok il wogiviluk nagu, samban ogaguselok, At aruk des erogo hunggu, ogasiga ovara, it ap weyak ogasagwi andi, Nenasin Inis Ombok il idup-idup enovaga bisaliga o,” yiluk, yagagi.

¹³ Hit henendawi adenggen vaga sek ogarit nagu hiniselok, saen weyak okbigigaup ombasagwi?

¹⁴ Anderogo ogasagwidek ovara, hit sek ogarit nagu hinigik idup-mbidup anderogo okbigiguselok, Ala en adenggen henovaga bigigayogon. Henalon hapwak yiluk okhinipusim, henalon en henendawi anggin dogobuk.

¹⁵ Hiren, “Keretus andi, nit Nenowa Inis Ombogat dogopwak o,” yiluk, henendawima adik enogo baluk, wogobagu dogones. Eke, hit henape wenggelek agipik ako, it avakwa en, “Yukneranes o,” yiluk, hemekhinipuselok, henendawi enggen vaga henane sagain erogo onggo yugeraup yiluk, henendawi vipuk okbaluk dogones.

¹⁶ Hit Keretus hinim hunik dugwit, sek ogarit lagu hinigik, it wiyiknom-weyaknom erogo bigigelagwi akoen, hit sek adigat ogarit lagwi vaga, “Ia!” yiluk, enanggadi arisogon atma, henendawi weyak ambi wenggelagetek henendawi sek vaga henane sagain erogo yugurugu dogones.

¹⁷ Hit weyak ogarit lendagwi vaga idup-mbidup henovaga bigiguselok andi, adem hit henovadombok okhedamwi vaga okbigigasogom atma, andi iya dek o. Ata, Ala endawi imbitigi vaga sek ogarit lagu hinigik, idup-mbidup henovaga bigiguselok andiat, iya aro.

¹⁸ Nit weyak ogasagwi ako ovok erogo dek okbayogon yiluk, At Keretus ndugwis ambiat hombagagi. At weyak ogasigadek sek adigat ogasiga akoen, nit sek ogasagwidek weyak adigat ogasagwi ako, Ala avema bigigayogon yiluk At eyave ap-at agya lagagirik, warogo bagagwa nit nenake-at hombagagi ovara, Ala Averiniki en iluk erogo mondok okbagagi.

¹⁹ Iluk okbagya lagagimu, it o muk hombagagwa enanggela heda mago werekma wene yugeralagagi.

²⁰ Enanggela yugeralagagi ako, o muk ap Nuh en mburis vanggya hegek, Ala endawi sagain en abyam dugwit, it avakwa Ala wene sovalogo hekbagagwa ako, mburis ovok vanggya lagagimu, is nggut ombok yanggadit inggya dugwit, sopalinipigi enanggela heda magoma wene yugeralagagi ako, it aro. Is sopalinipu hegek, ap Nuh aburi inim eneyave 8 hudiat mburis elola nonggagagwa ako, is en woginiviluk inggigi vaga enagap wendarinipigi.

²¹ Eke, it is en wogiviluk inggigi vaga enagap wendarinipigi ako wakhegek, hit yogak ima wombabigigelagwi vaga henagap wendarisiga andi, un henagamut vaga mbinggi hokhinivupwak yiluk, ogasagwidek. Ata, henendawi vaga en henendawi ugun seyalek sek dogoguluk Ala avema betugu hinigik, ima wombabugusim, At Yesus Keretus iluk erogo mondok okbagagi vaga henagap wendarisiga.

²² At eyave iluk akluk, mbogot vaga inggya lagagirik, Ala inggis amotkan horaik dugwit, it malaikat inim, it enanye werek o ilim yenam agarwik inim, yi madis ndi madis inim, At avema sovabigigirikmu agarwik.